އެފްއޭއެމް އާއި މިސަރުކާރުން ހަވާލުވިއިރު އެފްއޭއެމްގައި ބޭނުންކުރާނެ އެއްވެސް ވަސީލަތެއް ނެތްކަމަށް ކުރީގެ ސްޕޯޓްސް މިނިސްޓަރު އަހްމަދު ޒުހޫރު ވިދާޅުވެއްޖެއެވެ.

ޒުހޫރަކީ އެފްއޭއެމްގެ ހިންގުން ރަނގަޅުކުރަން ފީފާއިން ކަނޑައެޅި ނޯމަލައިޒޭޝަން ކޮމިޓީގެ ޗެއާމަަނެވެ. އެފްއޭއެމްއާއި އެކޮމިޓީން ހަވާލުވިފަހުން ކަންހިނގާފައި ހުރި ގޮތާއި އެފްއޭއެމްގެ ހާލަތު މިހާރު ހުރި ގޮތް ބަޔާން ކޮށްދިނުމަށް ސްޓޭޑިއަމްގެ ވީއަޕީ ރޫމްގައި ބޭއްވި ނޫސްވެރިންގެ ބައްދަލުވުމުގައި ޒުހޫރު ވަނީ އެފްއޭއެމްގެ މިހާރުގެ ހާލަތު އޮތް ގޮތް ވަރަށް ރަނގަޅަށް ކިޔައިދީފައެވެ.

ޒުހޫރު ވިދާޅުވީ ނޯމަލައިޒޭޝަން ކޮމިޓިގެ މަސައްކަތްތައް ފަށަން ޖެހުނީ ސުމަކުން ކަމަށެވެ. ޙަރަދެއް ކުރަން ބެލިއިރު އެއްވެސް ޙަރަދެއްކުރެވެން ނެތްކަމަށާއި، އެއްވެސް އެކައުންޓެއްގައި ފައިސާއެއް ނެތްކަމަށް ޒުހޫރު ވަނީ ވިދާޅުވެފައެވެ. އަދި މިވަގުތުވެސް އެކައުންޓް ބޭނުންކުރެވޭ ހާލަތެއްގައި ނެތްކަމަށް ޒުހޫރު ވިދާޅުވިއެވެ. ޒުހޫރު ވިދާޅުވީ ކަމާއި ގުޅިގެން ހޯދަންޖެހޭ ލިޔެކިޔުންތައް ހޯދަން ބޭންކާއި ގުޅައިގެން ހޯދުމުގެ މަސައްކަތް ކުރަމުން އަންނަކަމަށެވެ. ނަމަވެސް އެފްއޭއެމްއިން ކުރަންޖެހޭ އެއްވެސް މުއާމާލާތައް ނުކުރެވެނީ ލިބެންޖެހޭ ބައެއް މުހިއްމު ލިޔެކިއުންތައް ލިބުމުގައި ހުރި ދަތިކަމުން ކަމަށް ވެސް ޒުހޫރު ވަނީ ފާހަގަކޮށްފައެވެ.

ޒުހޫރު ވިދާޅުވީ މައިގަނޑުގޮތެއްގައި ތަނެއް ހިންގަން ބޭނުވާނެ މައުލޫމާތު ހިމެނޭ އެއްވެސް ލިޔެކިއުމެއް އަދި އަިދި ކޮށްފައިހުރި މުއާމާލާތުގެ ރަސްމީ އެއްވެސް ލިޔުމެއް ވެސް އެފްއޭއެމް ގައި ނެތްކަމަށެވެ. ނަމަވެސް މިކަމުގައި ފުލުހުންގެ އިދާރާއާއި، އޮޑިޓްފާމްތަަކުން ލިބޭ އެއްބާރުލުން ފާހަގަ ކުރައްވަމުން ޒުހޫރި ވިދާޅުވީ މި މައްސަލައާއި ގުޅިގެން އެފަރާތްތަކުން ލިބެން ޖެހޭ ލިޔެކުންތައް ނޯމަލައިޒޭޝަން ކޮމިޓީއިން އެދޭ ވަރަކުން ލިބިލައްވާ ކަމަށެވެ،

ޒުހޫރު ވަނީ މި މަސައްކަތަކީ ބުރަ އަދި އެހެނިހެން ނޯމަލައިޒޭޝަން ކޮމިޓީތަކުގެ މަސައްކަތަށް ވުރެ ބޮޑު މަސްއޫލިއްޔަތެއް ކަމަށް ވިދާޅުވަފައެވެ. އެފްއޭއެމް މިހާރު އޮތް ހާލަތުން އަރައިގަތުމަށް ކުރަންޖޭހޭ މަސައްކަތައް ފާހަގަކުރައްވަމުން ޒުހޫރު ވިދާޅުވީ އައު އޮފީސް ސެޓަޕެއް ހެދުމާއި، އޮފީސް ގާއިމްކުރުމުގެ އިތުރަށް އެފްއޭއެމްގެ އައު އޮނިގަނޑެއް ގާއިމް ކުރުމުގެ މަސައްކަތްތައް މިހާރު ވަނީ ފައްޓަވާފައިކަމަށެވެ. މިދެންނެވި އޮނިގަނޑު ތަރުވީބުކުރެވި އެއަށް އަމަލު ކޮށްގެން ނޫނީ އެފްއޭއެފް އަލުން ކޮޅަށް ނުޖެހޭނެކަމަށާއި މި އޮނިގަނޑުގެ ތެރެއިން އެފްއޭއެމްގެ މަސައްކަތްތައް ދާއިމަށް ހިންގޭނެ ގޮތެއް ހޯއްދަވަންޖެހޭ ކަމަށް ވެސް ޒުހޫރު ވަނީ ވިދާޅުވެފައެވެ. މީގެ ސަބަބެއް ކަމަށް ޒުހޫރު ފާހަގަ ކުރެއްވީ ޒުވާނުންގެ ސިއްހަތާއި ރާއްޖޭގެ ފުޓުބޯޅަ ގުޅިފައި އޮތް މިންވަރެވެ.

ޒުހޫރު ވިދާޅުވީ ސަރުކާރުގެ އެހީތެރިކަމާއި އެކީ މިހާރު ހުރި ދަތިތަކަށް ހައްލު ހޯދުމުގެ މަސައްކަތް ކުރަމުން އަންނަކަމަށާއި އަދި އަވަސް މުއްދަތެެއްގައި އެފްއޭއެމްގެ ހިންގުން ރަނގަޅު ކުރަން މިހާރަށް ވުރެ ހަރުދަނާ ފިޔަވަޅުތައް އަޅުއްވާނެ ކަމުގެ ޔަގީންކަން ޒުހޫރު ވަނީ ދެއްވާފައެވެ. އެގޮތުން އެފްއޭއެމްގެ އައު އޮނިގަނޑު އެކުލަވާލަން ފީފާއިން ވަރަށް އަވަހަށް އަންނާނެކަމަށާއި ދަރަނިތައް ދެއްކުމުގައި އެދެވޭ ގޮތްތަކެއް ހޯއްދެވުމުގެ މަސައްކަތްތައް ކުރައްވަމުން އަންނަ ކަމަށް ޒުހޫރު ވަނީ ވިދާޅުވެފައެވެ. އެގޮތުން ދަރަނީގެ ގޮތުގައި ލިޔެކިއުންތަކުން ފެންނަން 30 މިލިއަނަށް ވުރެ ގިނަ ރުފިޔާ އެބަހުރިކަމަށާއި ލިޔެކިޔުންތަކުގެ ބޭރުން އެއަދަދު 80 މިލިއަނަށް އަރާނެކަމަށް ވެސް ޒުހޫރުވަނީ ވިދާޅުވެފައެވެ.