ދެކުނު ކޮރެއާގެ ކުންފުންޏެއް ކަމުގައިވާ ޓީކުއިން ކޮންސްޓްރަކްޝަން ކޯ ލިމިޓެޑްއަށް 52 މިލިއަނަށްވުރެ ގިނަ ރުފިޔާ ދައްކަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ މައްޗަށް ހުކުމް ކޮށްފިއެވެ.

ސިވިލް ކޯޓުން ބުރާސްފަތިދުވަހު އިއްވި ހުކުމުގައިވަނީ ޓީކުއިން ކޮންސްޓްރަކްޝަން ކޯ ލިމިޓެޑްއަށް 3,382,000 (ތިން މިލިއަން ތިން ލައްކަ އައްޑިހަ ދެ ހާސް) ޑޮލަރު ނުވަތަ 52,150,440 (ފަންސާސް ދެ މިލިއަންް އެއް ލައްކަ ފަންސާސް ހާސް ހަތަރު ސަތޭކަ ސާޅީސް ރުފިޔާ) ދެއްކުމަށް އަމުރުކޮށްފައެވެ.

މި ފައިސާއަކީ 2021 ގެ މާރޗް މަހު ވިލިމާލެ އާއި ހުޅުމާލޭގައި ފުޓްބޯޅަ ދަނޑުތަކެއް ތަރައްޤީކޮށް ހުޅުމާލޭގައި ރީކޮންސްޓްރަކްޝަންގެ މަސައްކަތްތަކެއް ކުރުމަށް ދެ ފަރާތުގެ ދެމެދު ވެވުނު އެއްބަސްވުމުގެ ދަށުން ދައްކަން ޖެހިފައިވާ އަދަދެކެވެ.

މައްސަލައިގައި ޓީކުއިން ކޮންސްޓްރަކްޝަނުން އެދިފައިވަނީ 5,911,200 (ފަސް މިލިއަން ނުވަ ލައްކަ އެގާރަ ހާސް ދުއިސައްތަ) ޑޮލަރު ނަގައިދިނުމަށެވެ.

މިހާރުވެސް މާލީ ގޮތުން އަނދަވަޅެއްގެ ތެރޭގައި އޮތް އެފްއޭއެމްގެ ކުރީގެ އިސް ވެރިންގެ މައްޗަށް ބޮޑެތި ތުހުމަތުތަކެއް ކުރެވެމުން އަންނައިރު އެފްއޭއެމްގެ ފައިސާއިން އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް 2 އެޕާޓްމަންޓް ގަނެފައިވާކަމަށް ފުލުހުން ވަނީ މިފަހުން ބުނެފައެވެ. އަދި މިހާރު މި 2 އެޕާޓްމަންޓް މިމަހުގެ 6 ވަނަދުވަހުގެ ކުރިން ފުލުހުންނާއި ހަވާލުކުރުމަށް ކޯޓުވަނީ އަމުރުކޮށްފައެވެ.

ފުލުހުން މީގެ ކުރިން ބުނީ ބައްސާމް 2 އެޕާޓްމަންޓް ގަނެފައިވަނީ އަމީން އެވެނިއު އިން ކަމަށެވެ. ބައްސާމް ހިޔާނާތްތެރިވެފައިވަނީ 1.9 މިލިއަން ޑޮލަރުގެ ކޮވިޑް ރިލީފް ލޯނުގެ ފައިސާއިންކަން އެނގިފައިވާކަމަށް ފުލުހުން މައުލޫމާތުދެއެވެ. މި ފައިސާއިން އެޕާޓްމަންޓް ގަތުމަށްފަހު ފައިސާގެ އަސްލު އޮޅުވާލުމަށް ލިޔެކިޔުންތަކަށް ބަދަލު ގެނެސްފައިވާކަން ފާހަގަކުރެވިފައިވާކަމަށްވެސް ފުލުހުން މައުލޫމާތުދެއެވެ.

އެފްއޭއެމްގެ ހިޔާނާތް ބައްސާމްގެ މައްޗަށް ސާބިތުވެއްޖެނަމަ 1 އަހަރާއި 7 މަހާއި 6 ދުވަހުގެ މުއްދަތުގެ ޖަލު ހުކުމެއް އޭނާގެ މައްޗަށް އަންނާނެއެވެ.