ޕެޓްރިކް ޑޯގޫ މެންޗެސްޓާ ޔުނައިޓެޑަށް ކާމިޔާބުކޮށްދިން ފުރަތަމަ ލަނޑާއެކު، އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑްގެ މައްޗަށް 1-0 ގެ ހަނި ނަތީޖާއަކުން މެންޗެސްޓާ ޔުނައިޓެޑް ކުރިހޯދައިފިއެވެ. އޯލްޑް ޓްރެފޯޑްގައި ކުޅުނު މި މެޗުގައި ޔުނައިޓެޑް މޮޅުވީ އަނިޔާގެ ސަބަބުން ކެޕްޓަން ބްރޫނޯ ފެނާންޑޭޒް ނުލައި ކުޅެގެންނެވެ.

މެޗުގެ ހަމައެކަނި ލަނޑު ފެނިގެންދިޔައީ 24 ވަނަ މިނެޓުގައެވެ. ނިއުކާސަލްގެ ނިކް ވޮލްޓެމޭޑް ބޮލުން ބޭރުކޮށްލި ބޯޅައެއް ކޮންޓްރޯލް ކުރުމަށްފަހު، ވިންގް-ބެކް ޑޯގޫ ވަނީ ފޮނުވާލި ހިތްގައިމު ވޮލީއަކުން ގޯލުގެ ތެރެއަށް ބޯޅަ ފޮނުވާލާފައެވެ. މި ލަނޑާއެކު ރޫބެން އަމޮރިމްގެ ޓީމަށް ތިން ޕޮއިންޓް ކަށަވަރުވިއެވެ.

Ad by Hajj Corporation

މެޗުގެ ފުރަތަމަ ހާުގގައި ޔުނައިޓެޑުގެ ފަރާތުން އެންމެ އެދެވޭ ކުޅުމެއް ފެނިފައިނުވާއިރު، ދެވަނަ ހާފު މުޅިންހެން ކޮންޓްރޯލްކޮށްގެން ކުޅުނީ ނިއުކާސަލލްއިންނެވެ.

ރޭގެ މެޗަށް ފެނާންޑޭޒްގެ އިތުރުން ޔުނައިޓެޑްގެ ފުރަތަމަ 11 ގެ ކުޅުންތެރިންކަމަށްވާ އެމްބޫމޯ އާއި އަމަދު ވަނީ އެފްރިކަން ކަޕް އޮފް ނޭޝަންސް އަށް ގސްފައެވެ.

މިއީ މާރިޗު 2022 ގެ ފަހުން ބްރޫނޯ ފެނާންޑޭޒް ނުލައި ކުޅެ ޕްރިމިއާ ލީގުގައި ޔުނައިޓެޑް މޮޅުވި ފުރަތަމަ މެޗެވެ. މީގެ ކުރިން ފެނާންޑޭޒް ނުލައި ކުޅުނު ފަސް މެޗުންވެސް ޔުނައިޓެޑް ވަނީ ބަލިވެފައެވެ. އަދި މިއީ އަމޮރިމްގެ އިރުޝާދުގެ ދަށުން ޔުނައިޓެޑުން ހަތަރު ޑިފެންޑަރުން ބޭނުންކޮށްގެން ކުޅުނު ފުރަތަމަ މެޗުވެސް މެއެވެ.