ކްރިމިނަލް ކޯޓަށް ހުށަހަޅާފައިވާ މައްސަލައަކާ ގުޅިގެން މީހަކު ކޯޓަށް ހާޒިރުކުރުމަށް ނުވަ ފަހަރެއްގެ މަތިން އިއުލާނުކޮށްގެން ވެސް މިހާތަނަށް ފެނިފައި ނުވާކަމަށް ދިވެހި ފުލުހުންގެ ޚިދުމަތުން ބުނެފިއެވެ.

ފުލުހުން ހޯދަމުން ދަނީ ގދ. ވާދޫއަށް ނިސްބަތްވާ އުމުރުން 26 އަހަރުގެ އިޒާމް ޒާހިރު އެވެ.

Ad by Hajj Corporation

އިޒާމް ހޯދަން ފުލުހުން އެންމެ ފުރަތަމަ އިއުލާނުކޮށްފައި ވަނީ 2024 ވަނަ އަހަރުގެ ޖޫން މަހުގެ 11 ވަނަ ދުވަހުއެވެ. އޭގެ ފަހުން އެކި ފަހަރު މަތިން އޭނާ ހޯދަން އިއުލާނުކޮށްފައި ވަނީ ކޯޓުގެ އަޑުއެހުމަށް ހާޒިރުވަމުން ނުދާތީ އެވެ.

މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، ގދ. ވާދޫ، ސަބާހާ މަންޒިލަށް ނިސްބަތްވާ އިޒާމް ބަންދުގައި ބަހައްޓައިގެން ކޯޓަށް ހާޒިރުކުރުމަށް އެކި ފަހަރު މަތިން ކޯޓުން ފުލުހުންގެ މައްޗަށް އަމުރުކޮށްފައިވާ ކަމަށެވެ.

މިގޮތުން، އޭނާ ކޯޓަށް ހާޒިރުކުރުމަށްޓަކައި، ނުވަ ފަހަރެއްގެ މަތިން އިއުލާނުކުރި ކަމަށާއި މިހާތަނަށް ކުރެވުނު މަސައްކަތުން އަދިވެސް އޭނާ ހޯދިފައިނުވާ ކަމަށް ފުލުހުން ވަނީ ބުނެފައެވެ.

ނަމަވެސް، އޭނާ ކޯޓަށް ހާޒިރު ކުރުމަށް ހޯދާ، ކޮން މައްސަލައަކާ ގުޅިގެން ކަމެއް ފުލުހުން ހާމައެއް ނުކުރެއެވެ. އެހެންނަމަވެސް ބައެއް މަސްދަރުތަކުން ރިޕޯޓުކުރާ ގޮތުގައި އޭނާ ހޯދަމުން ދަނީ ރޭޕްގެ މައްސަލައެއްގައި ކުރެވޭ ތުހުމަތަކާ ގުޅިގެންނެވެ.

މީހުން ކޯޓަށް ހާޒިރުކުރުމަށް ދޭތެރެއަކުން ފުލުހުން އިއުލާނު ކުރެއެވެ. އެ ގޮތަށް ކުރާ މަސައްކަތް ފުލުހުންނަށް ކާމިޔާބު ނުވެއްޖެނަމަ، އާންމުންގެ އެހީތެރިކަމަށް ވެސް ފުލުހުން އެދިފައި އެބަ ހުއްޓެވެ.