މައްކާގައި ހުންނަ އަލް މަސްޖިދުލް ޙަރަމްގެ މަތީ ފަންގިފިލާއަކުން ފުންމާލި މީހަކު ސަލާމަތްކުރުމުގެ ތެތޭގައި ފުލުހަކަށް އަނިޔާވެ ހޮސްޕިޓަލްގައި ފަރުވާދެމުން އެބަ ގެންދެއެވެ.

މި ހާދިސާގައި، މަތީ ފަންގިފިލާއަކުން ފުންމާލީ އުމްރާގެ އަޅުކަން އަދާކުރަން ދިޔަ ފިރިހެނެކެވެ. އޭނާއާއި އޭނާ ސަލާމަތްކުރަން މަސައްކަތްކުރި ފިރިހެން ފުލުސް އޮފިސަރަކަށް ވެސް ވަނީ މި ހާދިސާގައި އެކިވަރުގެ އަނިޔާތައް ލިބިފައެވެ.

Ad by Hajj Corporation

ނަމަވެސް ލިބުނު އަނިޔާތަކުގެ ތަފްސީލެއް ސާފެއް ނޫނެވެ.

ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި ސެކިއުރިޓީ އޮފިސަރުން ވަނީ ފުންމާލި މީހާ ހުއްޓުވަން ވެސް މަސައްކަތް ކޮށްފައެވެ. އޭނާ ފުންމާލުމުން ގްރައުންޑުގައި ހުރި އޮފިސަރަކު ވަނީ އޭނާއާ ދިމާލަށް ދުއްވައިގަނެ ސަލާމަތްކުރަން މަސައްކަތްކޮށްފައެވެ.

އޭނާ ސަލާމަތް ކުރުމުގެ ތެރޭގައި އޮފިސަރަށް އަނިޔާ ލިބިފައިވާއިރު އަނިޔާތަކުގެ ތެރޭގައި ފްރެކްޗަރތަކެއް ހިމެނޭ ކަމަށް ރިޕޯޓުތައް ބުނެއެވެ.

މައްކާ ރީޖަންގެ ރަސްމީ އެކައުންޓުން އެކްސްގައި ކުރި ޕޯސްޓެއްގައި ބުނެފައި ވަނީ ސްޕެޝަލް ފޯސް އިން އެ މީހާ ފުންމާލަން އުޅުމުގެ ތެރޭގައި ވެސް ފިޔަވަޅު އެޅި ކަމަށެވެ.

ސްޕެޝަލް ފޯސަސް އިން ބުނީ އެކަމަށް ބޭނުންވާ ހުރިހާ ގާނޫނީ އިޖުރާއަތްތަކެއް ފުރިހަމަކޮށްފައިވާ ކަމަށާއި ސްޕެޝަލް ފޯސް އިން އަވަސް ފިޔަވަޅުތަކެއް އެޅި ކަމަށާޢި އަޅަންޖެހޭ ފިޔަވަޅުތަށް އަޅާނެ ކަމަށެވެ.