ރާއްޖޭގެ މާލީ ހާލަތު ރަނގަޅުކުރުމަށް އިންޑިއާގެ އެހީތެރިކަން ލިބޭނެކަމުގެ ފުރިހަމަ ޔަގީންކަން އެބައޮތްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ރަސްމީ ދަތުރުފުޅެއްގައި މިއަދު އިންޑިއާއަށް ފުރާވަޑައިގެންނެވުމުގެ ކުރިން އިނގިރޭސިވިލާތުގެ ބީބީސީއަށް ދެއްވި އިންޓަވިއުއެއްގައި ރައީސް ވިދާޅުވީ ރާއްޖެއަށް ދިމާވެފައިވާ އިގްތިސާދީ ކާރިސާއިން އަރައިގަތުމަށް އިންޑިއާގެ އެހީތެރިކަން ރާއްޖެއަށް ލިބިގެންދާނެކަމަށް އުއްމީދުކުރައްވާކަމަށެވެ.

އިންޑިއާ އަކީ އަޅުގަނޑުމެންގެ މާލީ ހާލަތު ފުރިހަމައަށް އެނގޭ ގައުމެއް. އަދި އަޅުގަނޑުމެންގެ ބުރަ ލުއިކޮށް، ކުރިމަތިވާ ގޮންޖެހުންތަކަށް ރަނގަޅު ބަދަލުތަކާއި ހައްލުތައް ހޯދުމަށް ތަރައްގީގެ އެންމެ ބޮޑު އެއް ބައިވެރިޔާގެ ގޮތުގައި އަބަދުވެސް ތައްޔާރަށް އޮންނަ ގައުމެއް އިންޑިއާއަކީ.

ސަރުކާރުން މީގެ ކުރިން ކުރިއަށް ގެންދިޔަ "އިންޑިއާ އައުޓް" ހަރަކާތާ ގުޅިގެން ދެގައުމުގެ ދެމެދު އުފެދުނު ހިޔާލުތަފާތުވުންތަކާ ގުޅިގެން ސުވާލުކުރުމުން ރައީސް ވިދާޅުވީ ރާއްޖެއާއި އިންޑިއާއާ ދެމެދު ހިޔާލުތަފާތުވުމެއް އުޅޭނަމަ ވާހަކަދައްކައިގެން އެކަން ހައްލުކުރެވޭނެކަމަށެވެ.

މިއަދުން ފެށިގެން މި މަހުގެ 10 ވަނަ ދުވަހުގެ ނިޔަލަށް ރައީސް އިންޑިއާއަށް ކުރައްވަމުންގެންދަވާ މި ދަތުރުފުޅުގައި އެގައުމުގެ ރައީސް ދުރޫޕަދީ މުރުމޫ އާއި ބޮޑު ވަޒީރު ނަރެންދްރަ މޯދީ އަދި އެ ޤައުމުގެ އިސް ވެރިންނާ ބައްދަލުކުރެއްވުމަށް ވަނީ ހަމަޖެހިފައެވެ.