އިންޑިއާ އިން ރާއްޖެ އަށް ދިނުމަށް ނިންމާފައިވާ 507 މިލިއަން ޑޮލަރުގެ ކްރެޑިޓް ލައިން ބޭނުންކުރެވޭ ގޮތް ހަދައިފި އެވެ.

އިންޑިއާގެ މަރުކަޒީ ބޭންކް — ރިޒާވް ބޭންކް އޮފް އިންޑިއާ (އާރްބީއައި) އިން ބުނި ގޮތުގައި ކްރެޑިޓް ލައިން ބޭނުންކުރެވޭ ގޮތް ހެދީ މިދިޔަ އޮގަސްޓް 27 ވަނަ ދުވަހު އެވެ.

މީޑިއާތަކުގައި ރިޕޯޓްކޮށްފައިވާ ގޮތުގައި ކްރެޑިޓް ލައިން ބޭނުން ކުރެވޭ ގޮތް ހަދާފައިވާތީ ވަކިވަކި މަޝްރޫއުތަކަށް ބޭނުންވާ ފައިސާ ދޫކުރުމުގެ އެއްބަސްވުންތަކުގައި ސޮއިކުރުމުގެ ފުރުސަތު މިހާރު ލިބޭނެ އެވެ.

އާރްބީއައި އިން ބުނެފައިވަނީ ކްރެޑިޓް ލައިންގެ ދަށުން ހިންގާ ކޮންމެ މަޝްރޫއަކަށް މަދުވެގެން ފަސް ބިލިއަން އިންޑިއަން ރުޕީޒްގެ އަގުހުރި ވަކިވަކި އެއްބަސްވުންތަކެއް ގާއިމުކުރަން ޖެހޭނެ ކަމަށެވެ. މިއީ ރާއްޖޭގެ ތަރައްގީގެ އެކި ދާއިރާތަކަށް އަމާޒުކޮށްގެން ދޫކުރުމަށް ހަމަޖެހިފައިވާ ފައިސާ އެވެ.

ކްރެޑިޓް ލައިން އެއްބަސްވުމުގެ ދަށުން ފައިސާ ހަމަޖައްސައި މަޝްރޫއުތަކަށް ބޭނުންވާ މުދަލާއި، މަސައްކަތްތެރިން އަދި ހިދުމަތްތަކުގެ މަދުވެގެން 75 ޕަސެންޓް ހޯދަން ޖެހެނީ އިންޑިއާގެ ކުންފުނިތަކުން ނުވަތަ އެ ގައުމުގެ ސަޕްލަޔަރުންގެ އަތުންނެވެ. ބާކީ 25 ޕަސެންޓް މުދަލާއި ހިދުމަތް އިންޑިއާއިން ބޭރުގެ އެހެން ގައުމުތަކުން ހޯދުމުގެ ފުރުސަތު އެއްބަސްވުމުގެ ދަށުން ލިބެ އެވެ.

އާރްބީއައި އިން ބުނީ މި ކްރެޑިޓް ލައިންގެ ފައިސާ އެކްސްޕޯޓް ކުރުމުގެ މުއާމަލާތްތަކުގައި ދޭން ޖެހޭ އެޖެންސީ ކޮމިޝަންތައް ދެއްކުމަށް ބޭނުން ނުކުރެވޭނެ ކަމަށެވެ. އޭގެބަދަލުގައި ކޮމިޝަންތައް ދައްކަން ޖެހެނީ އެކްސްޕޯޓް ކުރާ ފަރާތްތަކުގެ އަމިއްލަ ފައިސާ ގައެވެ.

ރައީސް އިބްރާހީމް މުހައްމަދު ސޯލިހްގެ ސަރުކާރުގައިވެސް އިންޑިއާއިން ރާއްޖެއަށް 800 މިލިއަން ޑޮލަރުގެ ކްރެޑިޓް ފެސިލިޓީއެއް ހަމަޖައްސައިދީފައިވެ އެވެ.

Ad by Hajj Corporation

ރާއްޖޭގެ ތަރައްގީއަށް އިންޑިއާ އިން ގެންދަނީ އަބަދުވެސް އެހީތެރިކަން ފޯރުކޮށްދީ އެ ގައުމަކީ ރާއްޖޭގެ އެންމެ ގާތް ބައިވެރިޔާކަން ސާބިތުކޮށްދެމުންނެވެ.