ޖިންސީ ފުރައްސާރައިގެ ތުހުމަތު ކޮށްފައިވާ ބްރޯޑްކޮމްގެ ކުރީގެ ނައިބު ރައީސް، މުޙައްމަދު ފަޒީންގެ މައްޗަށް ކްރިމިނަލް ކޯޓުގައި ދައުވާކުރަން އާދީއްތަ ދުވަހު ހުށަހަޅައިފިއެވެ.

މިމައްސަލައިގައި ފަޒީންގެ މައްޗަށް އުފުލާފައިވަނީ ދެ ދައުވާއެއް ކަމަށް ޕްރޮސެކިއުޓަރ ޖެނެރަލްގެ އޮފީހުން ބުނެއެވެ. އެއީ:

* ގައިގައި އަތްލުމުގެ ކުށުގެ ދައުވާ (ޤާނޫނުލް އުޤޫބާތުގެ 120 ވަނަ މާއްދާ)
* ޖިންސީ ގޯނާ ކުރުމުގެ ދައުވާ (ޖިންސީ ކުށުގެ ގާނޫނުގެ 17 ވަނަ މާއްދާ)

ބްރޯޑްކޮމްގެ މެންބަރުކަމުން ފަޒީން އިސްތިއުފާ ދެއްވީ މިދިޔަ އަހަރު މާރިޗު މަހުގެ 15 ވަނަ ދުވަހުއެވެ. އޭނާ އެމަޤާމުން އިސްތިއުފާ ދެއްވާފައި ވަނީ އޭނާ އެމަޤާމުން ވަކިކުރުމާ ގުޅޭގޮތުން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މައްސަލައެއް ބެލުމަށް ފަހު އޭނާ މަޤާމުން ވަކިކުރަން ނިންމާފައިވަނިކޮށެވެ.

ކޮމިޓީން ބަލަމުން ދިޔައީ އޭނާއާއި ގުޅުންހުރި ޖިންސީ ފުރައްސާރައާ ގުޅޭ މައްސަލައެއް ކަމަށް މައުލޫމާތު ލިބިފައި ވެއެވެ.