މާލޭގައި ހިންގާ ސްވެނިއާ ފިހާރައަކުން 300 ޑޮލަރު ވަގަށް ނެގި މީހެއްގެ މައްޗަށް ކުށް ސާބިތުވެ، ނުވަ މަހަށް ޖަލަށް ލުމަށް ކުރިމިނަލް ކޯޓުން ހުކުމް ކޮށްފިއެވެ.

މި މައްސަލަ ސާބިތުވެ ޖަލު ހުކުމެއް އައިސްފައި ވަނީ ސ. ހިތަދޫ، ދެކުލައަރާގެ މުހައްމަދު އަސްލަމްގެ މައްޗަށެވެ.

މި މައްސަލާގައި އޭނާގެ މައްޗަށް ވަނީ އެނގިހުރެ ހުއްދަ ނޫން ތަނަކަށް ވަނުމާއި، އެހެން މީހެއްގެ މުދަލަށް ބާރު ހިންގުމާއި، މީހެއްގެ މުދަލަށް ގެއްލުންދިން މައްސަލައިގައި ދައުވާ އުފުލާފައެވެ. އޭނާގެ މައްޗަށް އުފުލި ދައުވާގައިވާ ގޮތުން އޭނާ ވަނީ މިއަހަރުގެ ޖޫން މަހުގެ 24 ވަނަ ދުވަހުގެރޭ، ޗާންދަނީ މަގުގައި ހުރި ސްވެނިއަރ ފިހާރައަކަށް އެތަނުގެ ވެރި މީހާގެ ހުއްދަނެތި، ފިހާރަ ބަންދުކޮށްފައި ހުއްޓައި ތަނުގެ ތަޅާއި ދޮރަށް ގެއްލުންދީ އެތަނަށް ވަދެ ވައްކަން ކޮށްފައެވެ.

އެހެންވެ އޭނާގެ މައްޗަށް އުފުލި ދައުވާ ސާބިތުވެ، ކްރިމަނަލް ކޯޓުން އިއްވި ހުކުމުގައިވާ ގޮތުން އޭނާ ވަނީ މި ފިހާރައިން 300 ޑޮލަރު ވަގަށް ނަގާފައެވެ. އަދި މި ކުށަށް އޭނާ ވަނީ ޝަރީއަތުގެ މަރުހަލާގައި އިއުތިރާފުވެފައެވެ. އެހެންކަމުން ކުށަށް ކަނޑައެޅިފައިވާ އަދަބުން އެއްދަރަޖަ ކުޑަކޮށްފައިވާއިރު، ފާއިތުވި ދެ އަހަރެއްހާ ދުވަސްތެރޭ މިފަދަ އިތުރު ކުށްތަކެއް އޭނާގެ މައްޗަށް ސާބިތުވެފައިވާތީ އިތުރު އެއް ދަރަޖަ އަދަބު މަތި ކުރުމަށް ގާޒީ ވަނީ ނިންމާފައެވެ.ވަކި ވަކިން ކުރި މި ދައުވާގެ ހުކުމުގައިވާ ގޮތުން އެހެންމީހެއްގެ މުދަލެއްގެ މައްޗަށް ބާރު ފޯރުވުމުގެ ކުށުގައި އޭނާގެ މައްޗަށް ހަ މަސް ދުވަހުގެ ޖަލު ހުކުމެއް އައިސްފައިވާއިރު، އެ ހުކުމް ކުރެވުނުއިރު އޭނާ މި މައްސަލާގައި 28 ދުވަސް ޖަލުގައި ހޭދަކޮށްފައިވާތީ އެ ދުވަސްތައް ހުކުމުން އުނިކޮށްފައި ވެއެވެ.އޭގެ އިތުރުން އެނގިހުރެ ހުއްދަ ނޫން ތަނަކަށް ވަނުމުގެ ކުށުގެ ދައުވާ ސާބިތުވެ ތިން މަހަށް ޖަލަށްލުމަށް ވަނީ ހުކުމް ކޮށްފައެވެ. އަދި މުދަލަށް ގެއްލުން ދިނުމުގެ ކުށުގައި 22 ދުވަހަށް ޖަލަށްލުމަށް ވަނީ ހުކުމް ކޮށްފައެވެ.