މާލޭގައި ނުރައްކާތެރި ހަތިޔާރު ބޭނުން ކޮށްގެން މާރާމާރީ ހިންގި މައްސަލައަކާއި ގުޅިގެން ހައްޔަރުކުރި މީހަކު ކޯޓުން ދޫކޮށްލާފައިވާ ކަމަށް ފުލުހުން ވިދާޅުވެއްޖެއެވެ.

ފުލުހުން ވިދާޅުވީ، މިދިޔަ އަހަރުގެ ސެޕްޓެމްބަރު މަހުގެ 4 ވަނަ ދުވަހު މާލޭގައި ނުރައްކާތެރި ހަތިޔާރު ބޭނުން ކޮށްގެން މީހަކަށް ހަމަލާދިން މައްސަލައިގައި ހައްޔަރު ކޮށްފައިވަނީ ތިން މީހުން ކަމަށެވެ. އަހަރެއްހާ ދުވަސް ފަހުން އެމީހުން ހައްޔަރު ކޮށްފައިވަނީ ފިލައިގެން ތައިލޭންޑުގައި އުޅެނިކޮށް، އެމީހުން ހޯދަން ރެޑް ނޯޓިސް ނެރުމުން، ތައިލޭންޑުން ޑީޕޯޓްކޮށްލުމުން ރާއްޖޭގެ އެއާޕޯޓުން ކަމަށެވެ.

ފުލުހުން ވިދާޅުވި ގޮތުގައި އެއީ ހ. ދޮންތުނޑު، މުހައްމަދު އަހުސަން (26އ)، ލ.ގަން، މުކުރިމަގު، މޫރިތި، އަސްވާން މުހައްމަދު (28އ)ގެ އިތުރުން މ. މަސްކޮތަންގެ، މުހައްމަދު ސިބްތް އަބްދުﷲ (19އ) އެވެ.

މީގެ ތެރެއިން އެކަކު މިމަހުގެ 18 ވަނަ ދުވަހު ހައްޔަރު ކޮށްފައިވާއިރު، އަނެއް ދެ މީހުން ހައްޔަރު ކޮށްފައިވަނީ މިމަހުގެ 19 ވަނަ ދުވަހުއެވެ.

ފުލުހުން ވިދާޅުވީ، އެމީހުންގެ ބަންދާއި މެދު ގޮތެއް ނިންމުމެއް ކްރިމިނަލް ކޯޓަށް ހާޒިރު ކުރުމުން އަސްވާން މުހައްމަދު ބަންދުން ދޫކޮށްލާފައިވާ ކަމަށެވެ. ނަމަވެސް ދެން ތިބި ދެ މީހުން ޝަރީއަތް ނިމެންދެން ބަންދުކޮށްފައިވާ ކަމަށް ފުލުހުން ވިދާޅުވިއެވެ.