ބޮކްސާ ތެރެއަށް ލައިގެން ޑްރަގް ފޮރުވި މީހެއްގެ މައްޗަށް ޑައިމޯފިން ޓްރެފިކް ކުރުމުގެ ދައުވާ ސާބިތުވެ އުމުރަށް ޖަލަށް ލުމާއެކު، 100،000 ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމް ކޮށްފިއެވެ.

އުމުރަށް ޖަލަށް ލުމަށް ހުކުމް ކޮށްފައި ވަނީ މާލެއަށް ނިސްބަތްވާ އަހްމަދު މިފްޒާލްގެ މައްޗަށެވެ.

އުމުރު ދުވަހުގެ ޖަލު ހުކުން ފިޔަވައި އެހެން އަދަބެއް ދިނުމުގެ އިޙްތިޔާރު ފަނޑިޔާރަށް ދީފައި ނުވިނަމަވެސް ޖޫރިމަނާކުރުމުގެ އިޙްތިޔާރު ވަނީ ދެއްވާފައެވެ. މި އިޙްތިޔާރުގެ ދަށުން ޤާޒީ ވަނީ މިފްޒާލް އެއްލައްކަ ރުފިޔާއިން ޖޫރިމަނާކޮށް، މި ފައިސާ 16 ސެޕްޓެމްބަރު 2024 ވަނަ ދުވަހުން ފެށިގެން 12 މަސްދުވަސްތެރޭ މީރާއަށް ދައްކާ ޚަލާސްކުރުމަށް އަމުރުކޮށްފައެވެ.

ދައުލަތުން އޭނާގެ މައްޗަށް ޑައިމޯފިން ޓްރެފިކް ކުރުމުގެ ދައުވާ ކޮށްފައިވާއިރު، އޭނާގެ މައްޗަށް މި ދައުވާ ކޮށްފައި ވަނީ 27 ޖޫން 2019 ވަނަ ދުވަހު މެންދުރުގެ ވަގުތެއްގައި އައްޑޫ ސިޓީ ފޭދޫއިން ޏ. ފުވައްމުލަކަށް ފުރާ ފެރީއިން މަސްތުވާތަކެތި ގެންދާ އުޅޭ ކަަމަށް ލިބުނު މައުލޫމާތަކާއި ގުޅިގެން ފުލުހުން ހިންގި އޮޕަރޭޝަނެއްގައި އޭނާ އަތުން ޑްރަގް ފެނިފައިވާތީއެވެ.

ދައުލަތުން މިފްޒާލްގެ މައްޗަށް ކުރި ދައުވާއަށް އޭނާ ވަނީ އިންކާރުކޮށްފައެވެ. އޭނާގެ ފަރާތުން ހުށަހެޅި ހުށަހެޅުމުގައި ބުނެފައިވަނީ ފުލުހުންނަށް ލިބިފައިވާ ޤާނޫނީ ބާރުގެ ބޭނުންކޮށްގެން ޤާނޫނާ ޚިލާފަށް ހޯދާފައިވާ ހެކީގެ މައްޗަށް ބިނާކޮށް ދައުލަތުން އޭނާގެ މައްޗަށް ދައުވާ ކުރަނީ ކަމަށެވެ.

ދައުލަތުން ހުށަހެޅި ހެކީގެ ތެރޭގައި މިފްޒާލު ހައްޔަރުކޮށް ސ. ފޭދޫ މެޖިސްޓްރޭޓް ކޯޓަށް ހާޒިރުކުރުމުން އެ މަޖިލީހުގައި އޭނާ ކުށަށް އިއުތިރާފްވެފައިވާ ބަޔާން ހިމެނެއެވެ.