ކީރިތި ޤުރުއާނުގެ ޢިލްމަށް ދަރިވަރުންގެ ހިތްތަކުގައި ލޯބިޖައްސުވައި، ޤުރުއާނުގެ ޢިލްމަށް ދަރިވަރުން ޝައުޤުވެރިކުރުވުމުގެ ގޮތުން، އެސްއެސްސީ އިމްތިހާނުގެ މާއްދާއެއްގެ ޤޮތުގައި ޤުރުއާން މާއްދާ ހިމެނުމަށް ނިންމައިފިއެވެ.

މިގޮތަށް ނިންމާފައިވާކަން ހާމަކުރެއްވީ ދިރާސީ އައު އަހަރުގެ ކިޔެވުން ފެށުމާ ގުޅިގެން ތަޢުލީމާބެހޭ ވަޒީރު ޑރ. އިސްމާޢީލް ޝަފީޢު ދެއްވި ޚިޠާބުގައެވެ.

ވަޒީރު ޑރ. އިސްމާޢީލް ޝަފީއު ވިދާޅުވީ ކީރިތި ޤުރުއާނުގެ ޢިލްމަށް ދަރިވަރުންގެ ހިތްތަކުގައި ލޯބިޖައްސުވައި، ޤުރުއާނުގެ ޢިލްމަށް ދަރިވަރުން ޝައުޤުވެރިކުރުވުމުގެ މަޤްޞަދުގައި، ޤައުމީ ފެންވަރުގައި ބާއްވާ އެސް،އެސް،ސީ އިމްތިހާނުގެ މާއްދާއެއްގެ ގޮތުގައި ޤުރުއާން މާއްދާ ހިމެނުމުގެ މަސައްކަތް މިއަހަރު ޕައިލެޓުކުރެވޭނެކަމަށެވެ. އަދި 2027 ވަނަ އަހަރުގެ ސާނަވީ އިމްތިހާނުގައި ޤުރުއާން މާއްދާ ރަސްމީކޮށް ހިމަނާ ރާއްޖޭގެ ދަރިވަރުންނަށް އެ އިމްތިހާނު ދިނުމަށް ހަމަޖެހިފައިވާކަމަށް ތަޢުލީމީ ވަޒީރު ވިދާޅުވިއެވެ.

ވަޒީރުގެ ވާހަކަފުޅުގައި ވަނީ މިފެށޭ ދިރާސީ އަހަރު އެންމެ ބޮޑު އިސްކަމެއް ދޭނީ ދަރިވަރުންގެ ކިބައިގައި ރިވެތި އަޚުލާޤު އަށަގެންނެވުމަށް ކަމަށް ވިދާޅުވެފައެވެ. ރާއްޖޭގެ ސްކޫލުތަކުގައި ތަޢުލީމު ހާސިލުކުރަމުންދާ ކޮންމެ ދަރިވަރަކީވެސް، ރިވެތި އާދަތަކާއި ސިފަތަކުން ޖަރީވެފައިވާ، އެކަކު އަނެކަކަށް އިހުތިރާމް ކުރާ ދަރިވަރުން ތަކަކަށް ހެދުމަށް، ތަރުބަވީ ހާއްސަ ޕްރޮގްރާމެއް، މިދިރާސީއަހަރުގެ ތެރޭގައި ފަށައިގެން ކުރިއަށް ގެންދާނެކަމަށްވެސް ވަޒީރު ވިދާޅުވިއެވެ.

ވަޒީރު ވިދާޅުވީ އާޓިފިޝިއަލް އިންޓަލިޖެންސް ގެ ބޭނުންތެރިކަން މަސައްކަތުގެ މާހައުލުގައި ބޮޑުވެފައިވާއިރު، މިފެށޭ ދިރާސީ އަހަރުވެގެންދާނީ، އޭއައިއަށް ސްކޫލުތަކުގެ މުދައްރިސުން އަހުލުވެރި ކުރުވުމުގެ ހާއްސަ ޕްރޮގްރާމްތަކެއް ކުރިއަށް ގެންދާނޭ އަހަރަކަށްކަމަށެވެ.

ވަޒީރުގެ ޚިޠާބުގައި ވަނީ ކޮންމެ ދަރިވަރަކީ އަމިއްލަ އުނގެނުމަށް ޒިންމާވާ ދަރިވަރަކަށް ވުމަށް ނަސޭހަތްތެރިވެ އިސްލާމް ދީނަށް ލޯބިކުރާ، މައިން ބަފައިންނަށް ކިޔަމަންތެރިވާ، އެކަކު އަނެކަކަށް އިހްތިރާމްކުރާ، އުނގެނުމަށް ލިބިފައިވާ ރަނުގެ ފުރުސަތުގެ ބޭނުން އެންމެ ހެޔޮގޮތުގައި ހިފުމަށް ނަސޭޙަތްތެރިވެފައެވެ. އަދި މުދައްރިސުންދެކެ ލޯބިވުމަށާއި މުދައްރިސުންނަށް އިހުތިރާމްކުރުމަށް ކެނޑިނޭޅި ދަރިވަރުންނަށް ވިސްނައިދީ އެކަން އެކުދިންގެ ކިބައިގައި އަށަގެންނެވުމަށް ބެލެނިވެރިންގެ ކިބައިން އެދިވަޑައިގަތެވެ.

Ad by Hajj Corporation

ވަޒީރުގެ ޚިޠާބުގައި މިއަހަރުގެ ކިޔެވުން ފަށާއިރު ދިވެހިރާއްޖޭގެ ރަސްމީ ތަޢުލީމީ ނިޒާމަށް އިންގިލާބީ ހެޔޮ ބަދަލުތަކެއް ގެނައުމުގެ ބޮޑެތި މަސައްކަތްތަކެއް ފެށިގެން ކުރިއަށް ދާކަން ފާހަގަކުރައްވާފައެވެ. އަދި ހަމައެހެންމެ މިއަހަރުގެ ތެރޭގައިވެސް، މުހިއްމު ބޮޑެތި މަސައްކަތްތަކެއް ފަށައިގެން ކުރިއަށް ގެންދިޔުމަށް ރާވާފައިވާކަމަށް ވިދާޅުވިއެވެ. އޭގެ ތެރެއިން އެއްކަމެއްގެ ގޮތުގައި ވަޒީރު ފާހަގަކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅާއި އެއްގޮތަށް، ދިވެހިރާއްޖޭގެ ފިސްކަލް އަހަރާ ދިރާސީ އަހަރު ދިމާކުރެވި، ޖެނުއަރީ މަހު ފަށާގޮތަށް ދިރާސީ އަހަރަށް ގެނެވުނު ބަދަލާއެކު މިއަދު ކިޔެވުން ފެށުމެވެ.