ޝަހީދު ޢަލީ ސްކޫލަކީ، ހުޅުމާލޭ ދެވަނަ ފިޔަވަހީގައި ޤާއިމުކުރެވިގެންދިޔަ ސްކޫލެއް ނަމަވެސް، އެސްކޫލުގެ 77% ހިއްސާކުރަނީ ރާއްޖޭގެ އެކި ރަށްތަކުގެ ދަރިވަރުން ކަމަށާއި، މިއީ މުޅި ރާއްޖެ ޝާމިލުވާ ގޮތަށް އޮންނާނެ ސްކޫލެއް ކަމަށް ތަޢުލީމާބެހޭ ވަޒީރު، ޑރ. އިސްމާޢީލް ޝަފީޢު ވިދާޅުވެއްޖެއެވެ.

ދިރާސީ އައު އަހަރު ފެށުމާއެކު، ހުޅުމާލޭ ދެވަނަ ފިޔަވަހީގައި އަލަށް ހުޅުވިގެންދިޔަ ޝަހީދު ޢަލީ ސްކޫލް ހުޅުވުމަށް ބޭއްވި ޚާއްޞަ އެސެމްބްލީގައި ވާހަކަދައްކަވަމުން ވަޒީރު ވިދާޅުވީ، މި ސްކޫލްގެ ކިޔެވުން ފެށިގެންދަނީ 2000 އަށްވުރެ ގިނަ ދަރިވަރުންނާއެކު ކަމަށެވެ. ވަޒީރު ފާހަގަކުރެއްވި ގޮތުގައި އިއްޔެ ފުރަތަމަ ތިބީ 1950 އެއްހައި ދަރިވަރުން ނަމަވެސް އިއްޔެ ނިމުނުއިރު އެޢަދަދު ވަނީ 2100 ދަރިވަރުން ހަމަވާން ކައިރިވެފައި ކަމަށެވެ.

Ad by Hajj Corporation

މި ދަރިވަރުންގެ ތެރެއިން 77% އިންސައްތަ ދަރިވަރުން ނިޞްބަތްވަނީ ރާއްޖޭގެ އެކި ރަށްތަކަށްކަން ވަޒީރު ފާހަގަކުރެއްވިއެވެ.

ހަމަ މިއާއެކު، ރައީސް، އަޅުގަނޑު ފާހަގަކޮށްލަން އިނގޭތޯ މި ފުރުސަތުގަ، ސްކޫލުގަ މިހާރު 2000 އަށްވުރެ ގިނަ ކުދިން އެންރޯލްވެއްޖެ. އިއްޔެ އަޅުގަނޑުމެންނަށް ތިބީ 1950 ވަރަކަށް ދަރިވަރުން. އެހެން ނަމަވެސް އިއްޔެ ނިމުގެންދިޔަ އިރުގަ 2100 އާ ކައިރިވެއްޖެ. އެ 2100 ދަރިވަރުންގެ ތެރެއިން 77% ދަރިވަރުންނަކީ އަތޮޅުތެރޭގެ ރަށްތަކަށް ނިސްބަތްވާ ދަރިވަރުން. އެހެންވީމަ އަޅުގަނޑު ދަންނަވާލަން ބޭނުންވަނީ މާލޭގަ މި ސްކޫލް ގާއިމްވެފައި ހުއްޓަސް ހުޅުމާލޭގެ ދެވަނަ ފިޔަވަހީގެ މިތަނުގައި މިސްކޫލް ހުރިކަމުގައި ވިޔަސްމެ، މިސްކޫލަކީ މުޅި ދިވެހިރާއްޖޭގެ ހުރިހާ ރަށްތައް ޝާމިލުކުރާ ސްކޫލެއްގެ ގޮތުގައޭ އޮންނާނީ

އެހެންކަމުން، ޝަހީދު ޢަލީ ސްކޫލް ވެގެންދާނީ، ރާއްޖޭގެ ހުރިހާ ރަށްތަކަކާއި އަތޮޅުތަކެއް މިސްކޫލުގެ ތެރެއިން ޝާމިލުވެގެންދާ ސްކޫލަކަށް ކަމަށް ވަޒީރު ވިދާޅުވިއެވެ.

މީގެ އިތުރަށް ވަޒީރު ވިދާޅުވީ މިސްކޫލް ނިޞްބަތްކުރެވިފައިވަނީ، އަޅުގަނޑުމެން އެންމެން އެބޭފުޅަކަށްޓަކައި ފަޚުރުވެރިވާ ޝަހީދު ޢަލީ ރަސްގެފާނަށް ކަމަށާއި، މިކަމުގެ ބޭނުމަކީ ދަރިވަރުންގެ ހިތުގައި ޤައުމީ އަބްޠާލުންގެ ޛިކުރާ އާލާވުމާއި އެ ޤައުމީ އަބްޠާލުންގެ ހިތްވަރުން، ހިތްވަރު ލިބިގަނެ ޤައުމައިގެން ކުރިއަށްދިއުމުގެ ރޫޙު އެކުދިންގެ ކިބައިގައި އަށަގެންނެވުން ކަމަށެވެ.

ސްކޫލްގެ މޮޓޯ ކަމަށްވާ، "ކިޔަވާނީ ހިތްވަރާއެކު، އިސްނަގާނީ ރިވެތި އަޚްލާޤާއެކު" ގެ ދަށުން ކުދިން ތަރުބިއްޔަތު ކުރެވިއްޖެނަމަ، ޢަލީ ރަސްގެފާނުގެ ނަމޫނާއިން ނަމޫނާލިބި، އެމަނިކުފާނުގެ ހިތްވަރުފުޅުން ހިތްވަރުލިބިގަނެ، ހިތްވަރާއި ޙިކުމަތާއެކު ރިވެތި އަޚްލާޤާއެކު ޤައުމައިގެން ކުރިއަށްދާނެ ޖީލެއް ބިނާކުރެވިގެންދާނެ ކަމަށެވެ.

ޝަހީދު ޢަލީ ސްކޫލް ހުޅުވިގެންދިޔައިރު، މިސްކޫލްގައި މަލްޓިޕަރޕަސް ހޯލަކާއި، ޒަމާނީ ވަޞީލަތްތަކުގެ އިތުރުން ޓަރފް ދަނޑަކާއި އިންޑޯ ކުޅިވަރުތައް ކުޅޭވޭނެ އިންތިޒާމުތައް ހަމަޖައްސާފައި ވެއެވެ. މި ސްކޫލަކީ ،500 ކުދިންގެ ޖާގައިގެ ސްކޫލެއްނަމަވެސް ދެ ދަންފަޅިއަށް ކިޔަވައިދޭނަމަ 2500 ކުދިންނަށް ކިޔަވައިދެވޭނޭކަމަށް ތަޢުލީމާބެހޭ ވުޒާރާއިން ބުނެއެވެ.

ގްރޭޑް 1-10 އާ ހަމައަށް ކިޔަވައިދޭން ނިންމާފައިވާ ޝަހީދު އަލީ ސްކޫލުގައި 32 ކުދިންގެ ޖާގައިގެ 54 ކްލާސްރޫމްގެ އިތުރުން 400 ކުދިންގެ އޮޑިޓޯރިއަމަކާއި ލައިބްރަރީ އާއި ކޮމްޕިއުޓަރ ލެބާއި 3 ސައިންސް ލެބާއި އިންޑޯ ހޯލަކާއި ބޭރުގައިކުޅިވަރު ކުޅޭވޭނެ އިންތިޒާމުވެސް ހަމަޖައްސާފައިވެއެވެ.

ޝަހީދު ޢަލީ ސްކޫލަކީ، ހުޅުމާލެ ދެވަނަ ފިޔަވަހީގައި ތަރައްޤީ ކުރާ ދާއިމީ ދެވަނަ ސުކޫލެވެ. ދެވަނަ ފިޔަވަހީގައި ހުޅުވި ފުރަތަމަ ސްކޫލަކީ، ޞަލާޙުއްދީން ސްކޫލެވެ.