ފަރުޟު ފަސް ނަމާދުކުރުމަށް ރާއްޖޭގެ ހުރިހާ ދަރިވަރުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިލްތިމާސްކުރައްވައިފިއެވެ.

އެމަނިކުފާނު މިފަދައިން އިލްތިމާސްކުރެއްވީ ހުޅުމާލޭގެ ފޭސް 2 ގައި މިއަދު އަލަށް ހުޅުވި "ޝަހީދު ޢަލީ ސްކޫލް" ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

Ad by Hajj Corporation

ރައީސް ވަނީ ވަގުތުން ވަގުތަށް ނަމާދުކުރުމަށާއި ފަތިސްނަމާދުކޮށްގެން ދުވަސް ފެށުމަށް ހުރިހާކުދިންވެސް އަޒުމް ކަނޑައެޅުމަށް އިލްތިމާސްކުރެއްވިއެވެ. އަދި މިކަމަކީ މައިންބައިފައިންގެ ޒިންމާއެއްގެ ގޮތުގައި ކަނޑައަޅައި އެކަން ކަށަވަރުކުރެއްވުމަށް މައިންބަފައިންގެ ކިބައިން ވެސް އެދިވަޑައިގެންނެވިއެވެ.

މީގެއިތުރުން ރައީސުލްޖުމްހޫރިއްޔާ ވިދާޅުވީ ކޮންމެ ކުއްޖަކީވެސް މާތްވެގެންވާ އިސްލާމް ދީނުގައި ފައިތިލަ ސާބިތުކޮށްގެން ތިބި މުސްލިމުންނަށްވާއިރު، އަޅުގަނޑުމެންވާންޖެހޭނީ އަބަދުވެސް އެކަން ހަދާންކޮށް އިސްލާމްދީނުގައި ކަނޑައަޅާފައިވާގޮތަށް ކަންކަން ތަރުތީބުކޮށް ހަޔާތުގައި ކޮންމެދުވަހެއްވެސް އެގޮތުގައި ހޭދަކުރާ ބަޔަކަށްކަމަށެވެ.

އެގޮތުން ނަމާދަށް ފަރުވާތެރިކަން އަދާކޮށް މައިންބަފައިންނަށް ކިޔަމަންތެރިވެ ޓީޗަރުންނާއި ސްކޫލްތަކުގެ ވެރިން އަންގާމަގުން ތައުލީމީ ހަޔާތުގައި ކަންކަންކުރަންވާނެކަމަށް ވިދާޅުވިއެވެ. އޭރުން ކުދިންގެ މުސްތަޤުބަލަށް އެޅިގެންދަނީ ގުޑުވާނުލެވޭ ވަރުގެ ވަރުގަދަ ބިންގަލެއް ކަމަށާއި ރެނދުއަޅުވާ ނުލެވޭވަރުގެ ވަރުގަދަ ފައުންޑޭޝަނެއް ކަމުގައި ވެސް ވިދާޅުވިއެވެ.

ރައީސް އިތުރަށް ވިދާޅުވީ އަލިރަސްގެފާނު މިޤައުމުގެ މިނިވަންކަން ހިމާޔަތްކުރުމަށް ކުރެއްވި ޖިހާދަށް ނިސްބަތްކޮށް މި ސްކޫލަށް ނަންދެވިފައިމިވަނީ ޤައުމުގެ މުސްތަޤްބަލް ބިނާކުރުމުގައި ސަރުކާރުން ގެންގުޅޭ ސިޔާސަތު ކުރިއަށް ގެންދިއުމުގެ ބޭނުމުގައި ތުއްތު ކުދިންނާއި، ޒުވާނުންގެ ހިތުގައި ޤައުމީ ލޯބި އަށަގަންނުވައި ބިންވަޅު ނެގުމަށްޓަކައި ކުރެވޭ މަސައްކަތަށް ހިތްވަރުދިނުމުގެ ގޮތުންކަމަށެވެ.

ހަމަމިއާއެކު ސްކޫލް ނިސްބަތްވެގެންވާ އަލިރަސްގެފާނުގެ ޖިހާދާއި، އަލިރަސްގެފާނު އެދުވަހު އެކަންތައްތައް ކުރެއްވި ގޮތާއި މިކަންކަމުން ދަރިވަރުން އިބްރަތް ހާސިލްކޮށް ޤައުމީ ލޯބި ކޮންމެ ކުއްޖެއްގެވެސް ހިތުގައި ބިންވަޅުނަގައި ޤައުމަށްޓަކައި ތިމަންނަށް ކޮށްދެވޭނީ ކޮންކަމެއްތޯ އަބަދުވެސް ވިސްނާ، އެގޮތުގެ މަތިން މަސައްކަތްކުރުމަށް ހިތްވަރުކޮށް އެގޮތުގައި ކުރިއަށް ދިއުމަށް ހުރިހާ ކުދިން މަސައްކަތްކުރުމަށް ވެސް އެމަނިކުފާނު ވަނީ އެދިވަޑައިގެންފައެވެ.

މި ސްކޫލު ރަސްމީކޮށް ހުޅުވުމަށްޓަކައި ބޭއްވި ހާއްސަ ރަސްމިއްޔާތުގައި، ތަޢުލީމީ ވަޒީރު ޑރ. އިސްމާޢީލް ޝަފީޢު ބައިވެރިވެވަޑައިގެންނެވިއެވެ. މި ރަސްމިއްޔާތުގެ ތެރެއިންވަނީ ރައީސުލްޖުމްހޫރިއްޔާއަށް ހަނދާނީ ހަދިޔާއެއް އަރުވާފައެވެ. އަދި ސްކޫލް ރަސްމީކޮށް ހުޅުވުމުގެ ގޮތުން، ސްކޫލްގެ ލޯގޯ އިފްތިތާޙްކޮށްފައިވެއެވެ.

ޝަހީދު ޢަލީ ސްކޫލުގެ މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފަށްޓަވައިދެއްވީ 2023 ވަނަ އަހަރުގެ ޑިސެންބަރު މަހުގައެވެ. އަދި 2 އަހަރުގެ ތެރޭގައި ސްކޫލްގެ މަސައްކަތް ނިންމާ މިހާރުވަނީ ކިޔަވައިދޭން ފަށާފައެވެ. މި މަސައްކަތް ކުރިއަށްގެންދިޔައީ އާރްސީސީއާ ހަވާލުކޮށްގެންނެވެ. މިސްކޫލްގައި މަލްޓިޕާޕަސް ހޯލަކާއި، ޒަމާނީ ވަޞީލަތްތަކުގެ އިތުރުން ޓާފްދަނޑަކާއި އިންޑޯ ކުޅިވަރުތައް ކުޅޭވޭނެ އިންތިޒާމްތައް ހަމަޖައްސާފައިވެއެވެ. މި ސްކޫލަކީ 1،500 ކުދިންގެ ޖާގައިގެ ސްކޫލެއްނަމަވެސް ދެ ދަންފަޅިއަށް ކިޔަވައިދޭނަމަ 2500 ކުދިންނަށް ކިޔަވައިދެވޭނޭކަމަށް ތަޢުލީމީ ވުޒާރާއިން ވިދާޅުވެއެވެ.

ގްރޭޑް 1-10 އާ ހަމައަށް ކިޔަވައިދޭން ނިންމާފައިވާ ޝަހީދު އަލީ ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެއެވެ. އަދި 400 ކުދިންގެ އޮޑިޓޯރިއަމަކާއި ލައިބްރަރީ އާއި ކޮމްޕިއުޓަރު ލެބާއި 3 ސައިންސް ލެބާއި އިންޑޯ ހޯލަކާއި ބޭރުގައިވެސް ކުޅިވަރު ކުޅޭވޭނެ އިންތިޒާމް ހަމަޖައްސާފައިވެއެވެ.

ޝަހީދު ޢަލީ ސްކޫލަކީ، ހުޅުމާލެ ދެވަނަ ފިޔަވަހީގައި ތަރައްޤީ ކުރާ ދާއިމީ 2 ވަނަ ސުކޫލެވެ. ދެވަނަ ފިޔަވަހީގައި ހުޅުވި ފުރަތަމަ ސްކޫލަކީ، ޞަލާޙުއްދީން ސްކޫލެވެ.