ކުރިއަށް އޮތް ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްޤީއަށް މަަސައްކަތްކުރާ ކޮމިޓީތަކުގެ އިންތިޚާބަށް ކުރިމަތިލާން ފޯމު ހުށަހަޅަން ކޮންމެ ދުވަހަށް ދޭ ވަގުތު އިލެކްޝަންސް ކޮމިޝަން (އީސީ)އިން އިތުރުކޮށްފިއެވެ.

ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްޤީއަށް މަަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރަން ފޯމު ހުށަހަޅަން މިމަހުގެ 17 އިން އަންނަ މަހުގެ ފުރަތަމަ ދުވަހާ ހަމައަށް ހުޅުވާލިއިރު ހުކުރު ދުވަސް ފިޔަވައި އެހެން ދުވަސްތަކުގައި ފޯމު ހުށަހެޅުމުގެ ވަގުތަކީ ހެނދުނު 8:30  އިން މެންދުރު ފަހު 3:30 އަށެވެ. އަދި ހުކުރު ދުވަހު މެންދުރުފަހު 3:30 އިން 5:30 އަށެވެ.

Ad by Hajj Corporation

އިލެކްޝަންސް ކޮމިޝަނުން ބުނީ އޭގެ ބަދަލުގައި މިހާރު ކޮންމެ ދުވަހަކު ވެސް ފޯމު ހުށަހަޅަން ދެގަޑިއިރު އިތުރަަށް ލިބޭނެ ކަމަށެވެ. އެހެންވެ، ފޯމު ހުށަހެޅުމުގެ ވަގުތަކީ މިހާރު ހުކުރު ދުވަސް ފިޔަވައި އެހެން ދުވަސްތަކުގައި ހެނދުނު 8:30 އިން ހަވީރު 5:30 އަށެވެ. އަދި ހުކުރު ދުވަހު މެންދުރުފަހު 3:30 އިން ރޭގަނޑު 8:00 އަށް ކަމަށް އެ ކޮމިޝަނުން ބުންޏެވެ.

ފޯމު ހުށަހަޅަން ކޮންމެ ދުވަހަކު އޮންނަ ވަގުތު އެ ކޮމިޝަނުން އިތުރުކުރީ މުއްދަތު ހަމަވާން ހަތަރު ދުވަހަށް ވެފައި ވަނިކޮށެވެ. އިލެކްޝަން ކޮމިޝަނުން އެގޮތަށް ނިންމިއިރު، އިދިކޮޅު އެމްޑީޕީން ވަނީ ފޯމު ހުށަހެޅުމުގެ މުއްދަތު އިތުރުކޮށްދޭން އެދިފައެވެ.

އެމްޑީޕީން ބުނީ ލޯކަލް ކައުންސިލް އިންތިހާބަށް އިލެކްޝަން ކޮމިޝަނުން ހުޅުވާލިއިރު، އެކަމަށް އެހެން އިދާރާތަކުން ތައްޔާރުވެފައި ނެތް ކަމަށެވެ. 

އިލެކްޝަން ކޮމިޝަނުން އިންތިހާބަށް ކުރިމަތިލާން ދީފައިވަނީ ވަރަށް ކުރު މުއްދަތެއް ކަމަށްވާތީ ބޮޑެތި ދަތިތަކާ ކުރިމަތިވަމުންދާ ކަމަށް ބުނެ، އެމްޑީޕީން ވަނީ ކަންބޮޑުވުން ފާޅުކޮށްފައެވެ. އަދި ދައުލަތުގެ އިދާރާތަކުން ރެކޯޑް ސާފު ކުރުމާއި އެހެނިހެން ކަންކަން ފުރިހަމަ ކުރުމަށް އެތައް ދުވަހެއް ހޭދަވާތީ އެއީ ފޯމު ހުށަހެޅުމަށް އެކަށީގެންވާ މުއްދަތެއް ނޫން ކަމަށް ވެސް އެ ޕާޓީން ބުންޏެވެ.

=އެ ޕާޓީގެ ކެމްޕެއިން މެނޭޖަރު އަބްދުﷲ ވަހީދު ވިދާޅުވީ ކުށުގެ ރެކޯޑް ސާފު ކުރުމުގައި ހާއްސަކޮށް ކަރެކްޝަނަލް ސާވިސް އާއި ޖުޑީޝަލް އެޑްމިނިސްޓްރޭޝަނުން އިންތިހާއަށް ލަސްވަމުންދާ ކަމަށާއި އެ ތަންތަނުން އިންތިހާބަށް ވާންޖެހޭ ތައްޔާރީތައް ވެފައި ނެތް ކަމަށެވެ. 

އެއިން ކޮންމެ ތަނަކަށް ފޯމު ހުށަހަޅައިގެން، ކުށުގެ ރެކޯޑް ސާފުކުރަން ތިން ދުވަސް ނޫނީ ފަސް ދުވަސް ހޭދަވާ ކަމަށް ވަހީދު ވިދާޅުވިއެވެ. އިންތިހާބަށް ކުރިމަތިލާން ވެސް 16 ވަރަކަށް ދުވަސް ލިބިފައިވާއިރު، ކުށުގެ ރެކޯޑް ސާފުކުރަން އެހާ ގިނަ ދުވަސް ނެގުމަކީ ވަރަށް ބޮޑަށް ދަތިވާ ކަމެއް ކަމަށް ވެސް ވިދާޅުވިއެވެ.