މިދިޔަ އަހަރުގެ ޖުލައި މަހުގެ 23 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނ. ވެލިދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި އެމަނިކުފާނެ ވަޢުދުވެވަޑައިގެން ގޮތަށް، ނ. ވެލިދޫގައި ސީ އެމްބިއުލާންސްގެ ޚިދުމަތް ފަށައިފިއެވެ.

ނ.އަތޮޅުގައި މިހާރު ސީ އެމްބިއުލާންސް ޚިދުމަތް ދެނީ، ނ. މަނަދޫގައި އޮތް ސީ އެމްބިއުލާންސްއި އެކަންޏެވެ. އެ އެމްބިއުލާންސްއިން ބައެއް ޙާލަތްތަކުގައި މާލެއަށްވެސް ބަލި މީހުން އުފުލަން ޖެހޭތީ ދަތިތަކާ ކުރިމަތިލާންޖެހޭތަން އާދެއެވެ. ނަމަވެސް ވެލިދޫގައި ސީ އެމްބިއުލާންސްގެ ޚިދުމަތް ފެށުމާއެކު، އަތޮޅު ތެރޭގައި ބަލި މީހުން އުފުލުމުގައި މިހާރު ދިމާވާ ދަތިތަކަށް ވަރަށް ބޮޑު ޙައްލެއް ލިބިގެންދާނެ ކަމަށް ދިފާޢީ ވުޒާރާއިން ބުނެއެވެ.

Ad by Hajj Corporation

މީގެ އިތުރުން، ނ. އަތޮޅަކީ ފަތުރުވެރިކަމުގެ ސިނާޢަތް ވަރަށް ބޮޑަށް ކުރިއަރާފައިވާ އަތޮޅެއްކަމުން، އެސަރަހައްދުގައި ވަކިން ޚާއްޞަކޮށް ވެލިދޫގައި ސީ އެމްބިއުލާންސްގެ ޚިދުމަތް ޤާއިމްވެގެން ދިއުމަކީ އެ އަތޮޅުގައި ދޭ ޞިއްޙީ ޚިދުމަތްތައް އިތުރަށް ހަރުދަނާވެ، ފަތުރުވެރިކަމާ އެހެނިހެން އިޤްތިސާދީ ތަރައްޤީތައް ގެނައުމަށް ލިބިގެންދާނެ ވަރަށް ބޮޑުފަސޭހައަކަށް ވާނެއެވެ.

ވެލިދޫގައި ސީ އެމްބިއުލާންސްގެ ޚިދުމަތް ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން ދިފާއީ ވަޒީރުގެ ނައިބު ފާޠިމަތު މިޒުނާ ޢަލީ ވިދާޅުވީ، ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ވެލިދޫގައި މި ޚިދުމަތް ޤާއިމްކުރުމަށްޓަކައި ވަގުތުން މަސައްކަތް ފައްޓަވާ، އެވުޒާރާއަށް ބޭނުންވާ އެހީތެރިކަން ރައީސް ފުރިހަމައަށް ދެއްވިކަމަށެވެ. އަދި ވެލިދޫއަކީ ފަތުރުވެރިކަމުގައި ކުރިއަރާފައިވާ ރަށަކަށް ވުމުން ސީ އެމްބިއުލާންގެ ޚިދުމަތް ޤާއިމްވެގެންދިއުމަކީ ޞިއްޙީ ދާއިރާގެ އިތުރަށް އެ ސަރަޙައްދުގެ އިޤްތިޞާދީ މަސައްކަތްތަކަށްވެސް ވަރުގަދަ އައްޑަނައަކަށް ވާނެ ކަމަށްވެސް ދިފާޢީ ވަޒީރުގެ ނާއިބު ވިދާޅުވިއެވެ. މިޒުނާ ވިދާޅުވީ، ސިއްޙީ ރައްކާތެރިކަމާއި އަވަސް ފަރުވާގެ ނިޒާމެއް އޮތުމަކީ ވިޔަފާރިވެރިންނަށް އިންވެސްޓަރުންގެ މެދުގައި އިތުބާރު ބޮޑުވެ، އެތައް ބަޔަކަށް ލިބޭނެ ބޮޑު ހިތްހަމަޖެހުމެއް ކަމަށެވެ.

ދިފާޢީ ވުޒާރާއިން ބުނި ގޮތުގައި މިއަހަރުގެ ތެރޭގައި ދިވެހި ދައުލަތުން ޚަރަދު ކޮށްގެން މުޅިން އައު 9 ސީއެމްއެމްބިއުލާންސްހޯދާ، އަތޮޅުތެރޭގެ 9 ރަށެއްގައި މުޅިން އަލަށް ސީއެމްބިއުލާންސްގެ ޚިދުމަތް ޤާއިމްކުރުމަށް ހަމަޖެހިފައިވާ ކަމަށެވެ. އަދި މިހާރު ޚިދުމަތް މެދުކެނޑިފައިވާ 3 ރަށެއްގައި އަލުން ސީއެމްބިއުލާންސްގެ ޚިދުމަށް ފަށާނެ ކަމަށެވެ. އެ ވުޒާރާއިން ވިދާޅުވީ، އަލަށް ސީއެމްބިއުލާންގެ ޚިދުމަތް ފޯރުކޮށްދޭން ފެށުމުގެ އިތުރުން މިހާރު ބޭނުންކުރާ ސީއެމްބިއުލާންސް ފްލީޓް އަޕްގްރޭޑް ކުރުމުގެ މަސައްކަތްތައްވެސް ކުރަމުންދާ ކަމަށެވެ.