ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށް ބާއްވާގޮތަށް ޤާނޫނުއަސާސީއަށް ހުށަހަޅާފައިވާ އިސްލާހާ ގުޅޭގޮތުން ސިޔާސީ ޕާޓީތަކުގެ ޚިޔާލު ހޯދުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމައިފިއެވެ.

ދެ އިންތިޚާބު އެކުގައި ބޭއްވުމަށް، ރައްޔިތުންގެ މަޖިލީހުގެ ދައުރުގެ މުއްދަތަށް ބަދަލު ގެނައުމުގެ ބިލެއް ރައްޔިތުންގެ މަޖިލީހަށް ހުށަހަޅާފައިވަނީ މިމަހުގެ 6 ވަނަ ދުވަހުއެވެ. އަދި މި ބިލު ސަރުކާރުގެ ފަރާތުން މަޖިލީހަށް ހުށަހެޅުއްވީ، އިނގުރައިދޫ ދާއިރާގެ މެންބަރު އަދި މަޖިލީހުގެ މެޖޯރިޓީ ޕާލިމެންޓަރީ ލީޑަރު، އިބްރާހީމް ފަލާޙެވެ.

މި ބިލާ ގުޅޭގޮތުން މަޝްވަރާކުރުމަށް މަޖިލީހުގެ މިނިވަން މުއައްސަސާތަކުގެ ކޮމިޓީގެ ބައްދަލުވުމެއް މިއަދު ބާއްވާފައި ވެއެވެ. މި ބައްދަލުވުމުގައި ވާހަކަދައްކަވަމުން ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާޢު ވިދާޅުވީ، ރާއްޖޭގައި މަލްޓި-ޕާޓީ ނިޒާމެއް އޮތުމާއެކު، އިންތިޚާބުތަކަށް ބޮޑު ބަދަލެއް ގެންނައިރު ޕާޓީތަކުގެ ބަސް ހޯދުން މުހިންމު ކަމަށެވެ.

ޝުޖާއު ވިދާޅުވީ، އިންތިޚާބުތައް ބޭއްވުމުގެ ޤާނޫނީ ޒިންމާ އުފުލަނީ އިލެކްޝަންސް ކޮމިޝަނުން ކަމަށްވާތީ، ޤާނޫނީ ގޮތުން ހުރި ކަންކަމާ މަޝްވަރާކުރަން ބޭނުންވާ ކަމަށާއި އެގޮތުން މި ބިލާ ގުޅޭގޮތުން ސިޔާސީ ޕާޓީތަކާއި، އިލެކްޝަންސް ކޮމިޝަނުގެ އިތުރުން، ބަންޑާރަ ނައިބުގެ އޮފީހުގެ ބޭފުޅުންނާ އަންނަ ހޯމަ ދުވަހު ބައްދަލުކުރުމަށް ބޭނުންވާ ކަމަށް ޝުޖާޢު ވިދާޅުވިއެވެ.

ޝުޖާޢުގެ މި ހުށަހެޅުން ކޮމިޓީން ފާސްކުރީ ބައިވެރިވި މެންބަރުންގެ އިއްތިފާގުންނެވެ.

މި ބިލަށް ޚިޔާލު ހޯދުމަށް ހުޅުވާލި ފުރުޞަތުގައި އާންމުންގެ ފަރާތުން ވަރަށް ގިނަ ޚިޔާލުތަކެއް ލިބިފައިވާ ކަމަށް، ކޮމިޓީގައި ވާހަކަދައްކަވަމުން ކޮމިޓީގެ މުގައްރިރު، މާފުށީ ދާއިރާގެ މެންބަރު ޙުސައިން ރިޟާ އާދަމް ވިދާޅުވިއެވެ. އެހެންކަމުން އަންނަ ހޯމަ ދުވަހު ބާއްވާ ބައްދަލުވުންތަކަށްފަހު، މި އިސްލާހާ މެދު ކޮމިޓީން ވަކި ގޮތެއް ނިންމާނެ ކަމަށް ބެލެވެއެވެ.

Ad by Hajj Corporation

ބިލުގައިވާ ގޮތުން މަޖިލީހުގެ އިންތިޚާބު ކުރިއަށް އޮތްތަނުގައި ބާއްވާނީ، ޤާނޫނު އަސާސީގެ 110 ވަނަ މާއްދާގެ ދަށުން ރައީސުލްޖުމްހޫރިއްޔާއަކު ހޮވުމަށް ބާއްވާ އިންތިޚާބާ އެކުގައެވެ. އަދި މަޖިލީހުގެ އުމުރަކީ، ޑިސެމްބަރު މަހުގެ 1 ވަނަ ދުވަހުން ފެށިގެން 5 އަހަރު ދުވަހުގެ މުއްދަތެއް ކަމަށާއި، އެ މުއްދަތު ހަމަވުމުން މަޖިލިސް އުވޭނެ ކަމަށް ބިލުގައި ބަޔާންކޮށްފައިވެއެވެ.

ރިޔާސީ އިންތިޚާބާއި މަޖިލިސް އިންތިޚާބު އެކުގައި ބޭއްވުމަކީ، ގިނަ ރައްޔިތުންތަކެއް އެދެމުން އައި ކަމެކެވެ. ދެ އިންތިޚާބު އެއްކުރުމުގެ ސަބަބުން ވޯޓުލާ މީހުންގެ އަދަދު އިތުރުވެ، އިންތިޚާބުތަކަށް ހޭދަ ކުރަންޖެހޭ ޚަރަދު ކުޑަވެގެންދާނެ ކަމަށް ސަރުކާރުން ޤަބޫލުކުރެއެވެ.

ދެ އިންތިޚާބުގެ ދޭތެރޭގައި ހޭދަވާ ކުރު މުއްދަތުގެ ސަބަބުން ދައުލަތުން ކުރަންޖެހޭ ޚަރަދު ބޮޑުވުމުގެ އިތުރުން، އިލެކްޝަންސް ކޮމިޝަނުގެ މުވައްޒަފުންނާއި، ސިޔާސީ ޕާޓީތަކާއި، ކެންޑިޑޭޓުން އަދި ވޯޓުލާ މީހުންނަށްވެސް ބުރައަކަށް ވެގެންދާ ކަމަށް އިލެކްޝަންސް ކޮމިޝަނުންވެސް ފާހަގަކޮށްފައިވެއެވެ. އެހެންކަމުން ދެ އިންތިޚާބު އެކުގައި ބޭއްވުމަށް ކުރީގެ ސަރުކާރުތަކަށްވެސް ޚިޔާލު ހުށަހެޅި ކަމަށް މީގެކުރިން އިލެކްޝަންސް ކޮމިޝަނުން ހާމަކޮށްފައިވެއެވެ.