އާސެނަލްގެ ޔޫކްރޭން ޑިފެންޑަރު އޮލެކްސެންޑަރ ޒިންޗެންކޯ 1.5 މިލިއަން ޔޫރޯގެ ފީއަކަށް ނެދަލޭންޑްސްގެ އަޔެކްސްއަށް ބަދަލުވުމަށް އެއްބަސްވެއްޖެއެވެ. މި ނިންމުން އައިސްފައިވަނީ ނޮޓިންހަމް ފޮރެސްޓަށް ލޯނު އުސޫލުން ބަދަލުވެ، އެ ކްލަބުގައި އެދެވޭ ކުޅުމެއް ނުދެއްކި އުޅުމަށްފަހުގައެވެ.

ޓްރާންސްފާ ޚަބަރުތައް ގެނެސްދޭ މަޝްހޫރު ނޫސްވެރިޔާ ފެބްރީޒިއޯ ރޮމާނޯ ރިޕޯޓްކުރާ ގޮތުގައި، ޒިންޗެންކޯ މިއަދު (ހުކުރު ދުވަހު) ނެދަލޭންޑްސްއަށް ދަތުރުކުރާނީ ޓްރާންސްފާގެ ކަންކަން ފުރިހަމަކުރުމަށެވެ. މި ޑީލްގެ ދަށުން އާސެނަލްއަށް 1.5 މިލިއަން ޔޫރޯ ލިބޭއިރު، މީގެ އިތުރުން އަޔެކްސް ޗެމްޕިއަންސް ލީގަށް ކޮލިފައިވެއްޖެނަމަ ލިބޭނެ އިތުރު 'އެޑް-އޮންސް' ތަކެއްވެސް ހިމެނެއެވެ.

Ad by Hajj Corporation

ޒިންޗެންކޯ އާސެނަލްއާ ގުޅުނީ 2022 ވަނަ އަހަރު މެންޗެސްޓަރ ސިޓީން 35 މިލިއަން ޔޫރޯގެ އަގަކަށެވެ. އޭނާއަކީ ކޯޗު މިކޭލް އާޓެޓާގެ ޓެކްޓިކަލް ޕްލޭނުގައި މުހިންމު ދައުރެއް އަދާކުރި ކުޅުންތެރިއެކެވެ. ނަމަވެސް، ފަހަކަށް އައިސް ކުރިމަތިވި އަނިޔާގެ މައްސަލަތަކުގެ ސަބަބުން އޭނާގެ ކުޅުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.

އާސެނަލްގައި ހޭދަކުރި މުއްދަތުގައި ޒިންޗެންކޯ ވަނީ ޖުމްލަ 91 މެޗު ކުޅެދީ، 3 ލަނޑު ޖަހައި 5 އެސިސްޓް ފޯރުކޮށްދީފައެވެ. އޭނާގެ އަގު މިހާ ބޮޑަށް ދަށްވެފައިވަނީ އާސެނަލްއާއެކު އޭނާ ހަދާފައިވާ ކޮންޓްރެކްޓް މި އަންނަ ހޫނު މޫސުމުގައި ހަމަވާތީއެވެ. އެހެންކަމުން، އާސެނަލްއިން ބޭނުންވީ ހިލޭ ކުޅުންތެރިއަކު ދޫކޮށްލުމުގެ ބަދަލުގައި، އޭނާގެ މުސާރަ ކްލަބުގެ ބަޖެޓުން އުނިކޮށް ކޮންމެވެސް ވަރެއްގެ ފައިދާއެއް ހޯދުމަށެވެ.

ފޮރެސްޓްގެ މެނޭޖަރު ޝޯން ޑައިޗް، ޒިންޗެންކޯއަށް އެ ކްލަބުގައި ކުރިމަގެއް ނެތްކަން ސާފުކޮށްދިނުމާ ގުޅިގެން، އޭނާގެ ލޯނު އެއްބަސްވުން ވަނީ މުއްދަތުގެ ކުރިން އުވާލާފައެވެ. މިއާއެކު އަޔެކްސްއަށް ބަދަލުވުމުގެ މަގު އޭނާއަށް ވަނީ ތަނަވަސްވެފައެވެ.