އައްޑޫ ސިޓީ ހިތަދޫގައި ހުރި ސައިކަލްތަކެއްގައި ރޭ ދަންވަރު އަލިފާން ރޯވެ، ދެ ސައިކަލެއް ބޭނުން ނުކުރެވޭ ވަރަށް އަނދައިފިއެވެ.

މި ހާދިސާ ހިނގާފައިވަނީ ހިތަދޫ 11 ނަންބަރު ފުލެޓް ސަރަޙައްދުގައި ޕާކުކޮށްފައި ހުރި ސައިކަލްތަކެއްގައެވެ.

Ad by Hajj Corporation

އެމްއެންޑީއެފުން މަޢުލޫމާތު ދީފައިވާ ގޮތުގައި، މި ހާދިސާގެ ރިޕޯޓް އެމްއެންޑީއެފް ސަދަން އޭރިއާ ކޮމާންޑަށް ލިބިފައިވަނީ ރޭ ދަންވަރު 04:10 ހާއިރުއެވެ. ރިޕޯޓް ލިބުމާއެކު ހިތަދޫ ފަޔަރ ސްޓޭޝަނުގެ ފަޔަރފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފައެވެ.

ސިފައިން ކުރި މަސައްކަތުން ސައިކަލްތަކުގައި ރޯވެފައި ހުރި އަލިފާން އެއްކޮށް ނިއްވާލެވިފައިވަނީ ރޭ ދަންވަރު 04:25 ހާއިރުއެވެ. މި ހާދިސާގައި އަލިފާން ރޯވި ސައިކަލްތަކުގެ ތެރެއިން ދެ ސައިކަލެއް ވަނީ ބޭނުން ނުކުރެވޭ ވަރަށް އަނދާފައެވެ.

މި ހާދިސާ ހިނގަން މެދުވެރިވި ސަބަބެއް އަދި އެމްއެންޑީއެފުން ހާމަކޮށްފައެއް ނުވެއެވެ.