ކ. ދިއްފުއްޓަށް ޗުއްޓީ ހޭދަކުރުމަށް އައިސް އުޅުނު އުމުރުން 49 އަހަރުގެ އަންހެން ފަތުރުވެރިއަކު އިސްލާމްދީން ގަބޫލުކޮށްފިއެވެ.

މި ފަތުރުވެރިޔާ އިސްލާމްދީން ގަބޫލުކޮށް، ޝަހާދަތުގެ ދެކަލިމަ ކިޔާ މަންޒަރު ފެންނަ ވީޑިއޯއެއް މިހާރު ވަނީ ސޯޝަލް މީޑިއާގައި އާންމުވެފައެވެ.

Ad by Hajj Corporation

އަހްމަދު ހަނީފް ނަމަކަށް ކިޔާ މީހަކު ފޭސްބުކްގައި ހިއްސާކުރި މި ވީޑިއޯއިން ފެންނަނީ ދިވެއްސަކު އެ ފަތުރުވެރިޔާއަށް ޝަހާދަތް ލައިދޭ މަންޒަރެވެ. އިސްލާމްވީ ވަގުތު އޭނާ ހުރީ ބުރުގާ އަޅައި، ހަށިގަނޑު ނިވާވާނޭ ފަދަ ހެދުމެއްގައެވެ. ޝަހާދަތް ލައިދެމުން ދިޔަ ވަރަކަށް، އޭނާ ދިޔައީ ވަރަށް ފަރުވާތެރިކަމާއެކު އެ އިބާރާތްތައް ތަކުރާރުކުރަމުންނެވެ. އިސްލާމްވުމަށްފަހު އެ އަންހެން މީހާއަށް މިހާރު ދީފައިވާ ނަމަކީ "ޖަމީލާ" އެވެ.

އޭނާއަކީ ކޮން ގައުމަކަށް ނިސްބަތްވާ މީހެއްކަން އަދި ސާފުވެފައި ނުވި ނަމަވެސް، އޭނާއަށް ޝަހާދަތް ލައިދިން ފަރާތުން ވަނީ މި ހާދިސާ ހިނގާފައިވާކަން މީޑިއާތަކަށް ކަށަވަރުކޮށްދީފައެވެ.

https://www.facebook.com/share/v/18NSQQ8ffQ/

ރާއްޖޭގައި އިސްލާމްވުމުގެ އިޖުރާއަތްތައް

ރާއްޖޭގައި ބޭރު މީހަކު އިސްލާމްވާނަމަ، އެކަން ކުރިއަށް ގެންދަންޖެހޭ ވަކި އުސޫލުތަކެއް އޮވެއެވެ. އެގޮތުން އެމީހަކީ އަމިއްލަ އިޚްތިޔާރުގައި، އެއްވެސް މަޖުބޫރުކަމެއް ނެތި އިސްލާމްވާން ބޭނުންވާ މީހެއްކަން ޔަގީންކުރުމަށްފަހު، އިސްލާމްދީނުގެ އަސާސްތަކާއި ތައުހީދުގެ މައުލޫމާތު އެމީހަކަށް ދޭންޖެހެއެވެ. އަދި ދީނީ އިލްމުވެރިއެއް ނުވަތަ ކަމާބެހޭ އިދާރާއެއްގެ ބޭފުޅެއްގެ ކުރިމަތީގައި ޝަހާދަތުގެ ދެކަލިމަ ކިޔަންޖެހެއެވެ.

ރަސްމީކޮށް އިސްލާމްވިކަމުގެ ލިޔުން ހޯދުމަށްޓަކައި މިނިސްޓްރީ އޮފް އިސްލާމިކް އެފެއާޒަށް ހުށަހަޅަންޖެހެއެވެ. މިނިސްޓްރީން އެމީހާގެ މައުލޫމާތު ސާފުކޮށް، އިސްލާމްވުމުގެ އިގުރާރުގައި ސޮއިކުރުވުމަށްފަހު، އެމީހަކީ މުސްލިމެއްކަން އަންގައިދޭ ރަސްމީ ސެޓްފިކެޓެއް ދޫކުރާނެއެވެ. މީގެ އިތުރުން މޯލްޑިވްސް އިމިގްރޭޝަނަށާއި ކަމާބެހޭ އެހެނިހެން އިދާރާތަކަށް އެކަން އަންގައި، ރެކޯޑްތަކަށް ގެންނަންޖެހޭ ބަދަލުތައް ގެންނަންޖެހޭނެއެވެ.

އިސްލާމްވުމަށްފަހު، ނަމާދުކުރުމާއި ދީނީ އެހެނިހެން އަޅުކަންތައް ކުރާނެ ގޮތް އުނގަންނައިދިނުމަކީ އިސްލާމިކް މިނިސްޓްރީންނާއި ދީނީ ޖަމިއްޔާތަކުން އިސްކަންދޭ ކަމެކެވެ. ރާއްޖޭގައި އިސްލާމްދީނާ ގުޅޭ ހުރިހާ ކަމެއް ބަލަހައްޓާ އެންމެ މަތީ އިދާރާއަކީ މިނިސްޓްރީ އޮފް އިސްލާމިކް އެފެއާޒެވެ.