އިނގިރޭސި އެފްއޭ ކަޕްގެ ހަތަރުވަނަ ބުރުގައި ރޭ ކުޅުނު މެޗުތަކުން މޮޅުވެ، ލިވަޕޫލް، ނިއުކާސަލް ޔުނައިޓެޑް އަދި މެންޗެސްޓަރ ސިޓީން މުބާރާތުގެ ފަސްވަނަ ބުރުގެ ޖާގައެއް ކަށަވަރުކޮށްފިއެވެ. މި ޓީމުތައް ފަސްވަނަ ބުރަށް ދަތުރުކުރީ ރޭ ކުޅުނު ވާދަވެރި މެޗުތަކަށް ފަހުގައެވެ.

ލިވަޕޫލުން ފަސްވަނަ ބުރުގެ ޖާގައެއް ހޯދީ ބްރައިޓަންއާ ދެކޮޅަށް ކުޅުނު މެޗު 3-0 ގެ ނަތީޖާއަކުން ކާމިޔާބުކޮށްގެންނެވެ. އެންފީލްޑްގައި ކުޅުނު މި މެޗުގެ ފުރަތަމަ ހާފު ނިމެން ތިން މިނިޓަށް ވެފައި ވަނިކޮށް ކާރޓިސް ޖޯންސް ވަނީ ލަނޑެއް ޖަހައި ލިވަޕޫލަށް ލީޑު ނަގައިދީފައެވެ. ދެވަނަ ހާފު ފެށިގެން 11 ވަނަ މިނިޓުގައި މުހައްމަދު ސަލާ ދިން ޕާހަކުން ޑޮމިނިކް ސޮބޮޒްލާއީ ވަނީ ދެވަނަ ލަނޑު ޖަހައިދީފައެވެ. ލިވަޕޫލްގެ ފަހު ލަނޑު މެޗުގެ 68 ވަނަ މިނިޓުގައި ލިބުނު ޕެނަލްޓީއަކުން ކާމިޔާބުކޮށްދިނީ މުހައްމަދު ސަލާ އެވެ.

Ad by Hajj Corporation

ނިއުކާސަލް އާއި އެސްޓަން ވިލާ ބައްދަލުކުރި މެޗު ނިއުކާސަލްއިން ކާމިޔާބުކުރީ 3-1 އިންނެވެ. މެޗުގެ 14 ވަނަ މިނިޓުގައި ޓެމީ އަބްރަހަމް ޖަހައިދިން ލަނޑުން ވިލާ އިން ކުރި ހޯދި ނަމަވެސް، ފުރަތަމަ ހާފުގެ ފަހު ވަގުތު އެ ޓީމުގެ ގޯލުކީޕަރު މާކޯ ބިޒޮޓަށް ރަތް ކާޑު ދެއްކުމުން އެ ޓީމަށް މައްސަލަތަކާ ކުރިމަތިވިއެވެ. ނިއުކާސަލްއަށް ނަތީޖާ އެއްވަރުކޮށްދީ އަދި ލީޑު ނަގައިދިނީ ސެންޑްރޯ ޓޮނާލީ ކާމިޔާބުކުރި ދެ ލަނޑުންނެވެ. އެ ޓީމުގެ ތިންވަނަ ލަނޑު މެޗު ނިމެން ދެ މިނިޓަށް ވެފައި ވަނިކޮށް ޖަހައިދިނީ ނިކް ވޮލްޓެމޯޑްއެވެ.

ޕެޕް ގަޑިއޯލާގެ މެންޗެސްޓަރ ސިޓީން ވަނީ ސެލްފޯޑް ސިޓީއާ ދެކޮޅަށް ކުޅުނު މެޗު 2-0 އިން ކާމިޔާބުކޮށްފައެވެ. އިއްތިހާދު ސްޓޭޑިއަމްގައި ކުޅުނު މި މެޗަށް ސިޓީން ރިޒާވް ޓީމެއް ނެރުނުއިރު، ފުރަތަމަ ލަނޑަކީ މެޗުގެ ހަވަނަ މިނިޓުގައި ސެލްފޯޑްގެ އެލްފީ ޑޮރިންޓަން އަތުން ބައިކޮޅަށް ވަން ލަނޑެކެވެ. ސިޓީގެ ދެވަނަ ލަނޑު މެޗު ނިމެން ނުވަ މިނިޓަށް ވެފައި ވަނިކޮށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މާކް ގުއޭހީ އެވެ.

މި މެޗުތަކުގައި ރެފްރީންގެ ނިންމުންތަކާމެދު ބައެއް ޓީމުތަކުން ހިތްހަމަނުޖެހުން ފާޅުކޮށްފައިވެއެވެ. އެފްއޭ ކަޕްގެ ފަސްވަނަ ބުރާ ހަމައަށް ވީއޭއާރުގެ އެހީތެރިކަން ބޭނުން ނުކުރާތީ އެކަމުގެ ކަންބޮޑުވުން އޮފިޝަލުންނާއި ކުޅުންތެރިން ފާޅުކުރިއެވެ. މުބާރާތުގެ ފަސްވަނަ ބުރުގެ ގުރުއަތުލުން ބޭއްވުމަށް ހަމަޖެހިފައިވަނީ ކުރިއަށް އޮތް ހޯމަ ދުވަހުއެވެ.