ޙައްޖާއި ޢުމްރާގެ ކަންކަމުގައި އެހީތެރިކަން ފޯރުކޮށްދިނުމަށް އިސްލާމީކަންތައްތަކާބެހޭ ވުޒާރާއާއި އައިލެންޑް އޭވިއޭޝަން ސަރވިސަސް ލިމިޓެޑާއި ދެމެދު އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި އިސްލާމީ ކަންތަކާބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޑރ. މުޙައްމަދު ޝަހީމް އަލީ ސަޢީދެވެ. އަދި އައިލެންޑް އޭވިއޭޝަންގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ އިބްރާހިމް އިޔާސްއެވެ.

މިއީ ޙައްޖާއި ޢުމްރާގެ ކަންކަމާއި އިތުރު ދާއިރާތަކުން އެއްބާރުލުމާއި އެހީތެރިކަން ދިނުމާއި، ދިވެހި ޙައްޖުވެރިންނާއި ޢުމްރާވެރިންނަށް ފަސޭހަ، އިތުބާރުހުރި ވައިގެ ދަތުރުފަތުރުގެ ޚިދުމަތެއް ކަަށަވަރުކުރުމުގެ އިތުރުން، މާލެއާއި ޖިއްދާއާ ދެމެދު ކުރެވޭ ދަތުރުތައް އިތުރުކޮށް، ޙައްޖުވެރިންނަށާއި ޢުމްރާވެރިންނަށް ލުއިފަސޭހަ ޚިދުމަތްތަކެއް ފޯރުކޮށްދިނުމުގެ މަޤްޞަދުގައި ވެވުނު އެއްބަސްވުމެކެވެ.

މި އެއްބަސްވުމުގެ ދަށުން މޯލްޑިވިއަންގެ މުވައްޒަފުންނަށް ދީނީ ކަންކަމާއި ގުޅޭ ތަމްރީނުތައް ފޯރުކޮށްދެވުމުގެ އިތުރުން ވުޒާރާއިން ބާއްވާ ޙައްޖު ޢުމްރާ ކޮންފަރެންސް ފަދަ ހަރަކާތްތަކުގައި މޯލްޑިވިއަންގެ ފުރިހަމަ ބައިވެރިވުން ހޯދައިދެވިގެންދާނެއެވެ.

މި ރަސްމިއްޔާތުގައި ވާހަކަދައްކަވަމުން ވަޒީރު ވަނީ، މޯލްޑިވިއަނުން ދިވެހި ޙައްޖުވެރިންނާ ޢުމްރާވެރިންގެ ޚިދުމަތުގައި ކޮށްދެއްވާ މަސައްކަތް ފާހަގަކޮށް، އެ މަސައްކަތްތަކަށް ޝުކުރު ދަންނަވާފައެވެ.

Ad by Hajj Corporation