މާލޭގައި ގަވާއިދާ ހިލާފަށް ޕާކުކޮށްފައި ހުރި އުޅަނދުތަކާއި، ރަޖިސްޓްރީނުކޮށް ހުރި އުޅަނދުތައް މާދަމާ ނެގުމަށް ނިންމައިފިއެވެ.

ފުލުހުން މިދިޔަ ހަފްތާގައި ކޮށްފައިވާ އިއުލާނެއްގައި ވާގޮތުން، މާލޭގައި ގަވާއިދާ ހިލާފަށް ޕާކުކޮށްފައިވާ އުޅަނދުތަކާއި، ރަޖިސްޓްރީނުކޮށް ހުރި އުޅަނދުތައް އަދި އޭ ޒޯން ފިޔަވަހި އެހެން ޒޯންތަކަށް ރަޖިސްޓްރީކޮށްފައިހުރި އުޅަނދުތައް މާލޭގެ މަގުތަކުން ނެގުމަށް އެ އިދާރާއިން ވަނީ ނިންމާފައެވެ.

Ad by Hajj Corporation

އެގޮތުން، މާލޭގެ އެކި ސަރަހައްދުތަކުގައި ބަހައްޓާފައި ހުރި އެފަދަ އުޅަނދުތައް ނެގުމަށް ފުލުހުން ދީފައިވާ މުހުލަތަކީ މިރޭ 11:30 ގެ ނިޔަލަށެވެ.އަދި އެ މުއްދަތުގައި ނުނަގާ ހުންނަ އުޅަނދުތައް، މާދަމާއިން ފެށިގެން ކަމާ ގުޅުންހުރި އިދާރާތަކާ ގުޅިގެން ނަގަން ފަށާނެ ކަމަށް ފުލުހުން ވަނީ ބުނެފައެވެ.

އެ މަސައްކަތަކީ އެއްގަމު ދަތުރުފަތުރުގެ ގާނޫނުގެ ދަށުން ފުލުހުންނަށް މަތިކޮށްފައިވާ ގާނޫނީ ޒިންމާގެ ދަށުން ކުރިއަށްގެންދާ ހަރަކާތެކެވެ.އެގޮތަށް މާލޭގެ އެކި ސަރަހައްދުތަކުން ނަގާ އުޅަނދުތައް، ފުލުހުން ކަނޑައަޅާ ވަކި ތަނަކަށް ޓޯވ ކޮށްގެން ގެންދާނެއެވެ.

އަދި އުޅަނދުތައް ޓޯވ ކުރުމުގެ ތެރޭގައާއި، އަދި ޓޯވ ކުރުމަށްފަހު ބަހައްޓާފައި ހުންނަ މުއްދަތުގައި އުޅަނދަށް ލިބޭ އެއްވެސް ގެއްލުމަކަށް ފުލުހުން ޒިންމާ ނުވާނެ ކަމަށްވެސް އެ އިދާރާއިން ވަނީ ބުނެފައެވެ.