މެދުއިރުމަތީގައި ހިނގަމުންދާ ކަންކަމުގެ އަސަރު ސީދާ ރާއްޖެއަށް ކުރާނެ ކަމަށް ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ފަތުރުވެރިކަމާއި ބެހޭ ވުޒާރާއިން ބޭއްވި ނޫސްވެރިންގެ ބައްދަލުވުމުގައެވެ.

Ad by Hajj Corporation

ވަޒީރު ވިދާޅުވީ މިދިޔަ ފެބްރުއަރީ މަހު ރާއްޖެއަށް ދުވާލެއްގެ މައްޗަށް އެވަރޭޖްކޮށް 8،800 ފަތުރުވެރިން ޒިޔާރަތް ކޮށްފައިވާއިރު، އޭގެތެރެއިން 35 އިންސައްތަ ފަތުރުވެރިންނަކީ މެދުއިރުމަތިން ނުވަތަ އެމަގުން ރާއްޖެއަށް އަންނަ ފަތުރުވެރިން ކަމަށެވެ. އެހެންވީމާ ގާތްގަނޑަކަށް 30 އިންސައްތައާއި 35 އިންސައްތައާއި ދޭތެރޭ ފަތުރުވެރިން އައިސްފައިވަނީ މެދުއިރުމަތީގެ ފްލައިޓުތަކުންކަން ފާހަގަކުރެއްވިއެވެ.

މެދުއިރުމަތީގެ މައްސަލަ ވީއެންމެ އަވަހަކަށް ހައްލުވުމަކީ ކުރައްވާ އުއްމީދު ކަމަށާއި މެދު އިރުމަތިން ރާއްޖެ އަންނަ މީހުން ދެން ބަލާނީ އެހެން ރޫޓަކުން އާދެވޭތޯ ކަމަށް ވެސް ވަޒީރު ވިދާޅުވިއެވެ. އަދިރާއްޖެއިން އަވަސް ފިޔަވަޅުތަކެއް އަޅައި، މިކަމުން ލިބޭނެ ގެއްލުން ކުޑަ ކުރުމަށް މިހާރު މަސައްކަތް ކުރަމުންދާ ކަމަށް ވިދާޅުވިއެވެ.

ފަތުރުވެރިކަމާއި ބެހޭ ވަޒީރު ވިދާޅުވީ، މި ހާލަތުގައި ދިމާވާނެ ގެއްލުންތައް ފޫބެއްދުމަށް އެހެން މާކެޓުތަކުން މީހުން ގެނައުމަށް މަސައްކަތް ކުރާ ކަމަށާއި މިގޮތުން ޔޫރަޕް އަދި އެހެން މަންޒިލްތަކުން ސީދާ ރާއްޖެއަށް ކުރާ ދަތުރުތައް އިތުރު ކުރުމަށް މަސައްކަތް ކުރަމުންދާ ކަމަށް ވިދާޅުވިއެވެ. އަދި އޭޝިއާ ސަރަޙައްދުންވެސް އިތުރު މަންޒިލްތައް ބަލައި، އެ ފްލައިޓްތައް އިތުރު ކުރުމަށް މަސައްކަތް ކުރަމުންދާ ކަމަށް ވަނީ ވިދާޅުވެފައެވެ.

މެދުއިރުމަތީގެ ހާލަތު ގޯސްވުމުން އެސަރަޙައްދުން ދަތުރުކުރާ ގިނަ އަދަދެއްގެ ފްލައިޓު ކެންސަލްވުމާއެކު، ގިނަ އަދަދެއްގެ ފަތުރުވެރިން ރާއްޖޭގެ އެއަރޕޯޓުގައި ވަނީ ތާށިވެފައެވެ. އެފަރާތްތަކަށް ބޭނުންވާ އެހީތެރިކަން ފޯރުކޮށްދިނުމަށް ސަރުކާރުން ދަނީ މަސައްކަތް ކުރަމުންނެވެ. އަދި އެފަރާތްތަކަށް ފުރުމުގެ އިންތިޒާމުތައް ހަމަޖެއްސުމަށް މަގުފަހިކޮށްދޭން އެއަރލައިންތަކާއި، ކަމާގުޅުންހުރި އެހެން ފަރާތްތަކާއި ގުޅިގެން ވެސް ގިނަ މަސައްކަތްތަކެއް ދަނީ ކުރަމުންނެވެ.