ރެއާލް މެޑްރިޑްގެ ބްރެޒިލް ފޯވާޑް ރޮޑްރީގޯގެ ކަކުލަށް ސީރިއަސް އަނިޔާއެއް ވެފައިވާކަން އެ ކްލަބުން މިއަދު ރަސްމީކޮށް ކަށަވަރުކޮށްދީފިއެވެ. ކްލަބުގެ މެޑިކަލް ޓީމުން ހެދި ޓެސްޓުތަކުން ދައްކާގޮތުގައި އޭނާގެ ކަނާތު ކަކުލުގެ އޭސީއެލް (ACL) ވަނީ ކަނޑައިގެން ގޮސްފައެވެ.

ރެއާލް މެޑްރިޑުން ނެރުނު ބަޔާނެއްގައި ބުނެފައިވަނީ، "އަހަރެމެންގެ ކުޅުންތެރިޔާ ރޮޑްރީގޯ މިއަދު ހެދި ޓެސްޓުތަކުން އެނގޭ ގޮތުގައި، އޭނާގެ ކަނާތު ފައިގެ އެންޓީރިއާ ކްރޫޝިއޭޓް ލިގަމެންޓް (ACL) އަދި ލެޓަރަލް މެނިސްކަސް ވަނީ ބުރިވެފައި" ކަމަށެވެ. މި އަނިޔާއާ ގުޅިގެން އޭނާ ވަރަށް އަވަހަށް އޮޕަރޭޝަނެއް ކުރަން ޖެހޭނެ ކަމަށްވެސް ކްލަބުން ބުނެއެވެ.

Ad by Hajj Corporation

ރޮޑްރީގޯއަށް މި އަނިޔާވީ އެންމެ ފަހުން ގެޓާފޭއާ ދެކޮޅަށް ކުޅެ 1-0 އިން ރެއާލް ބަލިވި މެޗުގައެވެ. ބަދަލު ކުޅުންތެރިއެއްގެ ގޮތުގައި ކުޅެން އެރި ރޮޑްރީގޯ ވަނީ ކަކުލަށް ލިބުނު މި އަނިޔާއާއެކުވެސް ގާތްގަނޑަކަށް 30 މިނެޓު ވަންދެން ކުޅުން ކުރިއަށް ގެންގޮސްފައެވެ.

މި ބާވަތުގެ އަނިޔާއަކުން މުޅިން ރަނގަޅުވުމަށް ގާތްގަނޑަކަށް 10 މަސްދުވަހުގެ މުއްދަތެއް ނަގާނެ ކަމަށް ރިޕޯޓުތައް ބުނެއެވެ. މިއާއެކު 2027 ވަނަ އަހަރުގެ ކުރީކޮޅާ ހަމައަށް އޭނާ ކުޅުމާ ދުރުގައި ހުންނަން ޖެހޭނެއެވެ. މިއީ މި ސީޒަނުގެ ބާކީ ބަޔާއި، ކުރިއަށް އޮތް ވޯލްޑް ކަޕްގައި ބްރެޒިލް ޓީމަށް ކުޅުމުގެ ފުރުސަތު އޭނާއަށް ގެއްލިގެންދާނެ ކަމެކެވެ.

މިހާރުވެސް އަނިޔާގެ ގިނަ މައްސަލަތަކެއް ކުރިމަތިވެފައިވާ ރެއާލް މެޑްރިޑަށް ރޮޑްރީގޯގެ އަނިޔާއަކީ ބޮޑު ގޮންޖެހުމެކެވެ. ލަލީގާ އަދި ޗެމްޕިއަންސް ލީގުގެ މުހިންމު މެޗުތަކެއް ކުރިއަށް ހުރިއިރު، ކްލަބުން މިހާރު އެންމެ ބޮޑު އިސްކަމެއް ދެނީ އޭނާގެ ރިހެބިލިޓޭޝަން މަރުހަލާ ފުރިހަމަކޮށް އަވަހަށް ދަނޑަށް އެނބުރި އައުމަށް އެހީތެރިވުމަށެވެ.