ދޮށީ އުމުރުގެ މީހުން ދަތުރުކުރުމަށް ބޭނުންވާ އުޅަނދެއް ރާއްޖެ ގެންނަން އެއްބަސްވުމެއްގައި ސޮއިކޮށްފިއެވެ.

މިއީ ޖަޕާން ސަރުކާރުގެ އެހީގައި ރާއްޖެ ގެންނަ އުޅަނދެކެވެ. މި އެއްބަސްވުމުގައި، ސޮއިކޮށްފައިވަނީ މިކަމަށްޓަކައި ބޭއްވި ޚާއްޞަ ރަސްމިއްޔާތެއްގައެވެ.
މި އެއްބަސްވުމުގައި ސޮއިކުރީ، ޖަޕާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމީކޯއެވެ. އަދި ދިވެހި ރެޑް ކްރެސެންޓުގެ ފަރާތުން އެއްބަސްވުމުގައި ސޮއިކުރެއްވީ، ސެކެޓްރީ ޖެނެރަލް އަޙްމަދު ޝާބިންއެވެ.

މި މަޝްރޫއާ ގުޅޭގޮތުން ޖަޕާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމީކޯ ވިދާޅުވީ، މި ވެހިކަލްގެ ސަބަބުން މާލޭގައި ދިރިއުޅޭ ޢުމުރުން ދުވަސްވީ ފަރާތްތަކަށް ދަތުރުފަތުރު ކުރުމަށް ބޮޑެތި ފަސޭހަތަކެއް ލިބިގެންދާނެ ކަމަށް ޤަބޫލުކުރައްވާ ކަމަށެވެ. އަދި އުމުރުން ދުވަސްވީ މީހުންގެ އާބާދީ މާލޭގަވެސް އިތުރުވަމުން ދާއިރު، ޞިއްޙީ ޚިދުމަތަކީ ވަރަށް ބޮޑު މައްސަލައެއްކަން ފާހަގަކުރެއްވިއެވެ.

Ad by Hajj Corporation

މީގެ އިތުރުން މި ޕްރޮޖެކްޓުގެ ދަށުން އުމުރުން ދުވަސްވީ މީހުންނަށް ރައްކާތެރިކަމާއެކު ދަތުރު ކުރެވޭނެ ކަމަށާއި މި ވެހިކަލްތަކުގެ ސަބަބުން ނާޒުކު ހާލަތްތަކުގައި ޞިއްޙީ ހާލަތު ރަނގަޅުވެ، ކުއްލި ޙާލަތްތަކުގައި ބުރަ ކުޑަވެގެންދާނެ ކަމަށް ވެސް ސަފީރު ވިދާޅުވިއެވެ.

ދިވެހި ރެޑް ކްރެސެންޓުގެ ސެކެޓްރީ ޖެނެރަލް އަޙްމަދު ޝާބިން ވިދާޅުވީ، މި މަޝްރޫޢުގެ ސަބަބުން ހިނގާބިނގާވެ އުޅުމާއި، ޞިއްޙީ ޚިދުމަތްތައް ލިބުމާއި މިނޫނަސް ދަތުރުފަތުރު ކުރުމަށް ބޮޑެތި ފަސޭހަތަކެއް ލިބިގެންދާނެ ކަމަށެވެ. އަދި އުމުރުން ދުވަސްވީ މީހުންގެ ތެރެއިން ގިނަ މީހުންނަށް ހިނގާބިނގާވެ އުޅުމާއި، ޞިއްޙީ ޚިދުމަތް ލިބުމާއި، އިޖްތިމާޢީ ބައިވެރިވުން ފަދަ ގޮންޖެހުންތަކާ ކުރިމަތިލާން ޖެހޭކަން ފާހަގަކުރިއެވެ.

ޝާބިން ވަނީ އެމީހުންނަށް ޚާޢްސަ ކޮށްގެން މި ގެނެވޭ އުޅަނދުތައް މާލެ ގެނެވުމުން އެ މީހުންނަށް ރައްކާތެރި އަދި ވަގުތުން ދަތުރުފަތުރު ކުރުމުގެ ފުރުސަތު ފަހިވެގެންދާނެ ކަމަށެވެ. އަދި މި މަޝްރޫޢުގެ ދަށުން ދިވެހި ރެޑް ކްރެސެންޓުގެ ޕޭޝަންޓް ޓްރާންސްޕޯޓު ޚިދުމަތް މިހާރަށްވުރެ ފުޅާދާއިރާއެއްގައި މާލެ ސިޓީގައި ފޯރުކޮށްދެވޭނެ ކަމަށް ވިދާޅުވެއެވެ.

ޚާއްޞަކޮށް އުމުރުން ދުވަސްވީ މީހުންނަށް ޚިދުމަތް ފޯރުކޮށްދީ، މުޖުތަމަޢުގެ ތެރޭގައި ދޭ އެހެނިހެން ޚިދުމަތްތަކާއި، އިމަރޖެންސީ ރެސްޕޮންސް މަސައްކަތްތައް ހަރުދަނާ ކުރުމަށް މަސައްކަތް ކުރަމުންދާ ކަމަށްވެސް ދިވެހި ރެޑް ކްރެސެންޓުން ވިދާޅުވެއެވެ.

މިއީ، 65،784 ޑޮލަރުގެ މަޝްރޫޢެކެވެ.