ރާއްޖޭގެ ސިއްހީ ދާއިރާ އިތުރަށް ތަރައްގީކުރުމާއި ގުޅޭގޮތުން ޖަޕާނާއެކު މަޝްވަރާކޮށްފިއެވެ.

އެ މަޝްވަރާތައް ކޮށްފައިވަނީ ޖަޕާނުން ރާއްޖެއަށް ކަނޑައަޅުއްވާފައިވާ ސަފީރު އިޝިގަމީ ސިއްހަތާއި އާއިލީ އަދި އިޖްތިމާއީ ތަރައްގީއާ ބެހޭ ވަޒީރު ގީލާ އަލީގެ އަރިހަށް ކުރެއްވި ޒިޔާރާތެއްގެ ތެރެއިންނެވެ.

Ad by Hajj Corporation

ޖަޕާން އެމްބަސީއިން ކޮށްފައިވާ ޕޯސްޓެއްގައި ބުނެވަނީ އެ ޒިޔާރަތުގެ ތެރެއިން ދެ ބޭފުޅުންގެ މެދުގައި ގިނަ މަޝްވަރާތަކެއް ކުރެވުނު ކަމަށެވެ. އެގޮތުން ރާއްޖޭގައި އިޖްތިމާއީ ދާއިރާ އާއި ސިއްހީ ދާއިރާގައި ހުރި ގޮންޖެހުންތަކާއި ގުޅޭގޮތުން މަޝްވަރާކުރި ކަމަށެވެ.

އަދި ރާއްޖޭގެ ސިއްހީ ދާއިރާ އިތުރަށް ތަރައްގީކުރުމާއި ދެ ގައުމުން އެކުގައި މަސައްކަތް ކުރެވޭނެ ދާއިރާތަކާއި ގުޅޭގޮތުން ވެސް މަޝްވަރާތައް ކުރި ކަމަށް އެމްބަސީއިން ބުނެފައިވެއެވެ.

ޖަޕާނަކީ ރާއްޖޭގެ އެކި ދާއިރާތައް ތަރައްގީކުރުމަށް އެހީތެރިކަން ފޯރުކޮށްދޭ ގައުމެކެވެ. ހާއްސަކޮށް ސިއްހީ ދާއިރާއަށް ބޭނުންވާ އާލަތްތައް ފޯރުކޮށްދިނުމުގައި ޖަޕާނުން ވަރަށް ބޮޑަށް އެހީވެއެވެ. އަދި އެ ދާއިރާ މީހުން ތަމްރީން ކުރުމުގައި ވެސް ޖަޕާނުން ގެންދަނީ އެހީ ފޯރުކޮށްދެމުންނެވެ.