ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް) ގެ ކުއްލިއްޔާ އޮފް ޤުރުއާން އެންޑު ސުންނާއިން ކޮންމެ އަހަރަކު ރަމަޟާން މަހު ބާއްވަމުން އަންނަ  " މަހްރަޖާނުލްޤުރްއާނިލްކަރީމް" އައިޔޫއެމް ގައި މިއަދު ކުރިއަށް ގެންގޮސްފިއެވެ.

މިއީ ޢާއްމުންނަށް ހުޅުވާލައިގެން، ތަފާތު ގިރާއަތްތަކަށް ކީރިތި ޤުރްއާން ކިޔަވާލާ އަޑުއަހާލުމުގެ އިތުރުން، އަޑުއިއްވޭ އާޔަތްތަކުގެ ތަފްސީރާއި އެ އާޔަތްތަކުގައި އެކުލެވޭ އިޢުޖާޒުތަކުގެ މަޢުލޫމާތު މުއްސަނދި ކޮށްލުމަށް ހާޟިރުވެލަން ވަރަށް ރަގަޅު ބައްދަލުވުމެއްކަމަށް ކުއްލިއްޔާ އޮފް ޤުރުއާން އެންޑް ސުންނާގެ ޑީން އަލްއުސްތާޛް މުޙައްމަދު މަންޞޫރު ވިދާޅުވެއެވެ.

Ad by Hajj Corporation

މިބައްދަލުވުންތަކުގައި ދިވެހިރާއްޖޭން ބޭރުގެ ޤާރީންނާއި ދިވެހި ޤާރީވެރިންގެ ކިޔެވުން އަޑުއިވެގެންދާއިރު ކީރިތި ޤުރްއާނުގެ ޢިލްމުގެތެރެއަށް ވަނުމަށް ބޭނުންވާ ފަރާތްތަކަށް މިފަދަ ހަފްލާތަކަކީ ރަނުގެ ފުރުސަތެކެވެ.

މިއަރުގެ 1447ގެ މަހްރަޖާން އަކީ  ވަރަށް ޚާއްސަ ތާރީޚީ މަހްރަޖާނެއް ކަމަށް އައިޔޫއެމް އިން ބުނެއެވެ. އެއީ، މިއަހަރުގެ މަހްރަޖާންގައި ކިޔަވާ 03 ދަރިވަރުން 03 ރިވާޔަތަކަށް އިޖާޒާ ޙާޞިލުކޮށްފައިވާތީއެވެ.

ދިވެހިރާއްޖޭގައި މުޅިން އަލަށް ފެށި ކީރިތި ޤުރްއާނުގެ ޢިލްމުގެ ދާއިރާއިން އިޖާޒާދިނުމުގެ ޕްރޮގްރާމް ( މާތް ނަބިއްޔާ صلى الله عليه وسلم އާއި ހަމައަށް ސަނަދުން ގުޅާލެވޭ ކީރިތި ޤުރްއާން އެކި ޤިރާއަތްތަކަށް ކިޔަވަން ދަސްކޮށްދޭ ކޯސް) ގައި ކިޔަވަމުންދާ 03 ދަރިވަރުންނަށް މިހަފްލާގައި ފުރަތަމަ ފަހަރަށް ސަނަދުން ގުޅާލެވޭ އިޖާޒާ ދެވިގެން ދިއުމަކީ މުޅި ރާއްޖޭގެ ތަޢުލީމަށް އިތުރުވެގެންދާ ޢިލްމީ ކާމިޔާބުގެ ބޮޅެއް ކަށަވަރެވެ.

މިޕްރޮގުރާމް ފެށިގެން އައީ ދިވެހިރާއްޖޭގެ އިސްލާމީ ޔުނިވަރސިޓީން ކުރި މަސައްކަތުން  މިޞްރުގެ އަލް އަޒްހަރު ޔުނިވަރސިޓީގެ 02 ޕްރޮފެސަރެއްގެ އެހީތެރިކަމާއި އެކުގައެވެ.

މިއަރުގެ މިބައްދަލުވުމުގައިވެސް ތަފްސީރުގެ ޢިލްމީ ވާހަކަތަކާއި ރޯދައާއި ސައިންސާ ގުޅޭ މުހިއްމު މައުލޫމާތުތައް ފުންނާބު އުސް، ޢިލްމީ މުޢައްލިމުންގެ ފަރާތުން އަޑުއިވިގެން ގޮސްފައިވެއެވެ.

ކީރިތި ޤުރްއާނާއި، މާތް ނަބިއްޔާގެ ސުންނަތަށް ދިވެހިން ހޭލުންތެރިކުރުމުގައި ދިވެހިރާއްޖޭގެ އިސްލާމީ ޔުނިވަރސިޓީ އަކީ، މަހްރަޖާންގައި ވާހަކަދައްކަވަމުން އަލް އަޒްހަރު ޔުނިވަރސިޓީގެ ޕްރޮފެސަރ ޑރ. ޖުމްޢާ ޙަމްދީ ސާލިމް ސިފަކުރެއްވި ފަދައިން، އޭގެ މޫތައް ވަރުގަދަ، ބިޔަ ގަހެކެވެ.

ވަކީން ޚާއްސަކޮށް ރަމަޟާން މަހު ޤުރުއާނުގެ ދާއިރާގެ ގިނަ ހަރަކާތްތަކެއް އެ ޔުނިވަރސިޓީގެ ކުއްލިއްޔާ އޮފް ޤުރުއާން އެންޑް ސުންނާ އިން ހިންގަމުން އަންނަކަން ފާހަގަކުރެވެއެވެ.