މާލެއާއި ހުޅުމާލެ ގުޅުވައިދޭ ހައިވޭގައި ދެ ކާރާއި ދެ ސައިކަލް ޖެހި ނުރައްކާތެރި އެކްސިޑެންޓެއް ހިނގައިފިއެވެ.

މި ހާދިސާ ހިނގާފައިވަނީ މާލެއިން ހުޅުމާލެއަށް ދަތުރުކުރާ ފަޅީގައެވެ.

Ad by Hajj Corporation

ފުލުހުންގެ އިދާރާއިން މައުލޫމާތު ދެއްވާފައިވާ ގޮތުގައި، މި އެކްސިޑެންޓްގެ ރިޕޯޓް ލިބިފައިވަނީ 2026 މާރިޗު 6 ދުވަހުގެ ރޭ މެންދަމު 12:00 އެހާއިރުއެވެ.

މި ހާދިސާގައި ހަތަރު އުޅަނދަކަށް ބޮޑެތި ގެއްލުންތަކެއް ލިބިފައިވާކަމަށް މައުލޫމާތު ލިބެއެވެ.

މި އެކްސިޑެންޓުގައި ދެ މީހަކަށް އެކިވަރުގެ އަނިޔާ ލިބިފައިވާތީ، އެމީހުންނަށް ފަރުވާ ދިނުމަށްޓަކައި ވަނީ އައިޖީއެމް ހޮސްޕިޓަލަށް ގެންގޮސްފައެވެ. ނަމަވެސް އެމީހުންނަށް ލިބުނު އަނިޔާގެ ތަފްސީލެއް އަދި ހާމަކޮށްފައެއް ނުވެއެވެ.

ފުލުހުން ދަނީ މި ހާދިސާ ހިނގަން މެދުވެރިވި ސަބަބު އިތުރަށް ތަހުގީގު ކުރަމުންނެވެ.

މި އެކްސިޑެންޓާ ގުޅިގެން ހައިވޭގެ އެ ސަރަހައްދުގެ ޓްރެފިކަށް ވަނީ ބާރުބޮޑުވެފައެވެ.