ތުރުކީގެ ނޫސް އެޖެންސީ ''އަނަޑޯލޫ'' އިން އެއްކުރި ތަފާސްހިސާބުތަކުން ދައްކާ ގޮތުގައި، ‘އޮޕަރޭޝަން އެޕިކް ފިއުރީ’ ފެށި ފުރަތަމަ 100 ގަޑިއިރު ތެރޭގައި އެމެރިކާގެ ސިފައިންނަށް މަދުވެގެން 5.82 ބިލިއަން ޑޮލަރުގެ ޚަރަދު ވަނީ ހިނގާފައިކަމަށް އެ ނޫހުން ރިޕޯޓްކޮށްފިއެވެ. މިއީ 2026 ވަނަ އަހަރަށް ކަނޑައަޅާފައިވާ އެމެރިކާގެ ދިފާއީ ބަޖެޓުގެ ގާތްގަނޑަކަށް 0.69 އިންސައްތައެވެ.

''އަނަޑޯލޫ'' އިން އަންދާޒާކުރާ ގޮތުގައި މި އޮޕަރޭޝަންގެ ފުރަތަމަ 24 ގަޑިއިރު ތެރޭގައި އެމެރިކާއިން 779 މިލިއަން ޑޮލަރު ހޭދަކުރިއެވެ. އޮޕަރޭޝަންތައް ކުރިއަށްދާ ވަރަކަށް، އެމެރިކާގެ ހަމަލާތަކުގެ ޖުމްލަ އޮޕަރޭޝަނަލް ޚަރަދު މިހާރު ވަނީ ގާތްގަނޑަކަށް 3.3 ބިލިއަން ޑޮލަރަށް އަރާފައެވެ. ސެންޓަރ ފޯ ސްޓްރެޓީޖިކް އެންޑް އިންޓަނޭޝަނަލް ސްޓަޑީޒް (ސީއެސްއައިއެސް) ގެ ހިސާބުތަކުން ވެސް ދައްކަނީ މިއާ ގާތްކުރާ އަދަދެކެވެ.

Ad by Hajj Corporation

އޮޕަރޭޝަނަލް ޚަރަދުތަކުގެ އިތުރުން، އީރާނުން ދިން ބަދަލުހިފުމުގެ ހަމަލާތަކުގައި އެމެރިކާގެ އަސްކަރީ ވަސީލަތްތަކަށް ބޮޑެތި ގެއްލުންތަކެއް ވަނީ ލިބިފައެވެ. އަނަޑޯލޫގެ އަންދާޒާތަކުން ދައްކާ ގޮތުގައި، އެމެރިކާއަށް މިހާތަނަށް ގާތްގަނޑަކަށް 2.52 ބިލިއަން ޑޮލަރުގެ މުދަލާއި ވަސީލަތް ގެއްލިފައިވެއެވެ.

އެމެރިކާގެ އަސްކަރީ ވަސީލަތްތަކަށް ލިބުނު ގެއްލުން

މި ގެއްލުންތަކުގެ ތެރެއިން އެންމެ ބޮޑު ހިއްސާއެއްވަނީ ގަތަރުގެ އަލް-އުދައިދު އެއާ ބޭސްގައި ހުރި، 1.1 ބިލިއަން ޑޮލަރުގެ އަގުހުރި އެމެރިކާގެ AN/FPS-132 އާލީ ވޯނިންގ ރާޑަރ ސިސްޓަމަށެވެ. މިދިޔަ ހޮނިހިރު ދުވަހު އީރާނުގެ މިސައިލެއް އެ ރާޑާއަށް އަރާފައިވާކަން ގަތަރުން ވަނީ ކަށަވަރުކޮށްދީފައެވެ.

އާދީއްތަ ދުވަހު، ކުވެއިތުގެ ވައިގެ ދިފާއީ ނިޒާމުން އޮޅިގެން ދިން ހަމަލާއެއްގައި އެމެރިކާގެ ތިން F-15E ސްޓްރައިކް އީގަލް މަތިންދާބޯޓު ވަނީ ގެއްލިފައެވެ. މި ހާދިސާގައި ހަ ފަޅުވެރިން ސަލާމަތްވި ނަމަވެސް، ބޯޓުތައް ވަނީ ބޭނުންނުކުރެވޭ ވަރަށް ހަލާކުވެފައެވެ. މި ބޯޓުތައް އަލުން ހޯދުމަށް ގާތްގަނޑަކަށް 282 މިލިއަން ޑޮލަރު ހޭދަވާނެ ކަމަށް ބެލެވެއެވެ.

ސީ.ބީ.އެސް ނިއުސްއާ ވާހަކަދެއްކި އެމެރިކާގެ އޮފިޝަލުން ވިދާޅުވި ގޮތުގައި، އެމެރިކާގެ އެއާ ފޯސްގެ ތިން MQ-9 ރީޕަރ ޑްރޯން މިހާތަނަށް ވަނީ ވައްޓާލާފައެވެ. މީގެ އަގު ގާތްގަނޑަކަށް 90 މިލިއަން ޑޮލަރަށް އަރައެވެ.

ހޮނިހިރު ދުވަހު ދިން ފުރަތަމަ ހަމަލާތަކުގައި، އީރާނުން ވަނީ ބަހްރޭންގެ މަނާމާގައި ހުންނަ އެމެރިކާގެ ކަނޑުގެ ސިފައިންގެ ފަސްވަނަ ފްލީޓްގެ ހެޑްކުއާޓަރަށް ހަމަލާދީ، ސެޓެލައިޓް ކޮމިއުނިކޭޝަންގެ ދެ ޓާމިނަލާއި ބައެއް ބޮޑެތި އިމާރާތްތައް ހަލާކުކޮށްލާފައެވެ.

އޯޕަން ސޯސް އިންޓެލިޖެންސް ރިޕޯޓްތަކުން ދައްކާ ގޮތުގައި ހަލާކުކޮށްލާފައިވަނީ AN/GSC-52B މޮޑެލްގެ ސެޓްކޮމް ޓާމިނަލްތަކެކެވެ. މީގެ އަގު، އިންސްޓޯލް ކުރުމުގެ ޚަރަދާއެކު 20 މިލިއަން ޑޮލަރަށް އަރާނެ ކަމަށް ލަފާކުރެވެއެވެ. މީގެ އިތުރުން، ނިއުޔޯކް ޓައިމްސް އިން ދިރާސާކުރި ކުވެއިތުގެ ކޭމްޕް އަރިފްޖާންގެ ސެޓެލައިޓް ފޮޓޯތަކުން ފެންނަ ގޮތުގައި އިތުރު ތިން ރޭޑޯމް ވަނީ ހަލާކުވެފައެވެ. މިއީ ގާތްގަނޑަކަށް 30 މިލިއަން ޑޮލަރުގެ ގެއްލުމެކެވެ.

ޔުނައިޓެޑް އެރަބް އެމިރޭޓްސް (ޔޫ.އޭ.އީ) ގެ އަލް-ރުވައިސް އިންޑަސްޓްރިއަލް ސިޓީގައި ގާއިމުކޮށްފައިވާ ތާޑް (THAAD) އެންޓި-ބެލިސްޓިކް މިސައިލް ސިސްޓަމްގެ AN/TPY-2 ރާޑާ ކޮމްޕޯނެންޓެއް ހަލާކުވި ކަމުގެ ރިޕޯޓްތަކަށް ފަހު، އުރުދުންގެ މުވާފަގު ސަލްތީ އެއާ ބޭސްގައި ހުރި އެފަދަ އިތުރު ސިސްޓަމެއް ވެސް ވަނީ ހަލާކުވެފައެވެ. މިއިން ކޮންމެ ރޭޑާ ކޮމްޕޯނެންޓެއްގެ އަގަކީ ގާތްގަނޑަކަށް 500 މިލިއަން ޑޮލަރެވެ. ޔޫ.އޭ.އީ ގައި ހުރި އިތުރު ސިސްޓަމަކަށް ވެސް ހަމަލާދީފައިވާ ކަމުގެ ރިޕޯޓްތައް ލިބެމުންދިޔަ ނަމަވެސް، ރަސްމީކޮށް އެކަން ކަށަވަރުކުރެވޭނެ ސެޓެލައިޓް ފޮޓޯއެއް އަދި ނެތެވެ.

ޖުމްލަގޮތެއްގައި، އީރާނުން ވަނީ އެ ސަރަހައްދުގައި ހުރި އެމެރިކާގެ ގާތްގަނޑަކަށް 2.52 ބިލިއަން ޑޮލަރުގެ އަސްކަރީ ވަސީލަތްތަކަށް ގެއްލުންދީފައެވެ.

އެމެރިކާގެ ހަމަލާތަކުގެ ޚަރަދު

ދިރާސާތަކުން ދައްކާ ގޮތުގައި، އަނަޑޯލޫގެ ފުރަތަމަ އަންދާޒާ ކަމަށްވާ 779 މިލިއަން ޑޮލަރަކީ އެމެރިކާ ސިފައިން ދުވާލަކު ކުރެ ޚަރަދެވެ.

ސީއެސްއައިއެސް އިން ލަފާކުރާ ގޮތުގައި، ފުރަތަމަ 100 ގަޑިއިރު ތެރޭގައި ބޭނުންކުރި ހަތިޔާރުތައް އަލުން ހޯދުމަށް 3.1 ބިލިއަން ޑޮލަރު ހޭދަވާނެއެވެ. އަދި ކޮންމެ ދުވަހަކު މި ޚަރަދު 758.1 މިލިއަން ޑޮލަރުން އިތުރުވަމުންދާނެއެވެ.ޔޫއެސްއެސް އެބްރަހަމް ލިންކަން އާއި ޔޫއެސްއެސް ޖެރަލްޑް އާރް. ފޯޑް، އެ އުޅަނދުފަހަރާ އެކު ހަރަކާތްތެރިވާ ޑިސްޓްރޯޔަރތަކާއި ލިޓޯރަލް ކޮމްބެޓް ޝިޕްތަކާއެކު އެ ސަރަހައްދުގައި މަޑުކުރަމުންދާއިރު، ދުވާލަކު ގާތްގަނޑަކަށް 15 މިލިއަން ޑޮލަރު ދަނީ ހޭދަވަމުންނެވެ.

އީރާނުން ދިން ހަމަލާތައް ހުއްޓުވުމަށް އެމެރިކާގެ ދިފާއީ ނިޒާމުތައް ވެސް ވަރަށް ބޮޑަށް ބޭނުންކޮށްފައިވެއެވެ. ޕޭން އިންސްޓިޓިއުޓްގެ އަންދާޒާތަކަށް ބަލާއިރު، އެމެރިކާއިން ވަނީ ގާތްގަނޑަކަށް 180 އެސް.އެމް-2/އެސް.އެމް-3/އެސް.އެމް-6 ނޭވަލް އިންޓަރސެޕްޓަރުތަކާއި، 90 ޕެޓްރިއަޓް ޕީ.އޭ.ސީ-2/ޕީ.އޭ.ސީ-3 މިސައިލާއި، އަދި 40 ތާޑް (THAAD) އިންޓަރސެޕްޓަރު ބޭނުންކޮށްފައެވެ.