އެމެރިކާއާއި ޔަހޫދީން އީރާންގެ ރައްޔިތުންނާ ދެކޮޅަށް ފަށާފައިވާ ޣައިރުޤާނޫނީ ހަނގުރާމައިގެ ދަށުން ޢާންމުން ދިރިއުޅޭ ސަރަޙައްދުތަކަށް ދެމުންދާ ޙަމަލާތަކުގައި ޝަހީދު ކޮށްލާފައިވާ މީހުންގެ އަދަދު 1,332 އަށް އުފުލިއްޖެއެވެ.

މި އަދަދު ހާމަކުރައްވަމުން އީރާނުން އެކުވެރި ދައުލަތްތައް (އދ)އަށް ކަނޑައަޅާފައި ހުންނަވާ ސަފީރު އަމީރު ސަޢީދު އީރުވާނީ ވިދާޅުވީ، އެމެރިކާއާއި ޔަހޫދީންގެ ޙަމަލާތަކުގައި އެތަކެއް ހާސް ބަޔަކު ޒަޚަމު ކޮށްލާފައިވާ ކަމުގައެވެ.

ރައީސް ޑޮނަލްޑް ޓްރަމްޕާއި ޔަހޫދީންގެ ހައްދުފަހަނައެޅި ބޮޑުވަޒީރު ބެންޖަމިން ނަތަންޔާހޫގެ އަމުރަށް އެމެރިކާއާއި ޔަހޫދީން އީރާނާ ދެކޮޅަށް ހަނގުރާމަ ފަށާފައި ވަނީ ފެބުރުވަރީ 28 ވަނަ ދުވަހުއެވެ. އެމެރިކާގެ ނިއު ޔޯކުގައި ހުންނަ އދގެ މައި މަރުކަޒުގައި ނޫސްވެރިންނާ ވާހަކަދައްކަވަމުން އީރުވާނީ ވިދާޅުވީ، އެމެރިކާއާއި ޔަހޫދީންގެ ގިނަ ޙަމަލާތައް އަމާޒު ކުރަމުންދަނީ ޢާންމުން ދިރިއުޅޭ ރަށްތަކާއި ސަރަޙައްދުތަކަށް ކަމުގައެވެ. އެ ޙަމަލާތަކުގައި އެމެރިކާގެ އަސްކަރިއްޔާއާއި ޔަހޫދީ ފައުޖުން ދަނީ ނުރައްކާތެރި އަދި ފަނާކުރަނިވި ހަތިޔާރު ބޭނުން ކުރަމުންނެވެ.

އީރުވާނީ ވިދާޅުވީ، ރައްދުގައި އީރާނުން ޙަމަލާ ދެމުން ދިޔަ ނަމަވެސް، އެ ޙަމަލާތައް ޢާންމުން ދިރިއުޅޭ ސަރަޙައްދުތަކަށް އަމާޒުކޮށްފައި ނުވާނެ ކަމުގައެވެ. އީރާންގެ ރައްދު ޙަމަލާތައް އަމާޒު ކުރަމުން ދަނީ ޔަހޫދީ ދައުލަތުގެ އިތުރުން ގަލްފާއި ޢަރަބި ޤައުމުތަކުގައި އެމެރިކާއިން ޤާއިމުކޮށްފައި އޮތް އަސްކަރީ މަރުކަޒުތަކުގެ އިތުރުން އެމެރިކާގެ މަސްލަޙަތު އޮތް އިމާރާތްތަކާއި ތަންތަނަށެވެ.

އޭގެ ތެރެއިން ބައެއް ޙަމަލާތައް މަދަނީ ބިނާރުތަކަށް އަމާޒުވެފައިވާ ކަމަށް ބުނާ ހާދިސާތައް ތަޙުޤީޤު ކުރަމުންދާ ކަމުގައި ވެސް އީރުވާނީ ވިދާޅުވިއެވެ.

Ad by Hajj Corporation