އީރާނުން ހޮރްމުޒް ކަނޑުއޮޅީގައި މައިން (ގޮވާތަކެތި) ވަޅުލާފައިވާ ކަމަށް ފެތުރިފައިވާ ރިޕޯޓުތަކާއެކު، މެދުއިރުމަތީގެ މަސްރަހު އިންތިހާއަށް ނުރައްކާތެރި ދަރަޖައަކަށް އުފުލިއްޖެއެވެ.

ވޯލް ސްޓްރީޓް ޖާނަލް އާއި ބައިނަލްއަގުވާމީ އިންޓެލިޖެންސް އިދާރާތަކުން މިކަން ކަށަވަރުކޮށްދެމުންދާއިރު، ދުނިޔޭގެ ހަކަތައިގެ މައިނާރު ކަމުގައިވާ މި ކަނޑުއޮޅި މިހާރު ވެފައިވަނީ މުދާ އުފުލާ ބޯޓުފަހަރަށް "މަރުގެ ވާދީއަކަށެވެ".

Ad by Hajj Corporation

މި ނުރައްކާތެރި ހާލަތާ ގުޅިގެން އެމެރިކާއިން ވަނީ ވަރުގަދަ އަސްކަރީ ރައްދެއް ދޭން ފަށާފައެވެ. އެމެރިކާގެ ސެންޓްރަލް ކޮމާންޑް (CENTCOM) އިން ހާމަކުރި ގޮތުގައި، މާރިޗު 10 ވަނަ ދުވަހު ދިން ވަރުގަދަ ހަމަލާތަކެއްގައި، ކަނޑުގައި މައިން އެޅުމަށް ބޭނުންކުރާ އީރާނުގެ 16 އުޅަނދެއް ވަނީ ނައްތާލާފައެވެ. އެމެރިކާގެ ރައީސް ޑޮނަލްޑް ޓްރަމްޕް "ޓްރޫތް ސޯޝަލް" މެދުވެރިކޮށް ދެއްވި އިންޒާރުގައި، ކަނޑުގައި ހުރި މައިންތައް ވަގުތުން ނެގުމަށް އަމުރުކުރައްވައި، އެހެންނޫންނަމަ މީގެ ކުރިން ދުނިޔެ ނުދެކޭ ފަދަ ވަރުގަދަ ރައްދެއް ދޭނެ ކަމަށް ވިދާޅުވެފައިވެއެވެ.

ނަމަވެސް، އީރާނުގެ ރިވޮލިއުޝަނަރީ ގާޑްސް (IRGC) އިން ބުނަނީ އެމެރިކާގެ ހަމަލާތަކުގައި ބައެއް އުޅަނދުތައް ހަލާކުވި ނަމަވެސް، އެމީހުންގެ ކުދި ބޯޓުފަހަރާއި އައްސޭރިފަށުގައި ހުރި މިސައިލް ނިޒާމުތަކުގެ 80 އިންސައްތައަށްވުރެ ގިނަ ތަކެތި އަދިވެސް ސަލާމަތުން އެބަހުރި ކަމަށެވެ. އަދި ކޮންމެ ވަގުތަކުވެސް ރައްދު ހަމަލާ ދޭން ތައްޔާރަށް ތިބި ކަމަށް އީރާނުން ބުނެއެވެ.

މި ހަމަނުޖެހުންތަކުގެ ތެރޭގައި މައުލޫމާތުގެ ހަނގުރާމައެއްވެސް ވަނީ ފެށިފައެވެ. އެމެރިކާގެ ހަކަތައާ ބެހޭ ވަޒީރު ކްރިސް ރައިޓް، އެމެރިކާގެ ކަނޑުގެ ސިފައިންގެ ހިމާޔަތުގައި ތެޔޮ ބޯޓެއް ކަނޑުއޮޅިން ދަތުރުކޮށްފައިވާ ކަމަށް ވިދާޅުވެ އެކްސްގައި ކުރެއްވި ޕޯސްޓެއް ކުޑަވަގުތުކޮޅެއްގެ ތެރޭގައި ވަނީ ފޮހެލާފައެވެ. މިކަމާ ގުޅިގެން އީރާނުގެ މަޖިލީހުގެ ރައީސް ވަނީ މަލާމާތް ކުރައްވައި، އެފަދަ ކަމެއް ހިނގާނީ ހަމައެކަނި "ޕްލޭސްޓޭޝަން" ކުޅޭއިރު ކަމަށް ވިދާޅުވެފައެވެ.

އިގްތިސާދީ ގޮތުން ބަލާއިރު، މި ހަމަނުޖެހުންތަކާ ގުޅިގެން ތެލުގެ ބާޒާރަށް ވަނީ ބޮޑު ލޮޅުމެއް އަރާފައެވެ. ކަނޑުއޮޅި ބަންދުކޮށްފާނެ ކަމުގެ ބިރަށް ބްރެންޓް ކުރޫޑް ތެޔޮ ފީފާއެއްގެ އަގު 120 ޑޮލަރަށް އުފުލިގެން ދިޔުމަށްފަހު، މިއަދު ހެނދުނު (މާރިޗު 11) އަގުތައް ވަނީ އަނެއްކާވެސް 87 އާއި 90 ޑޮލަރާ ދެމެދުގެ މިންވަރަކަށް ތިރިވެފައެވެ. ތަޖުރިބާކާރުން ބުނާ ގޮތުގައި މި މަސްރަހު ފިނިނުވެ ދިގުލައިގެން ހިނގައްޖެނަމަ، ދުނިޔޭގެ އިގްތިސާދަށް އޭގެ ނޭދެވޭ އަސަރު ވަރަށް ބޮޑަށް ކުރާނެއެވެ.