މެދުއިރުމަތީގައި މިހާރު ހިނގަމުންދާ ހަމަނުޖެހުންތަކާ ގުޅިގެން ނޫސްވެރިންނަށް މައުލުމާތިު ދިނުމުގެ ބައްދަލުވުމެއް މިއަދު ހަވީރު ބޭއްވުމަށް ރައީސުލްޖުމްހޫރިއްޔާގެ އޮފީހުން ނިންމައިފިއެވެ.

ރައީސުލްޖުމްހޫރިއްޔާގެ އޮފީހުން ބުނީ ނޫސްވެރިންގެ ބައްދަލުވުން އޮންނާނީ މިއަދު ހަވީރު 4:15 ގައި ރައީސް އޮފީހުގައި ކަމަށެވެ.އަދި މިއީ މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން ދިވެހި ރައްޔިތުންނަށް ކުރިމަތިވެދާނެ ދަތިތަކާއި ކުރިމަތިވާ ކަންކަން ޙައްލުކުރުމަށް ގުޅިގެން ފިޔަވަޅުތައް އެޅުމަށް ރައީސުލްޖުމްހޫރިއްޔާ އުފައްދަވައިފައިވާ ވަޒީރުންގެ ހާއްސަ ކޮމެޓީން ބާއްވާ ބައްދަލުވުމެއް ކަމަށެވެ.

Ad by Hajj Corporation

ރައީސް ޑރ. މުއިއްޒު، މި ކޮމެޓީ އުފައްދަވާފައިވަނީ މާރޗު 1 ވަނަ ދުވަހުއެވެ. މި ކޮމެޓީގައި 9 މެމްބަރުން ހިމެނިވަޑައިގަންނަވައެވެ.

ކޮމެޓީގެ ޗެއަރޕާރސަންއަކީ ފޮރިން މިނިސްޓަރ ޑޮކްޓަރ ޢަބްދުﷲ ޚަލީލް ހަމަޖައްސަވާފައިވާއިރު، ދެން ހިމެނިވަޑައިގަންނަވަނީ ޑިފެންސް މިނިސްޓަރ މުޙައްމަދު ޣައްސާން މައުމޫން، ފިނޭންސް މިނިސްޓަރ މޫސާ ޒަމީރު، އިކޮނޮމިކް މިނިސްޓަރ މުޙައްމަދު ސަޢީދު، ޓްރާންސްޕޯޓް މިނިސްޓަރ މުޙައްމަދު އަމީންއެވެ. އަދި ހޯމް މިނިސްޓަރ ޢަލީ އިޙްސާންއާއި ޓޫރިޒަމް އެންޑް އެންވަޔަރަންމަންޓް މިނިސްޓަރ ޠާރިޤު އިބްރާހީމްއާއި ހަޔަރ އެޑިއުކޭޝަން މިނިސްޓަރ ޑޮކްޓަރ ޢަލީ ޙައިދަރު އަޙްމަދުއާއި އިސްލާމިކް މިނިސްޓަރ ޑޮކްޓަރ މުޙައްމަދު ޝަހީމް ޢަލީ ސަޢީދު ވެސް ހިމެނިވަޑައިގަންނަވައެވެ.