އެމެރިކާގެ ކެލިފޯނިއާގެ ލޮސް އެންޖެލިސްގައި ބޭއްވި އޮސްކާ އެވޯޑް ދިނުމުގެ ރަސްމިއްޔާތުގައި، އެވޯޑެއް ހަވާލުކުރަމުން ސްޕެއިންގެ މަޝްހޫރު އެކްޓަރު ހަވިއޭ ބާޑެމް ވަނީ ދުނިޔޭގައި ސުލްހަ ގާއިމުކުރުމަށާއި ފަލަސްތީނަށް މިނިވަންކަން ދިނުމަށް ގޮވާލާފައެވެ.

އެންމެ މޮޅު ބައިނަލްއަގުވާމީ ފިލްމަށް ދޭ އޮސްކާ އެވޯޑް އިއުލާނު ކުރަން ޕޯޑިއަމް ކައިރިއަށް ހުއްޓި، ބާޑެމް އޭނާގެ ވާހަކަ ފެށީ "ހަނގުރާމައަށް ނޫނެކޭ" ބުނަމުންނާއި "ފަލަސްތީނު މިނިވަންކުރޭ" މިފަދައިން ގޮވާލަމުންނެވެ.

Ad by Hajj Corporation

މި ރަސްމިއްޔާތުގައި ބާޑެމް ބައިވެރިވީ އިސްޕެއިން ބަހުން "ހަނގުރާމައަށް ނޫނެކޭ" (No a la guerra) ލިޔެފައިވާ ބެޖެއްގެ އިތުރުން، ފަލަސްތީނަށް ތާއީދުކުރާކަން ހާމަކޮށްދޭ ބެޖެއް އޭނާގެ ހެދުމުގައި ޖަހައިގެންނެވެ.

2023 ވަނަ އަހަރުގެ އޮކްޓޫބަރު މަހުން ފެށިގެން އިސްރާއީލުން ޣައްޒާގައި ހިންގަމުންދާ ގަތުލުއާންމުތަކުގައި މިހާތަނަށް 72,000 އަށްވުރެ ގިނަ ފަލަސްތީނު ރައްޔިތުން ޝަހީދުކޮށްލާފައިވާއިރު، 172,000 އަށްވުރެ ގިނަ މީހުން ވަނީ ޒަހަމްކޮށްލާފައެވެ. އަދި ޣައްޒާގެ އާންމު އުމްރާނީ ވަސީލަތްތަކުގެ 90 އިންސައްތަ ވަނީ އިސްރާއީލުގެ ހަމަލާތަކުގައި ސުންނާފަތިކޮށްލާފައެވެ.