އެމެރިކާއާއި އީރާނާ ދެމެދު އޮތް ހަމަނުޖެހުންތަކާއި ހަނގުރާމައިގެ ހާލަތު ނިމުމަކަށް ގެނައުމަށްޓަކައި އެމެރިކާއިން ހުށަހަޅާ ދެމެހެއްޓެނިވި ހުށަހެޅުންތަކެއް އަޑުއަހަން ތެހެރާން އޮތީ ތައްޔާރަށް ކަމަށް އީރާނުގެ މަސްދަރަކުން ބުނެފިއެވެ.

އަންގާރަ ދުވަހު ‘’ސީއެންއެން’’އަށް މައުލޫމާތު ދެމުން އެ މަސްދަރުން ބުނީ، ވޭތުވެދިޔަ ދުވަސްތަކުގައި ވޮޝިންޓަނުން އިސްނަގައިގެން ދެ ގައުމުގެ ދެމެދުގައި ގުޅުން ބަދަހިކުރުމުގެ މަސައްކަތްތަކެއް ކޮށްފައިވާ ކަމަށެވެ.

Ad by Hajj Corporation

އެ މަސްދަރުން ހާމަކުރި ގޮތުގައި، ހަނގުރާމަ ނިމުމަކަށް ގެނައުމަށް އެއްބަސްވުމަކަށް އާދެވިދާނެތޯ ބެލުމަށްޓަކައި އެކި މެދުވެރިން މެދުވެރިކޮށް އެމެރިކާގެ މެސެޖުތައް އީރާނަށް ވަނީ ލިބިފައެވެ. 

"ވޭތުވެދިޔަ ދުވަސްތަކުގައި ވޮޝިންޓަނުން އިސްނަގައިގެން އެމެރިކާއާއި އީރާނާ ދެމެދު ގުޅުން ބަދަހިކުރުމުގެ މަސައްކަތްތަކެއް ވަނީ ކުރެވިފައި، ނަމަވެސް އެއީ ފުރިހަމަ މަޝްވަރާތަކެއްގެ މަރުހަލާއަށް ދިޔަ ކަމެއް ނޫން،" އެ މަސްދަރުން ބުންޏެވެ.

މި ހުށަހެޅުންތަކުގެ މައިގަނޑު މަގްސަދަކީ ހަމައެކަނި ހަމަލާބަދަލުކުރުން ހުއްޓާލުން ނޫން ކަމަށާއި، އަމާޒަކީ ދެ ގައުމުގެ ދެމެދުގައިވާ ހަމަނުޖެހުންތަކަށް ދާއިމީ ހައްލެއް ހޯދުން ކަމަށް އީރާނުން ބުނެއެވެ. އީރާނުން ސީދާ ވާހަކަތަކަކަށް އެދިފައި ނުވި ނަމަވެސް، ގައުމީ މަސްލަހަތު ހިމާޔަތްކުރެވޭ ފަދަ އަމަލީ ރޭވުމެއް ލިބިއްޖެނަމަ އެކަމަށް ވިސްނާނެ ކަމުގެ އިޝާރާތެއް ވަނީ ދީފައެވެ.

ނިއުކްލިއާ މައްސަލައާ ގުޅޭގޮތުން ވާހަކަ ދައްކަމުން އެ މަސްދަރުން ބުނީ، އީރާނުން ދުވަހަކުވެސް ނިއުކްލިއާ ހަތިޔާރު ނުއުފައްދާނެ ކަމުގެ ޔަގީންކަން ދޭން ތައްޔާރަށް އޮތް ނަމަވެސް، ސުލްހަވެރި ބޭނުންތަކަށް އެ ޓެކްނޮލޮޖީ ބޭނުންކުރުމުގެ ހައްގު އޮންނަންޖެހޭނެ ކަމަށެވެ. އަދި ކޮންމެ އެއްބަސްވުމެއްގައި ވެސް އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުން ހިމެނުމަކީ ކޮންމެހެން ބޭނުންތެރި ކަމެއް ކަމަށް އެ މަސްދަރުން ބާރުއަޅައި ބުންޏެވެ.

އެމެރިކާގެ ރައީސް ޑޮނަލްޑް ޓްރަމްޕް މިކަމާ ގުޅޭގޮތުން ދައްކަވާފައިވާ ވާހަކަތަކަށް ވަކި އެއްޗެއް ބުނަން އީރާނުގެ މަސްދަރުން އިންކާރު ކުރި ނަމަވެސް، ތެހެރާނުގެ މަގާމަކީ އަބަދުވެސް ސާފު މަގާމެއް ކަމަށާއި، ގައުމުގެ މަސްލަހަތު ހިމާޔަތްކުރެވޭ ކޮންމެ ހުށަހެޅުމަކަށް ވެސް މަރުހަބާ ކިޔާނެ ކަމަށް ވަނީ ބުނެފައެވެ.