މި އަހަރުގެ ކޮޕަ އެމެރިކާގެ ފައިނަލްގައި އާޖެންޓީނާގެ ތަރި ލިއޮނަލް މެސީއަށްއަށް ލިބުނު އިންޖަރީއަށް ފަހު، ގައުމީ ޓީމުގެ ފުރަތަމަ ފަހަރަށް އޭނާ ހިމެނިއްޖެއެވެ.

ކޮޕަ އެމެރިކާގެ ޗެމްޕިއަންކަން ވެސް ހޯދި އާޖެންޓީނާގެ ޓީމުގެ ކެޕްޓަން މެސީގެ ފައިގެ ކުޑަ ހުޅަށް ލިބުނު އަނިޔާގެ ސަބަބުން ކުޅުމާ ދުރުގައި ގާތްގަޑަކަށް މަހެއް ވަރު ހުރުމަށްފަހު، މެސީ އެނބުރި އޭނާގެ ޓީމާ ވެސް ގުޅުނީ މިދިޔަ ހަފުތާގެ ތެރޭގައެވެ.

އެގޮތުން ކުރިއަށް އޮތް ވޯލްޑް ކަޕް ކޮލިފައިންގެ މެޗްގައި، ވެނެޒުއެލާއާ ދެކޮޅަށް ކުޅޭ މެޗުގައި މެސީ ކުޅޭނެ ކަމުގައި އެ ޓީމުގެ ކޯޗު ލިއޮނަލް ސްކަލޯނީ ވަނީ ބުނެފައެވެ. އެގޮތުން މިހާރު މެސީ އަންނަނީ ޓީމުގެ ފަރިތަކުރުންތަކުގައި ބައިވެރިވެ، ރަނގަޅު ކުޅުމެއް ވެސް ދައްކަމުންނެވެ.

އިންޖަރީން އެނބުރި އައިސް މެސީވަނީ، އޭނާ ކުޅޭ އިންޓަ މިއާމީއަށް ވެސް ދެ ލަނޑު ޖަހައިދީ ތައްޓެއް ހޯދައިދީފައެވެ.