ސިޔާސީ ޕާޓީތަކުގައި 10،000 މެމްބަރުން ހަމަނުވިޔަސް ފައިސާ ލިބޭގޮތަށް ސިޔާސީ ޕާޓީގެ ޤާނޫނަށް ގެންނަން ފެންނަ އިޞްލާޙުތައް އެޓަރނީ ޖެނެރަލްގެ އޮފީހަށް މިއަދު ފޮނުވައިފިއެވެ.

ގަވާއިދަށް ގެނެވުނު އިސްލާހުގައިވާގޮތުން ސިޔާސީ ޕާޓީތަކަށް ޚާއްސަކޮށްފައިވާ ބަޖެޓު 4 ބަޔަކަށް ބަހާލެވޭނެއެވެ. އެއީ އިލެކްޝަންސް ކޮމިޝަނުގައި ރަޖިސްޓްރީވެފައިވާ 3،000 މެންބަރުން ހަމަވާ ހުރިހާ ޕާޓީތަކުގެ އިތުރުން 10،000 މެންބަރުން ހަމަވާ ޕާޓީތަކަށާއި މަޖިލިސް އިންތިޚާބާއި ލޯކަލް ކައުންސިލް އިންތިޚާބުގައި ޕާޓީތަކުގެ ކާމިޔާބީއަށެވެ. ޤާނޫނުގައިވާ ގޮތުން ސިޔާސީ ޕާޓީތަކަށް ދޭން ކަނޑައަޅާ ފައިސާގެ 25 އިންސައްތަ ހާއްސަ ކުރާނީ ހުރިހާ ސިޔާސީ ޕާޓީތަކަށެވެ. މަޖިލިސް އިންތިޚާބުގައި ޕާޓީތަކުން ހޯދާ ކާމިޔާބީއަށް 30 އިންސައްތަ އަދި ލޯކަލް ކައުންސިލް އިންތިޚާބުގައި ހޯދާ ކާމިޔާބީއަށް 20 އިންސައްތަ ހާއްސަކުރުމަށްވަނީ ނިންމާފައެވެ.

މިކަމާ ގުޅިގެން އިލެކްޝަން ކޮމިޝަނުން ބުނީ އިޞްލާޙުތަކާބެހޭ ގޮތުން މަޝްވަރާ ކުރުމަށް ހުރިހާ ސިޔާސީ ޕާޓީތަކަށް ދަޢުވަތުދީގެން 2024 އޮކްޓޫބަރު 8 ވީ އަންގާރަ ދުވަހު ވަނީ އިތުރު ބައްދަލުވުމެއް ބާއްވާފައިކަަމށެވެ. މި ބައްދަލުވުމުގައި، ދިވެހި ރައްޔިތުންގެ ޑިމޮކްރެޓިކް ޕާޓީ، ޖުމްހޫރީ ޕާޓީ، މޯލްޑިވްސް ޑިވެލޮޕްމަންޓް އެލަޔަންސް އަދި މޯލްޑިވްސް ނޭޝަނަލް ޕާޓީ، އަދި ކޮމިޝަނުގެ ފަސް މެމްބަރުންނާއި ސެކްރެޓަރީ ޖެނެރަލްގެ އިތުރުން ގުޅުންހުރި ސެކްޝަންތަކުގެ ވެރިން ބައިވެރިވިކަމަށް އީސީން މައުލޫމާތުދެއެވެ.

މި ބައްދަލުވުމުގައި ސިޔާސީ ޕާޓީގެ ޤާނޫނަށް ގެންނަ އިޞްލާޙުތަކަށް އިތުރަށް މަޝްވަރާކޮށް ހުށަހެޅުންތައް ހުށަހަޅާފައިވާކަމަށާއި ސިޔާސީ ޕާޓީގެ ޤާނޫނަށް ގެންނަން މި ހުށަހަޅާ އިޞްލާޙުތަކުގެ ސަބަބުން، ސިޔާސީ ޕާޓީތަކުގެ ދަފްތަރު ޒަމާނީ ޑިޖިޓަލް ނިޒާމަކަށް ބަދަލުކުރުމުގެ ފުރުޞަތު ފަހިވެ، ސިޔާސީ ޕާޓީތަކުގެ ހިންގުން ހަރުދަނާވެ، އިތުރު ފަސޭހަތަކެއް ލިބިގެން ދާނެކަމަށް އީސީން ބުނެއެވެ.