ޕީއެންސީގެ ފަރާތުން މާޅެ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ރައީސާގެ މަގާމަށް ކުރިމަތިލައްވާފައިވާ ކެންޑިޑޭޓު، އާޝިޔަތު އަލައިކާ އަދުނާންގެ ހުޅުމާލެ ކެމްޕެއިން އޮފީސް، ދޫނި މާލަން، ރަސްމީކޮށް ހުޅުވައިފިއެވެ.

މިކަމަށްޓަކައި ބޭއްވި ހާއްސަ ރަސްމިއްޔާތެއްގައި ކެމްޕެއިން އޮފީސް ރަސްމީކޮށް ހުޅުވައިދެއްވީ، ރައީސުލްޖުމްހޫރިއްޔާގެ އަނބިކަނބަލުން، ސާޖިދާ މުޙައްމަދެވެ.

Ad by Hajj Corporation

މި ރަސްމިއްޔާތުގައި ރައީސްގެ އަނބިކަނބަލުންގެ އިތުރުން، ޕީއެންސީގެ މޭޔަރ ކެންޑިޑޭޓު، މޫސާ ޢަލީ ޖަލީލު އަދި ޕީއެންސީގެ ފަރާތުން މާލެ ސިޓީ ކައުންސިލް އަދި މާލެ ސިޓީގެ އަންހެނުންގެ ތަރައްގީއަށް މަސައްކަތްކުރާ ކޮމެޓީއަށް ކުރިމަތިލައްވާ ކެންޑިޑޭޓުން ބައިވެރިވެވަޑައިގަތެވެ.

މިރަސްމިއްޔާތުގައި ވާހަކަދައްކަވަމުން އަލައިކާ ވަނީ، އެކަމަނާގެ ކެމްޕެއިންގެ މައިގަނޑު ޝިޢާރު ކަމަށްވާ "ބަދަހި ޢާއިލާ" ގެ ދަށުން އެކަމަނާ ގެންގުޅުއްވާ ބައެއް ތަޞައްވުރުތައް ހިއްސާކުރައްވާފައެވެ. އެގޮތުން، ގައުމެއް ތަރައްގީވުމަށްޓަކައި، އެގައުމެއްގެ ކޮމިއުނިޓީތައްވެސް ތަރައްގީވާން ޖެހޭކަން އަލައިކާ ފާހަގަކުރެއްވިއެވެ. އަދި، އެ ކޮމިއުނިޓީތައް ތަރައްގީވުމަށްޓަކައި، ކޮމިއުނިޓީތަކުގައި ދިރިއުޅޭ އާއިލާތައް ތަރައްގީވާން ޖެހޭކަމަށާއި މިކަން ހާސިލުވާނީ އެ އާއިލާތަކުގެ މެދުގައި އޮންނަ ގުޅުން ބަދަހިވެގެންކަމަށް އަލައިކާ ވިދާޅުވިއެވެ.

އަންނަ ހޮނިހިރު ދުވަހު، އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިޚާބާއި ލޯކަލް ކައުންސިލްތަކުގެ އިންތިޚާބުގެ އިތުރުން، ރިޔާސީ އިންތިޚާބު އަދި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބޭއްވުމާމެދު ރައްޔިތުންގެ ޚިޔާލު ހޯދުމަށް ނަގާ ވޯޓުވެސް ކުރިއަށްދާނެއެވެ.