2022 ވަނަ އަހަރުގެ ވޯލްޑް ކަޕަށްފަހު ފުރަތަމަ ފަހަރަށް އިންގްލެންޑް ގައުމީ ޓީމަށް ކުޅެދިން މެޗުގައި، އާސެނަލްގެ ޑިފެންޑަރު ބެން ވައިޓް ލަނޑެއް ޖަހައި އަދި ޕެނަލްޓީއެއް ދިން މެޗުން އުރުގުއާއީއާ ވާދަކޮށް 1-1 އިން އިންގްލެންޑް އެއްވަރުވެއްޖެއެވެ. ވެމްބްލީ ސްޓޭޑިއަމްގައި ކުޅުނު މި އެކުވެރިކަމުގެ މެޗަކީ ތޯމަސް ޓުޗެލްގެ އިރުޝާދުގެ ދަށުން އިންގްލެންޑުން ކުޅުނު ފޯރިގަދަ މެޗެކެވެ.

ކުރީގެ ކޯޗު ގަރެތު ސައުތުގޭޓްގެ ދައުރުގައި ގައުމީ ޓީމަށް ކުޅެން އިއުތިރާޒުކޮށްފައިވާތީ، ބެން ވައިޓް ދަނޑަށް އެރި ވަގުތު ވެމްބްލީގެ ގިނަ ސަޕޯޓަރުން ވަނީ އޭނާއަށް މަލާމާތްކޮށް އަޑުގަދަކޮށްފައެވެ. ނަމަވެސް މެޗުގެ 81 ވަނަ މިނެޓުގައި ހާވީ ބާންސް ފޮނުވާލި ހަމަލާއެއްގައި ފައި ޖައްސައި، އިންގްލެންޑަށް ލީޑު ނަގައިދިނީ ވައިޓްއެވެ. މިއީ ގައުމީ ޓީމަށް އޭނާ ޖަހައިދިން ފުރަތަމަ ލަނޑެވެ.

Ad by Hajj Corporation

އިންގްލެންޑް މޮޅުވާން ދަނިކޮށް، މެޗުގެ އިތުރު ވަގުތުގެ ތެރޭގައި ވައިޓް އަތުން ވީ ފައުލަކާ ގުޅިގެން ވީއޭއާރު ބެލުމަށްފަހު ރެފްރީ ވަނީ އުރުގުއާއީއަށް ޕެނަލްޓީއެއް ދީފައެވެ. މި ޕެނަލްޓީ ކާމިޔާބުކޮށް އުރުގުއާއީއަށް ނަތީޖާ އެއްވަރުކޮށްދިނީ ރެއާލް މެޑްރިޑްގެ މިޑްފީލްޑަރު ފެޑެރީކޯ ވަލްވާޑޭއެވެ. މިއީ 1974 ވަނަ އަހަރަށްފަހު ވެމްބްލީގައި މެޗުގެ ފަހު މިނެޓުގައި އިންގްލެންޑް ކޮޅަށް ޕެނަލްޓީއަކުން ލަނޑެއް ވަން ފުރަތަމަ ފަހަރެވެ.

މި މެޗުގައި ރެފްރީގެ ބައެއް ނިންމުންތަކާ މެދު އިންގްލެންޑްގެ ކޯޗު ޓުޗެލް ވަނީ ވަރަށް ބޮޑަށް ހިތްހަމަނުޖެހުން ފާޅުކޮށްފައެވެ. އުރުގުއާއީގެ މެނުއަލް އުގާޓޭއަށް ދެވަނަ ރީނދޫ ކާޑެއް ދައްކަން ޖެހޭ ހާލަތެއްގައި ރެފްރީ އެކަން ނުކުރުމާއި، ފިލް ފޯޑަންއަށް ކުރި ނުރައްކާތެރި ފައުލަކަށް ރޮނާލްޑް އަރައުހޯއަށް އަދަބެއް ނުދިނުމުން އިންގްލެންޑްގެ ބެންޗުން ވަނީ ނުރުހުން ފާޅުކޮށްފައެވެ.

މި މެޗަކީ އިންގްލެންޑްގެ ގޯލްކީޕަރު ޖޭމްސް ޓްރެފޯޑް ގައުމީ ޓީމަށް ކުޅެދިން ފުރަތަމަ މެޗެވެ. އިންގްލެންޑުން ޖެހިޖެހިގެން ހަތް މެޗުގައި ބައިކޮޅަށް ލަނޑެއް ނުވައްދައި ހިފަހައްޓަން ކުރި އުއްމީދު މި ޕެނަލްޓީއާއެކު ވަނީ ގެއްލިފައެވެ. އުރުގުއާއީއަށް މުޅި މެޗުގައިވެސް ގޯލާ އަމާޒުކޮށް ފޮނުވާލެވުނު ހަމައެކަނި ހަމަލާއަކީ ވަލްވާޑޭ ކާމިޔާބުކުރި ޕެނަލްޓީއެވެ.