ޔުއެފާ ނޭޝަންސް ލީގުގެ ގްރޫޕް އޭ3 ގައި 10 ކުޅުންތެރިންނާއެކު ކުޅުނު ޗެކިއާގެ މައްޗަށް 2-0 ގެ ނަތީޖާއަކުން މޮޅުވެ، އިނގިރޭސިވިލާތުން ތޯމަސް ޓުޗެލްގެ އިރުޝާދުގެ ދަށުން ފުރަތަމަ މޮޅު ހޯދައިފިއެވެ. މި މެޗުގައި އިނގިރޭސިވިލާތަށް ލަނޑުތައް ކާމިޔާބުކޮށްދިނީ ވިދިވިދިގެން ދެވަނަ މެޗުގައި ގޯލު ޖެހި އެންތަނީ ގޯޑަން އާއި ކެޕްޓަން ހެރީ ކޭންއެވެ.

މެޗުގެ ކުރީކޮޅު ޗެކިއާއިން ނުރައްކާތެރި ހަމަލާއެއް އުފެއްދި ނަމަވެސް، ޕަވެލް ސުލްޗް އެއްކޮށް ހުސްކޮށް އަރައި ފޮނުވާލި ހަމަލާ އިނގިރޭސި ކީޕަރު ޖޭމްސް ޓްރެފޯޑް ވަނީ ދިފާއުކޮށްފައެވެ. ނަމަވެސް މެޗުގެ 25 ވަނަ މިނެޓުގައި ސުލްޗް، އެލިއަޓް އެންޑަސަންއަށް ކުރި ނުރައްކާތެރި ފައުލަކާ ގުޅިގެން ވީއޭއާރު ބެލުމަށްފަހު ރެފްރީ ވަނީ އޭނާއަށް ސީދާ ރަތް ކާޑެއް ދައްކައި ދަނޑުން ފޮނުވާލާފައެވެ.

Ad by Hajj Corporation

އެއް ކުޅުންތެރިއަކު މަދުކޮށް ކުޅެމުންދިޔަ ޗެކިއާގެ ގޯލު އިނގިރޭސިން ފޫއަޅުވާލީ ދެވަނަ ހާފު ފެށިގެން އެންމެ 67 ސިކުންތުގެ ތެރޭގައެވެ. ދެ އަހަރެއްހާ ދުވަހަށްފަހު ގައުމީ ޓީމަށް ކުޅުނު ޓްރެންޓް އެލެގްޒެންޑާ-އާނޯލްޑް ނަގައިދިން ހިތްގައިމު ހުރަހަކުން މި ލަނޑު ބޮލުން ކާމިޔާބުކުރީ ގޯޑަންއެވެ. މިއީ އޭނާ އެންމެ ފަހުން ކުޅުނު 9 މެޗުގައި ހިއްސާވި 8 ވަނަ ގޯލެވެ.

އިނގިރޭސިވިލާތުން ލީޑު ފުޅާކުރީ 68 ވަނަ މިނެޓުގައެވެ. މޯގަން ރޮޖާސްއަށް ލިބުނު ބޯޅަ ގެއްލުމުން، އެ ބޯޅަ ހޯދައި ތިރިތިރިން ގޯލުގެ ކަނަށް ފޮނުވާލައިގެން މި ލަނޑު ޖެހީ ހެރީ ކޭންއެވެ. މިއީ 2024-25 ވަނަ އަހަރުގެ ނޭޝަންސް ލީގުގައި ކޭން ކުޅުނު 7 މެޗުން ޖެހި 5 ވަނަ ލަނޑެވެ.

މެޗުގެ ފަހުކޮޅު ޗެކިއާގެ އެޑަމް ހްލޮޒެކް ފޮނުވާލި ބާރު ހަމަލާ ޓްރެފޯޑް ދިފާއުކުރިއިރު، އެބެރެޗީ އެޒޭ އަދި ޖޫޑް ބެލިންހަމް ފޮނުވާލި ހަމަލާތައް ޗެކިއާގެ ކީޕަރު ކޮވާރ ވަނީ ހުއްޓުވާފައެވެ. މި މޮޅާއެކު އިނގިރޭސިވިލާތަށް މުހިންމު 3 ޕޮއިންޓް ލިބިފައިވާއިރު، ވޭތުވެދިޔަ ހަ މެޗުގައި 13 ލަނޑު ވަދެފައިވާ އިނގިރޭސި ޓީމަށް ބައިކޮޅަށް ލަނޑެއް ނުވަދެ މެޗު ނިންމާލެވުމަކީ ލިބުނު ބޮޑު ހިތްހަމަޖެހުމެކެވެ.