ވޯލްޑް ކަޕްގެ ކުރިން އަމިއްލަ ގައުމުގައި ކުޅުނު ފަހު އެކުވެރިކަމުގެ މެޗުގައި، އިންގްލެންޑް ޓީމު ޖަޕާން އަތުން 1-0 އިން ބަލިވެއްޖެއެވެ. ވެމްބްލީ ސްޓޭޑިއަމްގައި ކުޅުނު މި މެޗުގައި ޖަޕާނުން ހޯދި މި ތާރީޚީ މޮޅަކީ އޭޝިއާގެ ގައުމަކުން އިންގްލެންޑް ބަލިކުރި ފުރަތަމަ ފަހަރެވެ.

މެޗުގެ ހަމައެކަނި ލަނޑު ފެނިގެންދިޔައީ ފުރަތަމަ ހާފުގެ 23 ވަނަ މިނެޓުގައެވެ. ބްރައިޓަންގެ ވިންގަރ ކައޯރު މިޓޯމާ މި ލަނޑު ކާމިޔާބުކުރީ ކެއިޓޯ ނަކަމޫރާ ތަނަވަސްކޮށްދިން ފުރުސަތަކުންނެވެ. މި ލަނޑާއެކު، އިންގްލެންޑްގެ ގޯލްކީޕަރު ޖޯޑަން ޕިކްފޯޑް ބައިކޮޅަށް ލަނޑެއް ނުވަދެ ދަމަހައްޓަމުން އައި 922 މިނެޓުގެ ރެކޯޑަށް ވަނީ ނިމުން އައިސްފައެވެ.

Ad by Hajj Corporation

ކޭންގެ ބަދަލުގައި ފިލް ފޯޑަން 'ފޯލްސް ނައިން' އެއްގެ ގޮތުގައި ބޭނުންކޮށްގެން ތޯމަސް ޓުޗެލް ކުރި ތަޖުރިބާ ކާމިޔާބުވާ ގޮތެއް ނުވިއެވެ. މެޗުގެ ކުރީކޮޅު އިންގްލެންޑަށް އެޓޭކުގައި މާ ބޮޑު ނުރައްކަލެއް ކުރިމަތި ނުކުރެވުނުއިރު، އެލިއޮޓް އެންޑަސަން ފޮނުވާލި ބާރު ހަމަލާއެއް ޖަޕާނުގެ ކީޕަރު ޒިއޯން ސުޒުކީ ވަނީ ހުޝިޔާރުކަމާއެކު ދިފާއުކޮށްފައެވެ.

ދެވަނަ ހާފުގައި ޓުޗެލް ވަނީ ފޯޑަންގެ ބަދަލުގައި ޑޮމިނިކް ސޮލާންކޭ ކުޅެން އަރުވައި، އެޓޭކް ވަރުގަދަކުރަން މަސައްކަތް ކޮށްފައެވެ. މާކަސް ރަޝްފޯޑާއި ލުވިސް ހޯލް ފޮނުވާލި ހަމަލާތައް ކީޕަރު ސުޒުކީ ދިފާއުކުރިއިރު، ހެރީ މެގުއަޔާ ބޮލުން ފޮނުވާލި ބޯޅައެއް ޖަޕާނުގެ ޔުކިނާރީ ސުގަވާރާ ވަނީ ގޯލުގެ ރޮނގުމަތިން ސަލާމަތްކޮށްފައެވެ.

މިއީ ޓުޗެލްގެ އިރުޝާދުގެ ދަށުން އިންގްލެންޑް ކުޅުނު 12 މެޗުގެ ތެރެއިން ބަލިވި ދެވަނަ މެޗެވެ. ތަފާސްހިސާބުތަކަށް ބަލާއިރު، އިންގްލެންޑުން ގިނަ ފުރުސަތުތަކެއް ތަނަވަސްކުރި ނަމަވެސް އެޓޭކުގައި ކޭން ނެތްތަން ވަރަށް ބޮޑަށް ފާހަގަކުރެވުނެވެ. ޚާއްސަކޮށް ފޯޑަން އާއި ކޯލް ޕާމަރަށް މުޅި މެޗުގައިވެސް ގޯލާ އަމާޒުކޮށް އެންމެ ހަމަލާއެއްވެސް ފޮނުވާލެވިފައެއް ނުވެއެވެ.

ވޯލްޑް ކަޕް ބޯމަތީގައި އޮތްއިރު، ޖަޕާނުން ހޯދި މި ފަސްވަނަ ޖެހިޖެހިގެން މޮޅާއެކު، އިންގްލެންޑްގެ ފޯވާޑް ލައިނަށް ދިމާވެފައިވާ މައްސަލަތަކަށް އަވަސް ހައްލެއް ހޯދަން ޓުޗެލްއަށް ވަނީ މަޖުބޫރުވެފައެވެ.