ބީއެމްއެލް އެފޯޑަބަލް ހައުސިން މަޝްރޫއުގެ ދަށުން އިތުރު 540 ހައުސިގ ޔުނިޓް ގާއިމު ކުރުމަށް ނިންމާފައިވާ ކަމަށާއި އަމާޒަކީ 2028 ވަނަ އަހަރު ނިމުމުގެ ކުރިން 3800 ހައުސިންގ ޔުނިޓް ތަރައްގީކުރުން ކަމަށް ބޭންކް އޮފް މޯލްޑިވްސް ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުހައްމަދު ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވީ ހުޅުމާލޭގައި އިމާރާތްކުރާ ހައުސިން ޔުނިޓްތަކުގެ ބިންގާ އެޅުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

Ad by Hajj Corporation

ސީއީއޯ ޝަރީފްގެ ވާހަކަފުޅުގައި ބޭންކް އޮފް މޯލްޑިވްސް އާއި ހައުސިންގ މިނިސްޓްރީ ގުޅިގެން ކުރިއަށް ގެންދާ އެފޯޑަބަލް ހައުސިން މަޝްރޫއުއަކީ ދިވެހި ކޮންމެ އާއިލާއަކަށް ބޯހިޔާވަކަން ކަށަވަރު ކޮށްދިނުމުގެ މަގްސަދުގައި ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒު އިސްނަންގަވައިގެން ފެއްޓެވި ގައުމީ މަޝްރޫއުއެއް ކަން ފާހަގަކުރެއްވިއެވެ. އަދި ބޯހިޔާވަހިކަމުގެ ހާލަތަށް ރިއާޔަތްކޮށް ބީއެމްއެލް އެފޯޑަބަލް ހޯމް ލީސިންގެ ދަށުން އިތުރު ހައުސިން ޔުނިޓްތަކެއް އެޅުމަށް ނިންމާފައިވާ ކަމަށް ޝަރީފް ވިދާޅުވިއެވެ.

ޝާރީފް ވިދާޅުވީ މި މަޝްރޫއުގެ ދަށުން މިހާތަނަށް 3260 ހައުސިންގ ޔުނިޓްގެ އަމަލީ މަސައްކަތް ފަށާފައިވާ ކަމަށެވެ. އަދި ހައުސިންގ މިނިސްޓްރީން މިހާރު އިތުރު ހައުސިންގ ޔުނިޓްތައް އެޅުމަށް ބިން ހަމަޖައްސާދީފައިވާކަން ފާހަގަ ކުރައްވާ ޝަރީފް ވިދާޅުވީ އެހެންކަމުން ބީއެމްއެލް އެފޯޑަބަލް ހައުސިން މަޝްރޫއުގެ ދަށުން އިތުރު 540 ހައުސިގ ޔުނިޓް ގާއިމު ކުރުމަށް ނިންމާފައިވާ ކަމަށެވެ.

ޝަރީފް ވިދާޅުވީ އަމާޒަކީ 2028 ވަނަ އަހަރު ނިމުމުގެ ކުރިން މި މަސައްކަތް ނިންމާލެވޭނެ، ގާބިލު ދިވެހި ކުންފުންޏަކާ، ނުވަތަ ކުންފުނިތަކަކާ މި މަސައްކަތް ހަވާލުކުރުން ކަމަށެވެ. އަދި މިއާއެކު ބީއެމްއެލް އެފޯޑަބަލް ހޯމް ލީސިންގ އިން ޖުމްލަ 3800 ހައުސިންގ ޔުނިޓް ތަރައްގީކުރެވިގެންދާނެ ކަމަށް ވިދާޅުވިއެވެ. ޝަރީފް ވިދާޅުވީ އުއްމީދަކީ ދާދި އަވަހަށް އެ 540 ޔުނިޓްގެ މަސައްކަތްތައްވެސް ފެށިގެން ދިޔުން ކަމަށެވެ.