މޫނު ބުރުގާ އަޅައިގެން އުނގެނުމާ ވަޒީފާ އަދާކުރުމުގެ ޙައްޤު ލިބޭނޭކަމަށް ރައީސުލްޖުމްގޫރިއްޔާ ޑރ. މުހައްމަދު މުޢިއްޒު ދެއްވި ޔަޤީންކަމަށް ސިވިލް ކޯޓުން ކުރި ޙުކުމެއްގައި ރިޢާޔަތްކޮށްފިއެވެ.

އެމްޑީޕީ ސަރުކާރުގަައި، ޢަރަބިއްޔާގައި ތަޢުލީމު ޙާޞިލްކުރަމުންދިޔަ ދަރިވަރުންތަކެއް މޫނު ބުރުގާ އަޅައިގެން ކިޔަވަން ދިއުން މަނާކޮށް، ތަޢުލީމު ޙާޞިލުކުރުމުގެ ފުރުޞަތު އެ ދަރިވަރުންނަށް ގެއްލުވާލުމާއި ގުޅިގެން އެޑިއުކޭޝަން މިނިސްޓްރީއާ ދެކޮޅަށް ބެލެނިވެރިން އައީ މައްސަލަ ހުށަހަޅަމުންނެވެ.

މިއާއެކު އައު ސަރުކާރު ވެރިކަމާ ހަވާލުވެ އޯގަސްޓުމަހުގެ 22 ވަނަ ދުވަހު ރައީސް މުއިއްޒުވަނީ އިސްލާމްދީނާއި ޚިލާފުނުވާ ގޮތަށް ހެދުން އަޅާނަމަ، އެމީހަކު އަޅާފައި ހުންނަ ހެދުމެއްގެ ސަބަބުން ވަޒީފާދިނުމުގައި އަދި ވަޒީފާ އަދާކުރުމުގައި އެއްވެސް ތަފާތެއް ކޮށްގެންނުވާނެކަމަށް ވިދާޅުވެފައެވެ. އެ ތަފާތުކުރުން ގެނުވާގޮތަށް ކުރީގައި ހަދާ އަދިވެސް ޢަމަަލުކުރަމުންދާ ހުރިހާ ގަވާއިދުތަކާއި އުސޫލުތައް ބަދަލު ކުރުމަކީ ކުރަންޖެހޭ ކަމެއްކަން ފާހަގަކުރައްވައި އެކަން ކުރުމަށް ކަމާބެހޭ ފަރާތްތަކަށް އަންގާފައިވާކަމަށާއި މި މުޖުތަމަޢު އަކީ ހުރިހާ މާނައެއްގައި ޢަދުލުވެރިކަމާއި އިންސާފުވެރިކަން އިސްކުރާ މުޖުތަމަޢަކަށް ހަދަންޖެހޭކަމަށް ރައީސް ވިދާޅުވެފައިވެއެވެ.

ސިވިލް ކޯޓަށް ހުށަހެޅުނު މައްސަލައަކީ އަރަބިއްޔާ ސުކޫލުގެ ދަރިވަރުން މޫނު ބުރުގާ އަޅައިގެން ސުކޫލަށް ހާޒިރުވަމުން ދަނިކޮށް، މޫނު ބުރުގާ އެޅުމަކީ ޔުނީފޯމް ކޯޑާ ހިލާފުކަމެއްކަން އަންގައި، މޫނު ބުރުގާ އަޅާ ކުދިންނަށް އެއްވެސް ތަފާތުކުރުމެއް ގެންގުޅެގެން ނުވާނެކަމުގައި ކަނޑއަޅައި ދައުލަތުގެ މައްޗަށް އަމުރުކޮށްދިނުމަށް އެދި ސިވިލްކޯޓަށް ހުށަހެޅުނު މައްސަލައެކެވެ.

މި މައްސަލައިގައި ސިވިލްކޯޓުގެ އިސް ޤާޟީ މަރިޔަމް ވަޙީދު އިއްވި ހުކުމުގައިވަނީ މައްސަލައިގައި ޝަރީއަތުން ގޮތެއް ކަނޑައަޅާނެތަނެއް ނެތްކަމަށް ނިންމާފައެވެ.