ނިމިދިޔަ އެމްޑީޕީގެ ވެރިކަމުގައި ޑެޕިއުޓީ މިނިސްޓަރުކަން ކުރަށްވާފައިވާ ޝިމާޒް އަލީގެ މައްޗަށް ބެންކް އޮފް މޯލްޑިވްސް (ބީއެމްއެލް) އަށް ފައިސާ ދެއްކުމަށް ސިވިލް ކޯޓުން ހުކުމެއް ކޮށްފިއެވެ.

މި ހުކުމަކީ ޝިމާޒް ނަގާފައިވާ ކްރެޑިޓް ކާޑަކަށް ކުރިން ކޮށްފައިވާ ހުކުމާ އެއްގޮތަށް ފައިސާ ދައްކަމުން ނުދާތީ ކުރެވުނު އިތުރު ހުކުމެކެވެ.

އެމްއާރުއެމްގެ ސްލޮޓެއްގައި ޑެޕިއުޓީ މިނިސްޓަރުކަމުގެ މަގާމު އަދާކުރެއްވި ޝިމާޒްގެ މައްޗަށް ފުރަތަމަ ހުކުމް ކުރެވުނީ 2020 ވަނަ އަހަރުއެވެ. އޭރު ޝިމާޒް ދައްކަންޖެހުނު އަދަދަކީ ބައިލައްކަ ރުފިޔާއެވެ. އެ ފައިސާ ނުދައްކައި އޮތުމުގެ ސަބަބުން އިންޓަރެސްޓާއެކު މިހާރު އެ އަދަދު ވަނީ ދެލައްކަ ރުފިޔާއަށް ވުރެ މައްޗަށް އަރާފައެވެ.

ސިވިލް ކޯޓުން މި ހަފްތާގައި ނެރުނު ހުކުމް ތަންފީޒު ކުރުމުގެ މައްސަލަ ނިމުނު ގޮތުގެ ރިޕޯޓުގައިވާ ގޮތުން، ބޭންކުން ވަނީ އެ ފައިސާ ދެއްކުމަށް ޝިމާޒަށް އަނެއްކާވެސް އިތުރު ފުރުސަތެއްދީ، އަހަރެއްގެ ތެރޭގައި ފައިސާ ދައްކާ ހަލާސް ކުރުމަށް ފުރުސަތުދީފައެވެ.

ރާއްޖޭގެ ފުޓުބޯޅަ އިދާރާ، އެފްއޭއެމާއި މޯލްޑިވްސް އޮލިމްޕިކް ކޮމިޓީގެ ކުރީގެ މީޑިއާ އޮފިސަރު ޝިމާޒް އަލީ އަށް ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރުކަން އޭރުގެ ރައީސް އިބްރާހީމް މުހައްމަދު ސޯލިހް ދެއްވީ 2019 ވަނަ އަހަރުގެ ފެންބުރުއަރީ މަހުގެ ތެރޭގައެވެ.