ނިމިދިޔަ ލޯކަލް ކައުންސިލް އިންތިހާބުގެ މ. ވޭވަށު ކައުންސިލްގެ މެންބަރުގެ ވޯޓު ފޮށި އަލުން ގުނުމަށްފަހުވެސް، އިންތިޚާބުގެ ނަތީޖާއަށް ބަދަލެއް ނައިސް އެމްޑީޕީގެ ކެންޑިޑޭޓް ކުރި ހޯދައިފި އެވެ.

މި އިންތިޚާބުގެ ވަގުތީ ނަތީޖާ ދައްކާގޮތުން، 2 ވޯޓުގެ ތަފާތުން ކުރިހޯދާފައިވަނީ އެމްޑީޕީގެ ކެންޑިޑޭޓް އަހުޝަން ނަޢީމެވެ. އިލެކްޝަންސް ކޮމިޝަނުން އޭރު ހާމަކުރި ވަގުތީ ނަތީޖާއިން ދައްކާގޮތުން، އަހުޝަން ނަޢީމަށް 122 ވޯޓު ލިބިފައިވެއެވެ. އޭނާއާ ވާދަކުރި ސަރުކާރު ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކެންޑިޑޭޓް މުޙައްމަދު ނަޒީޙަށް ލިބުނީ 120 ވޯޓެވެ.

Ad by Hajj Corporation

މި ވޯޓު ފޮށި އަލުން ގުނަން އިލެކްޝަންސް ކޮމިޝަނުން ނިންމީ، ބާތިލު ވޯޓުތަކާ ގުޅިގެން ނަތީޖާއާ މެދު ސުވާލު އުފެދި، ހުށަހެޅުނު ޝަކުވާއަކާ ގުޅިގެންނެވެ. ވޯޓު ފޮށި އަލުން ގުނުމަށްފަހު، ކުރިން ބާތިލު ވޯޓުގެ ގޮތުގައި ކަނޑައެޅި ވޯޓުތަކާއެކު، ދެ ކެންޑިޑޭޓުންނަށް ލިބުނު ވޯޓުގެ އަދަދަށްވެސް ވަނީ ބަދަލު އައިސްފަ އެވެ. އެގޮތުން ދެ ކެންޑިޑޭޓުންގެ ވޯޓުގެ ޖުމްލަ އަދަދުން ވަނީ އެއް ވޯޓު މަދުވެފަ އެވެ. އަދި މިއާއެކު ބާތިލް ވޯޓުގެ އަދަދު 7އަށް އަރައެެވެ.

އަލުން ގުނި ވޯޓު ފޮށީގެ ނަތީޖާއަށް ބަލާއިރު، އެ ފޮށިން ޕީއެންސީގެ ކެންޑިޑޭޓަށް 83 ވޯޓު ލިބިފައިވާއިރު، އެމްޑީޕީގެ ކެންޑިޑޭޓަށް ލިބިފައިވަނީ 76 ވޯޓެވެ. ނަމަވެސް މުޅި އިންތިޚާބުގެ ޖުމްލަ ނަތީޖާއަށް ބަލާއިރު އަދިވެސް ކުރީގައި އުޅެނީ އެމްޑީޕީގެ ކެންޑިޑޭޓެވެ.

ވޭވަށު ކައުންސިލް އިންތިހާބުގައި ވޯޓުލުމުގެ ޙައްޤު ޖުމްލަ 256 މީހަކަށް ލިބިފައިވާއިރު، އޭގެ ތެރެއިން 247 ފަރާތަކުން ވަނީ ވޯޓުލާފަ އެވެ.