ލ. ގަމުގައި އޮންނަ މަޝްހޫރު "ޕަރީ ފެންގަނޑު" ބަލާލުމަށް ޚާއްސަ ވިއުވިން ޕްލެޓްފޯމެއް ބިނާކޮށް، ރަސްމީކޮށް އާންމުންނަށް ހުޅުވާލައިފި އެވެ.

އެންދެރި ޕްރޮޖެކްޓުގެ އެހީތެރިކަމާއެކު ހެރިޓޭޖް ސޮސައިޓީން އިސްނަގައިގެން ކުރިއަށް ގެންދިޔަ މި މަޝްރޫއަކީ އެ ރަށުގެ ތާރީޚީ އަދި ތިމާވެށީގެ މުހިންމުކަން ދެމެހެއްޓުމަށް އެޅުނު މުހިންމު ފިޔަވަޅެކެވެ. މި މަސައްކަތް ކާމިޔާބުކަމާއެކު ނިންމުމުގައި ލ. ގަމު ކައުންސިލުން ދެއްވި ފުރިހަމަ އެއްބާރުލުން އެ ޖަމިއްޔާއިން ވަނީ ޝުކުރުވެރިކަމާއެކު ފާހަގަކޮށްފައެވެ.

Ad by Hajj Corporation

މި މަޝްރޫއުގެ މައިގަނޑު މަގުސަދަކީ، ބޮޑު ފެންގަނޑުގެ ގުދުރަތީ ރީތިކަން ރައްކާތެރިކަމާއެކު ބަލާލުމުގެ މަގު ފަހިކޮށްދިނުމާއި، އެ ސަރަހައްދަކީ އާންމުންނާއި ފަތުރުވެރިންގެ މެދުގައި މަގުބޫލު މަންޒިލަކަށް ހެދުމެވެ.

މި މަޝްރޫއުގެ އަމަލީ މަސައްކަތް ފަށާފައިވަނީ 2025 ވަނަ އަހަރުގެ އޮކްޓޯބަރު މަހުގައެވެ.

ޒިޔާރަތްކުރާ ފަރާތްތަކަށް ތަފާތު އަދި ހިތްގައިމު ތަޖުރިބާއެއް ފޯރުކޮށްދިނުމުގެ ގޮތުން، ފެންގަނޑުގައި ދުއްވާލުމަށްޓަކައި ދެ ކެނޯ މިހާރު ވަނީ ތައާރަފުކޮށްފަ އެވެ. އަދި މި ޚިދުމަތްތައް މިއަދުން ފެށިގެން އާންމުންނަށް ބޭނުންކުރެވޭނެ އިންތިޒާމު ވަނީ ހަމަޖެހިފައެވެ.

ލ. ގަމު ކުޑަ ހިންނައިގެ އިރުމަތީ ފަރާތުގައި އޮންނަ، ތާރީޚީ އަދި ފޯކްލޯއާ ގުޅިފައިވާ މިފެންގަނޑަކީ އާންމު ނަމުން ނަމަ "ރަން" ފެންގަނޑެވެ. ބައެއް މީހުން މިއަށް "ނަރަކަ ފެންގަނޑު" ގެ ނަމުންވެސް ނިސްބަތްކުރެއެވެ. ތިމާވެށީގެ ގޮތުން ބަލާއިރު، މިއީ ރަނޑޫ ގަސްތަކާއި ކިނބި ގަސްތަކުން މުއްސަނދި، ހިމާޔަތްކޮށްފައިވާ ދޫންޏާއި ހިޖުރަކުރާ ދޫނިތަކުގެ މުހިންމު މާހައުލެކެވެ. ވަކިން ޚާއްސަކޮށް، މިއީ "ދަނޑިފުޅު ދޫނި" ވިހާ އާލާވާ ސަރަހައްދެއްގެ ގޮތުގައި ވަނީ ފާހަގަކުރެވިފައެވެ.

މި ޗަސްބިން ސަރަހައްދަކީ ރަށުގެ ފެން ފަށަލަ ތާޒާކޮށްދިނުމުގެ އިތުރުން، ފެންބޮޑުވުން ކުޑަކޮށްދިނުމާއި ކާބަން ރައްކާތެރިކޮށް ހިފަހައްޓައިދޭ "ކާބަން ސިންކް" އެއްގެ ދައުރު އަދާކުރާ ތަނެކެވެ.

މި މުހިންމު ސަރަހައްދަކީ 23 ޑިސެމްބަރ 2021 އިން ފެށިގެން ދިވެހި ސަރުކާރުން ހިމާޔަތްކޮށްފައިވާ ސަރަހައްދެކެވެ.