ރާއްޖެއަށް ދިމާވެފައިވާ ޑޮލަރުގެ މައްސަލަ ހައްލުކުރުމުގައި ބަޔަކު މީހުން ހިތްހަމަނުޖެހުނު ނަމަވެސް، ކަންތައް ކުރާނީ ރައްޔިތުންނަށް ފައިދާވާ ގޮތަށް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިދިޔަ އާދިއްތަ ދުވަހު ބޭންކް އޮފް މޯލްޑިވްސް (ބީއެމްއެލް)ގެ ކާޑު ތަކުން ޑޮލަރުން ކެނޑުމުގައި ދިމާވި މައްސަލައަށް އިޝާރަތްކުރައްވައި، ރޭ ބޭއްވި ޕީއެންސީގެ ހަރުގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ، ބޭރު ފައިސާ އިން އާމްދަނީ ލިބޭ ކުންފުނިތަކުން މިހާރު ވަރަށް ގިނަ އަދަދަކަށް ކަޅު ބާޒާރުން އެ ފައިސާ މާރުކުރާ ކަމަށާއި އެކަމަކު އެމްއެމްއޭގެ ގަވާއިދުތަކަށް ގެންނަ ބަދަލާ އެކު އެކަން ބޭންކުތަކުން ކުރަން މަޖުބޫރުވާނެ ކަމަށެވެ.

އެގޮތުން ރައީސް ވިދާޅުވީ ރާއްޖޭގައި ޑޮލަރު ހިފަހައްޓަން ކުރާ މަސައްކަތުގެ ތެރެއިން، ބައެއް ގަވާއިދުތަކަށް ބަދަލުގެނައުމަށް ނިންމާފައިވާ ކަމަށެވެ. އެގޮތުން ބަދަލު ގެނައުމަށް ނިންމާފައިވަނީ އެމްއެމްއޭގެ ގަވާއިދާއި މަނީޗޭންޖާސްގެ ގަވާއިދަށް ކަމަށާއި އަދި ފޮރިން ޑައިރެކްޓް އިންވެސްޓްމަންޓާއި ބިޒްނަސް ޕްރޮފިޓް ޓެކްސް އަށް ހާއްސަކޮށް އެމްއެމްއޭ އިން ހަދާފައިވާ ގަވާއިދަށް ވެސް ބަދަލު ގެންނާނެ ކަމުގައި ރައީސް ވިދާޅުވިއެވެ.

ރައީސް ވިދާޅުވީ އެއާއެކު، ބައެއް މީހުން އެމަނިކުފާނު ދެކެ ހިތްހަމަނުޖެހޭނެ ކަމަށާއި، ނަމަވެސް އެމަނިކުފާނު ކުރައްވާނީ ރައްޔިތުންނަށް ފައިދާވާނެ ފަދައިން ކަމަށެވެ.

މި ކަހަަލަ ކަންތައްތައް ކުރީމާ ހިތްހަމަނުޖެހޭ ބަޔަކު ވެސް އުޅޭނެ. ކޮންމެ ގޮތެއް ވިޔަސް އެންމެން ހިތްހަމަ ޖެއްސޭނެ އެެއްވެސް ގޮތެއް ނޯންނާނެ އެއްވެސް ކަމެއްގައި. އެހެން ނަމަވެސް އަޅުގަނޑުމެން ކަންތައްތައް ކުރިއަށް ގެންދާނީ ރައްޔިތުންނަށް ފައިދާވާ ގޮތަށް،- ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު

ރައީސް އެފަދައިން ވިދާޅުވިއިރު، ޑޮލަރުން އާމްދަނީ ލިބޭ ކުންފުނިތަކުން އެތެރެކުރާ މުދަލުގެ އިމްޕޯޓު ޑިއުޓީގެ ޑޮލަރުން ބަލައިގަތުމަށް ސަރުކާރުން ވަނީ ނިންމާފައެވެ. އެގޮތުން އެފަދަ ފިޔަވަޅުތަކުގެ ސަބަބުން ރާއްޖޭގެ ބޭންކުތަކުގައި މިހާރަށް ވުރެ ގިނަ ޑޮލަރު ހުންނާނެ ކަމަށް ސަރުކާރުން ބުނެއެވެ.