ދިވެހިރާއްޖޭގެ ރައީސަކަށް އަރިއަތޮޅު ރަސްދޫއިން ދެންނެވި އެންމެ ހޫނު މަރުހަބާ ރައީސް ޑރ. މުޙައްމަދު މުޢިއްޒުއަށް ދަންނަވައިފިއެވެ.

ރައީސް ޑރ. މުޢިއްޒު އެ ރަށަށް ވަޑައިގަތީ އއ. ރަސްދޫގެ ކައުންސިލްގެ ފުލް މެޖޯރިޓީ ޕީއެންސީއަށް ލިބުމުގެ ބޮޑު ކާމިޔާބީ ފާހަގަކުރުމަށް ބާއްވާ ހަފުލާގައި ބައިވެރިވެވަޑައިގަތުމަށެވެ. މިއީ 17 އަހަަރަށް ފަހު އެމްޑީޕީ ނޫން ޕާޓީއަކަށް އެ ރަށު ކައުންސިލްގެ ފުލް މެޖޯރިޓީ ދިން ފުރަތަމަ ފަހަރެވެ.

Ad by Hajj Corporation

މިއަދު މެންދުރުފަހު އެމަނިކުފާނު އެ ރަށަށް ވަޑައިގަތުމުގެ ކުރިން އެ ރަށުގެ ބަނދަރުން ފެށިގެން ރަށުގެ ތެރެއަަށް ގިނަ ބަޔަކު ޖަމާވެ ސަފު ހަދައިގެން ތިއްބެވެ. އަދި ހަވީރު އެ ރަށަށް ފައިބާވަޑައިގެން ރައީސްވަނީ އެމަނިކުފާނުގެ އިސްތިގުބާލުގައި އެއްވެ ތިބި މީހުންނާ ސަލާންކުރައްވާފައެވެ.

މި ދަތުރުފުޅުގައި އެމަނިކުފާނުގެ އަރިހުގައި ވަޒީރުންގެ މަޖިލީހުގެ ގިނަ ބޭފުޅުން ބައިވެރިވެވަޑައިގެންފަައިވެއެވެ. އަދި މިއީ އިންތިހާބަށް ފަހު ރައީސް ޑރ. މުއިއްޒު މިފަދަ ހަރަކާތެއްގައި ބައިވެރިވަޑައިގަންނަވާ ފުރަތަމަ ފަހަރެވެ.

މީގެ ކުރިން އިދިކޮޅު އެމްޑީޕީއަށް ބޮޑު ތާއީދެއް އޮތް ރަސްދޫއިން ނިމިދިޔަ ލޯކަލް ކައުންސިލު އިންތިހާބުގައި ޕީއެންސީއަށް ބޮޑު އަޣުލަބިއްޔަތެއް ލިބި އެ ރަށު ކައުންސިލުގެ ހުރިހާ ގޮނޑިއަކާއި ޑަބްލިއުޑީސީގެ އެއް ގޮނޑި ފިޔަވައި ހުރިހާ ގޮނޑިއެއް ކާމިޔާބުވިއެވެ. 

އަދި އއ. އަތޮޅުގައި އެމްޑީޕީގެ މައި މަރުކަޒެއްގެ ގޮތުގައި އޮތް އުކުޅަހުގެ ހުރިހާ ގޮނޑިއެއްވެސް ޕީއެންސީން ކާމިޔާބުކުރިއިރު، އެމްޑީޕީއަށް ބޮޑު ތާއީދެއް އޮތް އއ. ތޮއްޑޫއިންވެސް ޕީއެންސީއަށް ބޮޑު ކާމިޔާބެއް ލިބުނެވެ.