އެމްޑީޕީން ގައުމު ހަލާކުކޮށްލި ގޮތުގެ ވާހަކަ މުގައްރިރުތަކުގައި ވެސް ލިޔާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރޭ ބޭއްވި ޕީއެންސީ ޖަގަހަ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ މިދިޔަ ސަރުކާރުގެ ވާހަކަ ދައްކަވަނީ އެއްވެސް ހާލެއްގައި މިސަރުކާރަށް ކަމެއް ނުކުރެވޭތީ ނޫންކަމަށެވެ.

އެގޮތުން ދުވަހަކު ވެސް ސަރުކާރަކުން ރާއްޖޭގެ އިގްތިސާދާއީ، އިސްލާމް ދީން ހަލާކު ނުކުރާ ވަރަށް އެމްޑީޕީގެ ސަރުކާރުގައި ރާއްޖޭގެ ދީނާއި އިގްތިސާދު ހަލާކުކޮށްލާފައިވާ ކަމަށް ރައީސް ވިދާޅުވިއެވެ. އަދި އެެވާހަކަތައް ރާއްޖޭގައި ތާއަބަދަށް ދައްކަންޖެހެނީ އެހެންވެ ކަމުގައި ރައީސް ވިދާޅުވިއެވެ.

އެއާއެކު ރައީސް ވިދާޅުވީ، އެ ވާހަކަތައް މުގައްރިރުތަކުގައި، ލެކްޗަރު ހޯލްތަކުގައި، ފޮތްތަކުގައި އަދި މައުރަޒުތަކުގައި ވެސް ދައްކާނެއެވެ.

"މިދިޔަ ސަރުކާރުން ކުރި ކަމުގެ ވާހަކަ އަޅުގަނޑުމެން މި ދައްކަނީ މި ދިޔަ ނުވަ މަހު ކަމެއް ނުކުރެވެއޭ ކިޔާތީ އެއް ނޫނޭ. އެވާހަަކަ ތާއަބަދަށް މި ރާއްޖޭގައި ދައްކާނެ މިދިޔަ ސަރުކާރުން ކުރި ކަމުގެ ވާހަކަ. ތާއަބަދަށް މިރާއްޖޭގައި ދައްކަންޖެހޭ. ރާއްޖޭގައި ދުވަހަކު ސަރުކާރަކުން ގައުމެއް ހަލާކުނުކޮށްލާވަަރަށް އިގްތިސާދާއި، އިސްލާމްދީނާއި، މުޖްތަމައު ހަލާކުކޮށްލި ވާހަކަ ތާއަބަދަށް އަންނަން އޮތް ޒަމާންތަކަށް ދައްކާނެ.. މުގައްރިރުގައިވެސް ލިޔާނެ.އެވާހަކަ ލެކްޗަރު ހޯލްތަކުގައި ވެސް ދައްކާނެ.، ފޮތްތައް ވެސް ލިޔާނެ، އެކި ތަންތަނުގައި މައުރަޒުތަކުގައި ވެސް ހަދާފައި ބަހައްޓާނެ . ތާއަބަދަށް ދައްކާނެ ވާހަކައެއް. އެހެން ކަމުން މިވާހަކައިން ސަލާމަތްނުވެވޭނެ. ފަސް އަހަރު ދުވަސް މިގައުމު ހަލާކުކޮށްލި ހަލާކުކޮށްލުމަކީ ތާއަބަދަށް އަންނަން އޮތް ޖީލުތަކާއި އެޖީލުތަކުގެ ކުރިއަށް އޮތް ޖީލުތަކުގެ ދަރިންނަށް ފެންނަން އޮންނާނެ ހަގީގަތަކަށްވާނެ. އެ ހަގީގަތް ބަދަލެއް ނުކުރެވޭނެ."

ރައީސް ވިދާޅުވީ އެމަނިކުފާނު ވެރިކަން ކުރައްވަނީ މާތްﷲ ގެ ވަޖަހުފުޅަށްޓަކައި އަމާނެއްގެ ގޮތުގައި ދެކިގެން ކަމަށެވެ. އަދި މި ސަރުކާރުގެ ސިޔާސަތަކީ އިޙްލާސްތެރި ތެދުވެރި ސިޔާސަތެއް ކަމަށް ވެސް ރައީސް ވަނީ ވިދާޅުވެފައެވެ.

މިދިޔަ ސަރުކާރު ނިމުނު އިރު ރާއްޖޭގެ ދަރަނި 120 ބިިލިއަން ރުފިޔާ ހުރަސްކޮށްފައިވާއިރު، ކޮވިޑާ ގުޅިގެން ހިންގި ޚިޔާނާތްތަަކުގެ ސަބަބުން އިގްތިސާދީ ބޮޑު އަނދަވަޅަށް ގައުމު ވައްޓާލީ އެ ސަރުކާރުން ކަމަށް ސިޔާސީ އެކި ބޭފުޅުން ވިދާޅުވަމުން ގެންދަވައެވެ. އެގޮތުން މި ސަރުކާރުގެ އެކި ފަންތީގެ ބޭފުޅުން ވެސް، އެ ވާހަކަތައް އެ ގޮތުގައި ދައްކާފައިވެއެވެ.