ދިވެހި ސިފައިންގެ ލަޝަކަރަކީ ދިވެހި ރައްޔިތުންގެ ހިމާޔަތާ ރައްކާތެރިކަަމަށް ޓަކައި ރުކުރަވައިލައިފައިވާ އެންމެ ގާބިލް ލަޝްކަރު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

ރައީސުލްޖުމްހޫރިއްޔާ މިފަދައިން ވިދާޅުވީ ދިވެހި ސިފައިންގެ ޚިދުމަތަށް 134 އަހަރު ފުރުނު، ސިފައިންގެ އަހަރީ ދުވަހާ ގުޅިގެން މިއަދު އެކްސްގައި ކުރެއްވި ޕޯސްޓެއްގަ އެވެ.

Ad by Hajj Corporation

ރައީސްގެ މެސެޖުގައި ވިދާޅުވީ، ދިވެހި ސިފައިންގެ ޚިދުމަތުގެ ދިގު ތާރީޚުގައި ޚިދުމަތްތެރީންގެ ލިސްޓު ރަންއަކުރުން ފަވައިދީފައިވަނީ ޝަހީދުންނާއި، މުޖާހިދުންނާއި، ނުރައްކަލުން ރައްޔިތުން ސަލާމަތްކޮށްދިން ހިތްވަރުގަދަ އެތައް ދަރީންނެއް ކަމަށެވެ. އަދި ދިވެހި ރައްޔިތުންގެ ޙިމާޔަތާއި ރައްކާތެރިކަމަށް ރުކުރުވާލާފައިވާ އެންމެ ބިޔަ، އެންމެ ޤާބިލް ލަޝްކަރަކީ އެއްވެސް ޝައްކެއްނެތް ގޮތުގައި ލޮބުވެތި ދިވެހި ސިފައިންކަން އެމަނިކުފާނު ފާހަގަކުރެއްވި އެވެ.

ދިވެހި ޤައުމަށްޓަކައި ރެޔާއިދުވާލު ސިފައިން ކުރައްވަމުން ގެންދަވާ އަގުހުރި ޚިދުމަތަށް ފަށްފަށުން ޝުކުރު ދަންނަވަމުން، ރައީސް ވަނީ މި އުފާވެރި އަހަރީ ދުވަހުގެ ތަހުނިޔާ ދިވެހި ސިފައިންނާއި އެ ބޭފުޅުންގެ ޢާއިލާތަކަށް އަރިސްކުރައްވާފަ އެވެ.

ސިފައިންގެ އަހަރީ ދުވަހުގެ ހަރަކާތްތައް ރަސްމީކޮށް ފަށާފައިވަނީ މިއަދު ހެނދުނު 6:00 ގައި ކަޅުތުއްކަލާ ކޮށީގައި ބޭއްވި ދިދަ ނެގުމުގެ ހާއްސަ ރަސްމިއްޔާތަކުންނެވެ.

މި އަހަރުގެ ސިފައިންގެ ދުވަހުގެ މުނާސަބަތުގައި ބާއްވާ މިލިޓަރީ ޕެރޭޑް އޮންނާނީ އަންނަ މެއި މަހުގެ ދޭއްވާ ހޮނިހިރު ދުވަހުގެ ހަވީރު 16:30 ގަ އެވެ. މި ހިނގާލުމުގައި ކަނޑާއި، އެއްގަމާއި، ވައިގެ ބާރުގެ ލަޝްކަރުތައް ފެނިގެންދާނެ އެވެ.